Tơdơi kơ boh makka mơ̆ng kông ty Tơlơi dưi pơkă hnơ̆ng Đang hmua Đất đỏ Bazan, plơi thôn 4, să Nhân Cơ, tơring čar Lâm Đồng dưi tŭ mă hră pơsit gơnam OCOP 3 asar pơtŭ thun 2024, sang bruă mơdrô anai pok pơhư prong bruă pla pơjing, ming rai gơnam sĭ mơdrô. Ƀu kơnong pơđĭ tui bruă hyu blơi glăi boh khuih-makka asăt mơnuih ƀôn sang sĭ glăi đôč ôh, kông ty dŏ tuh pơ alin blơi măi kơ-uă pơkra, ƀhu krô hăng pơjing gơnam sĭ mơdrô hăng rơnoh yom ƀiă. Thun anai, rơnoh boh makka pơkra jing gơnam sĭ mơdrô lĕ hơmâo năng ai 100 tơn, đĭ lu hloh pơkă hăng hlâo adih. Khă tui anun, hrŏm hăng rơnoh đĭ lu hmar lĕ tơlơi tơnap amăng bruă hyu hơduah ĕp anih anom sĭ mơdrô hơđong ƀu ƀiă ôh. Yă Thân Thị Thảo, Khua sang bruă anai kah pơpha, sĭ mơdrô gơnam amăng plăng điện tử yơh, anăp nao amuñ hăng gêh găl hloh samơ̆ sang bruă mơdrô ăt kiăng hơmâo tơlơi djru ba, hyu ĕp anih anom blơi tŭ yua hơđong hloh.

“Thun anai, rơnoh boh makka hơmâo pĕ lu hloh 2-3 wơ̆t, anih ba sĭ mơdrô lĕ ƀing gơmơi ăt kiăo tui anih juăt ba nao sĭ đôč, hăng ƀing gơ̆p thâo krăn mơ̆ng hlâo, laih anun lăi pơthâo amăng plăng facebook, Zalo. Kiăng sĭ pơthâo amăng atur tơlơi pơhing plăng điện tử mơ̆n, samơ̆ aka ƀu thâo găn rơgao amăng bruă dưm hruh, kơdŭng djă hyu ba sĭ mơdrô, pơsir anăm gơnam sĭ mơdrô anun yơh kiăng hơmâo tơlơi djru ba”.

Mơ̆ng bruă mă, anŏ či kiăng jŭ yap anih blơi sĭ boh troh đang hmua, akŏ thun anai, să Nhân Cơ ba yua anom sĭ mơdrô hăng điện tử ƀơi sang bruă ping gah să mơtam, hrŏm hăng anăn website nhanco.vn kah hăng sang “čơ mrô” ƀơi să gơñu. Pơ anai, lu pô sang bruă dưi djru ba rup, pơdah thâo anăn gơnam amăng plăng điện tử, lăi pơthâo anih pơkra ming, phun akha gơnam pơkra ming hơmâo mơ̆ng pơpă laih anun pơdŭ pơgiăng ba hyu sĭ mơdrô. Yua kơ anun, mơnuih pơkra ming pơblih tơlơi juăt ngă mơ̆ng bruă sĭ mơdrô kơ mơnuih hyu blơi kah hăng hlâo adih, jing bruă hyu tơña lăng, ĕp anih pơpă či blơi lu hăng akŏ pơjing anih sĭ mơdrô amăng atur mrô. Amai Phạm Thị Nga, pô sang sĭ mơdrô ia bah hăng hruh čim ačăng črah ia rơsĭ yến sào Thiên Ngọc Nga, plơi thôn 10, să Nhân Cơ brơi thâo, bruă ngă hrŏm pơphun atur sĭ mơdrô amăng plăng điện tử mơ̆ng să lĕ pok anŏ gêh găl nao giăm ƀing tuai blơi ƀơi gah rơngiao să hăng tơring čar.

“Dơ̆ng mơ̆ng ngă hrŏm bruă sĭ mơdrô pôr pơthâo amăng plăng tơlơi pơhing điện tử să, gơnam yến sào dưi hơmâo lu mơnuih thâo hloh, tuai mơ̆ng lu anih tơña blơi. Kâo čang rơmang rơmang thun blan pơ anăp ƀu kơnong kơ yến sào đôč ôh, boh khuih, makka hăng kơphê laih anun lu gơnam pơkŏn ƀơi să ăt amra dưi pôr pơthâo lu hloh, hrưn nao pơ ataih anih anom sĭ mơdrô”.

