Ƀơi Anih gru đưm Điểm cao 1049, ƀơi să Hơ Moong, tơring glông Sa Thầy, Jơnum min mơnuih ƀon sang tơring čar Kon Tum pơphun hrơi jơnum prong Tê̆t pla kyâo djŏp rơnuk hơdor na nao kơ Wa Hồ hăng čơkă Hrơi ayuh hyiăng lŏn adai rŏng lŏn tơnah lơ 5/6 thun 2023. Tơdơi kơ pơphun ngă, ƀing khua hơmâo pla 2.500 phun kyâo hngo kiăng hơmâo anih anom hiam, pơgang ba ayuh hyiăng jum dar anih gru đưm.

Bruă pla phun kyâo mơtah kiăng pơgang ba ayuh hyiăng, pơjing anih anom hiam ƀơi hơdôm anih gru grua, anih tuai čuă ngui ăt hơmâo lu tơring glông, plơi prong ƀơi Kon Tum gum ngă mơn. Amăng thun anai, tơring čar Kon Tum kiăng pla phrâo 4.000 ha glai rưng hăng 600.000 rơbâo phun kyâo gah rơngiao glai rưng. Amăng 5 thun rơwang bruă Jơnum ruah khua ping gah tơring čar tal 16, tơring čar Kon Tum gir pla phrâo 15.000 ha kyâo glai hăng 3 klăk phun kyâo gah rơngiao glai rưng.