Tơring glông giăm guai Ngọc Hồi, tơring čar Kon Tum ră anai hơmâo 199 anih dưm biến áp apui lơtrik 3 pha. Samơ̆ hơdôm anih dưm biến áp apui lơtrik 3 pha anai rôk jơlan pơprong, jơlan pơlir hơbit djop plơi pla, bơ ƀơi hơdôm kual ngă đang hmua, kual ƀon lan aka ƀu tuh pơ alin dăng nao hrĕ apui lơtrik. Ơi Đinh Cao Cường, Khua git gai Ping gah tơring glông Ngọc Hồi, khua khul pơ ala mơnuih ƀon sang tơring čar Kon Tum brơi thâo, tui pel ĕp mơng anom bruă bơdjơ̆ nao brơi ƀuh, đơ đam tơring glông hơmâo rơbêh 3.000 boh sang anŏ ngă hmua hăng abih tih rơbêh 4.000 ektar glăk kiăng samơ̆ aka ƀu hơmâo apui lơtrik 3 pha pioh ngă hmua pla pơjing. Anai lĕ bruă mơ̆ mơnuih ƀon sang hơmâo lu wŏt rơkâo đĭ:

“Amăng hơdôm tal pơbưp mơnuih ƀon sang hăng khul pơ ala mơnuih ƀon sang tơring čar ƀơi tơring glông Ngọc Hồi, mơnuih ƀon sang lu wŏt rơkâo gơnong bruă apui lơtrik sem lăng, pel ĕp dăng nao hrĕ apui lơtrik 3 pha kiăng hơmâo hrĕ apui lơtrik đuăi kơtang brơi mơnuih ƀon sang ngă đang hmua amăng đơ đam kual mơng anun pơhlôm brơi bruă pruih ia. Kâo ăt thâo tơlơi kiăng mơng apui lơtrik amăng ngă hmua ră anai, ăt glăk kiăng hloh ƀơi sa, dua boh ƀon lan pơkŏn.

Ră anai đơ đam tơring čar Kon tum hơmâo 182 kual ngă đang hmua ataih mơng plơi pla kiăng glông hrĕ apui lơtrik 3 pha. Kiăng dăng nao hrĕ apui lơtrik 3 pha brơi hơdôm kual ngă đang hmua anai, gơnong bruă apui lơtrik tơring čar Kon Tum pơplih pơkra, man pơkra phrâo giăm 267 km glông hrĕ apui lơtrik trung áp, 366 km glông hrĕ apui lơtrik hạ áp, 219 anih biến áp 3 pha…hăng abih tih prăk tuh pơ alin him lăng rơbêh 624 klai prăk. Ơi Lê Như Nhất, Khua gơnong bruă sĭ mơdrô hăng tuh tia pơkra pơjing tơring čar Kon Tum brơi thâo, prăk tuh pơ alin dăng hyu hrĕ apui lơtrik 3 pha rơngiao hăng tơlơi dưi mơng gong gai hăng gơnong bruă apui lơtrik:

“Hăng bruă tuh pơ alin pơdong glông hrĕ apui lơtrik 3 pha pơhlôm mă yua ƀơi kual ngă đang hmua ră anai bưp lu tơlơi tơnap tap, ƀu hơmâo hơnong pơkă kiăng ngă tui tuh pơ alin. Yua anun yơh, rơnoh prăk tuh pơ alin mơng gơnong bruă apui lơtrik ăt ƀu pơhlôm brơi djop ƀơi hơdôm kual anai. Hơdôm kual ngă hma pla pơjing prong hloh ataih mơng kual plơi pla kiăng hơmâo lu prăk kak tuh pơ alin. Anai lĕ tơlơi gun găn hăng ngă glêh tơnap hloh amăng pok pơhai ngă tui”.

Kiăng pơsir hĭ tơlơi tơnap tap kơƀah prăk tuh pơ alin amăng pơdong glông hrĕ apui lơtrik 3 pha brơi hơdôm kual ngă đang hmua ataih mơng plơi pla tañ hloh kiăng anăp nao pơplih tuh tia pơkra pơjing, ngă hmua, tui gơnong bruă sĭ mơdrô hăng tuh tia pơkra pơjing tơring čar Kon Tum kiăng ngă tui ha amăng plĕ hơdôm hơdră bruă, sit biă ñu lĕ: rơkâo Kông ti apui lơtrik kual tong krah đing nao tuh pơ alin; gơnong bruă apui lơtrik tơring čar Kon Tum djru brơi boh thâo măi mok brơi hơdôm boh sang anŏ pơgôp prăk dui nao hrĕ apui lơtrik 3 pha pơ đang hmua; jak iâu gum pơgôp mơng abih bang hăng hơdôm boh sang anŏ, anom bơwih ƀong sĭ mơdrô; gong gai djop gưl hơmâo hơdră djru dăng nao hrĕ apui lơtrik 3 pha hăng hơdôm kual pla pơjing pơlir hăng bruă hrưn đĭ rơnoh yôm mơng gơnam đang hmua; amăng bruă dưm dăp kiăng đing nao tơl bruă bruă pơhlôm kual ngă đang hma pla pơjing ƀơi hơdôm kual gêh gal kiăng amuñ dăng nao hrĕ apui lơtrik 3 pha./.