Ră anai, să Nhân Cơ hơmâo 8 mơta gơnam sĭ mơdrô OCOP hăng hlăk ngă pơgiong hră pơar kiăng pơtong glăi dơ̆ng 4 mơta gơnam phrâo. Đơ đam să hơmâo 10 boh anom ngă hrŏm dŏ mă bruă lu biă mă ñu amăng bruă ngă hmua, hăng rơnoh prăk tuh pơ  čih anăn truh kơ 28,5 klai prăk. Anai lĕ gơnam sĭ mơdrô yom biă mă pioh kơ să ăt pơđĭ tui sĭ mơdrô pôr pơthâo amăng plăng điện tử. Tui hăng ơi Vũ Trọng Tài, Kơ-iăng khua anom bruă bơwih ƀong hăng wai lăng bruă man pơdong să Nhân Cơ, tơdơi kơ ha mơkrah thun mă bruă, tơlơi mơak lĕ mrô rơnoh gơnam sĭ mơdrô pơdah thâo amăng plang internet ƀu kơnong đĭ tui lu ôh, dŏ ngă pơblih tơlơi pơmin, bruă ngă mơ̆ng pô pơkra ming gơnam sĭ mơdrô.

“Mơ̆ng blan 2/2026 truh ră anai, atur tơlơi pơhing sĭ mơdrô amăng điện tử să hơmâo ƀlir 12 mơta gơnam sĭ mơdrô mơ̆ng 8 boh sang, pô gơnam sĭ mơdrô ƀơi să. Ƀing gơmơi akŏ pơjing grup mă bruă pioh djru mơnuih ƀôn sang lăi pơthâo gơnam sĭ mơdrô amăng plang tơlơi pơhing điện tử, pơsir brơi hră rơkâo blơi lu hăng pok prong bơnah website nhanco.vn pioh sĭ mơdrô hăng điện tử jing pran kơtang pơđĭ kyar bruă ngă hmua ƀơi plơi pla”.

Anih anom pôr tơlơi pơhing sĭ mơdrô amăng điện tử ƀơi Nhân Cơ yua kơ anun mơ̆n čih pơthâo tơlơi pơhing gơnam sĭ mơdrô ƀudah tŭ mă hră rơkâo blơi gơnam sĭ mơdrô tŭ yua. Anai jing anih pơtruh nao rai plah wah sang bruă mơdrô, anom ngă hrŏm hăng sang anŏ pơkra ming gơnam; anih mơnuih ngă hmua kah pơpha tơlơi thâo thăi amăng bruă mă, hơduah ĕp bơnah ngă hrŏm hăng ƀơƀrư̆ pơjing tơlơi thâo, bruă juăt ngă phrâo pơtrut pơđĭ kyar anih anom sĭ mơdrô. Ơi Phan Anh Tuấn, Khua ping gah să Nhân Cơ lăi lĕ, boh tŭ yua prong hloh mơ̆ng hơbô̆ bruă anai ƀu djơ̆ lăi mrô rơnoh lu ôh, dŏ jing bruă mă akŏ pơjing anih anom sĭ mơdrô pơtruh brơi plah wah mơnuih pla pơjing hăng anih anom blơi ba mơ̆ng kual plơi pla mơtam.

“Boh tŭ yua blung a ƀu kơnon sĭ mơdrô gơnam tam đôč ôh, dŏ pơjing rai abih anom pioh kơ anom bruă mơdrô, anom ngă hrŏm bưp nao rai, pơtruh brơi tơlơi pơhing, pôr pơthâo anăn gơnam sĭ mơdrô. Ƀing gơmơi čang rơmang jai hrơi hơmâo lu gơnam mơ̆ng Nhân Cơ hăng lu plơi pla ieo gah dưi pơthâo amăng plang tơlơi pơhing điện tử, kiăng kơ lu mơnuih dưi thâo hloh gơnam ƀong phara mơ̆ng kual lŏn anai, anŏ gêh găl mơ̆ng să dưi hơmâo kiăng pơđĭ tui lu hloh”.

Mơ̆ng sang “Čơ mrô” să đôč, Nhân Cơ hlăk pok prong tui hơdră ngă bruă phrâo hloh amăng bruă pơđĭ kyar đang hmua hăng man pơdong plơi pla phrâo. Ƀu kơnong djru kơ mơnuih ngă hmua pok prong anih blơi, hơdră bruă dŏ djru ngă pơblih tơlơi pwomin ngă hmua pla pơjing, ming pơkra gơnam sĭ mơdrô mơ̆ng mơnuih ƀôn sang hăng sang bruă mơdrô, laih dơ̆ng pơtong rơđah tơlơi gơgrong ba ngă hrŏm mơ̆ng gong gai kơnuk kơna djru pơblih yua mrô. Anun lĕ, sa tơlơi brơi ƀuh ba Hră pơtrun mrô 57-NQ/TW mơ̆ng ding jum kơđi čar ngă tui sit nik amăng tơlơi hơdip mơda rim hrơi hăng bruă ngă rơđah rơđong laih, yak rơbat kiăo tui kơ atur mrô kiăng bơwih ƀong huă mrô akŏ pơjing sit nik hăng pơđĭ kyar tui na nao amăng kual lŏn plơi pla lŏn drơ̆t mriah Bazan Nhân Cơ, tơring čar Lâm Đồng.