Dak Lak ră anai glăk hơmâo đơ đam pla pơjing mơnong amăng ia hăng rông akan hơdang truh 42 rơbâo ha, hơmâo rơbêh 700 boh bơnư̆ pơkong ia dơnao năng ai 32 rơbâo ha jơlah ia. Anai lĕ, tơlơi hơmâo kiăng Dak Lak kơsem min mă yua, pơđĭ tui bơwih ƀong huă rông akan hơdang. Khă tui anun, ƀuh rơđah, tơring čar anai kiah hơmâo 15.000 ha ba yua rông akan hơdang, kơnong hơmâo 30% mrô đơ đam lŏn dơnao, jơlah ia. Amăng anun, anih rông akan amăng dơnao bơnư̆ pơkong hơmâo 8000 ha.

Tui hăng ơi Trịnh Bá Sơn, Kơ-iăng khua anom bruă gah rông akan hơdang tơring čar Dak Lak, phun ñu ba truh hơmâo bruă rông akan hơdang aka ƀu lăp anŏ gêh găl lĕ, sa črăn aka ƀu hơmâo hră pơtô pơčrâo brơi tong ten, jao apah yua ia dơnao, sa črăn tui anŏ pơkă amăng hră pơtrun 67 pơkă thun blan apah yua dơnao ia rông akan hơdang kơnong 3 thun đôč.