Kiăng ngă tui tơhnal pơkă anai, Lâm Đồng črâo ba hơdôm bôh ƀirô, anom bruă gơgrong pel ĕp, pơdŏng hơdôm yak ba đuăi, pơsir anih anom mă yua man pơdŏng ƀu djơ̆ phiăn; pơtrut pơplih bruă ngă đang hmua, mă yua bôh thâo phrâo ngă đang hmua ƀu mă yua sang gôm; pơplih ƀơƀrư̆ jing pơđĭ kyar bruă đang hmua plơi prong, đang hmua dlai tlô, pơhlôm akô̆ tlôn, hơdjă... nao hrom hăng pơgang anih anom dô̆.

Abih bang prăk mă yua pioh ba đuăi giăm truh 177 klai prăk, amăng anun hăng ngăn drăp kơnuk kơna kơnong hmâo 1,7%, dô̆ glăi lĕ ngăn rơnoh mơng hơdôm khul grŭp, mơnuih. Tui hăng ơi Phạm S, Kơ-iăng Khua Jơnum min mơnuih ƀon sang tơring čar Lâm Đồng, đơ đam tơring čar ră anai hmâo năng ai ñu 4.500 ektar sang gôm, amăng anun lu ñu ƀơi plơi prong Đà Lạt. Bruă sut lui anih ngă sang gôm đang pla amăng plơi prong Đà Lạt hăng hơdôm tơring glông jum dar kiăng kơtưn đĭ bruă wai lăng sang gôm đang pla, pơtrut bruă ngă đang hmua mă yua bôh thâo phrâo djơ̆ hăng pơplih ayuh hyiăng./.