Tơring ƀudah kual mơnuih djuai ƀiă dŏ ƀơi tơring glông Khánh Vĩnh hơđăp, anih bơwih ƀong huă tơnap biă mă, mơnuih ƀôn sang hơdip mơda kơnang kơ bruă ngă hmua tui hơđăp, raih daih, ĕp ƀong mă hơjăn amăng kual. Bruă pơphun brơi ngă hmua, pla pơjing sa mơta pơjeh, djuai mơnong pioh sĭ mơdrô pơđĭ rơnoh lĕ aka ƀu akŏ pơjing ôh. Lu sang anŏ ngă hmua tui tơlơi juăt hơđăp, hlơi kơtang pô anun dưi, phara ba ngă.

Lơ̆m anun, hơmâo hơbô̆ phrâo lir hơbit plah wah kông ty mơnuih ƀôn sang ngă pô sĭ mơdrô boh čroh hăng tač rơngiao laih anun boh čroh đang hmua Ngân Nguyễn, pơkôl hrŏm 23 boh sang anŏ mơnuih ƀôn sang djuai ƀiă ƀơi să Khánh Vĩnh pla rơbêh 20 ha đang boh kruăi dŭng, hơmâo ba glăi boh tơhnal tŭ yua klă. Kông ty pô djru ba pơjeh phun pla, hơbâo pruai, kmơ̆k dưm amăng hmua, ia jrao pơgang hlăt arong aruač, pơtô brơi hơdră pla pơjing, laih dơ̆ng ƀuăn blơi abih boh čroh (boh troh) mơnuih ƀôn sang sĭ glăi laih pĕ. Abih bang sang anŏ ngă hrŏm, hơmâo nao hrăm tơlơi thâo amăng bruă pla pơjing, dưm hơbâo, kmơ̆k pruai djơ̆ lăp, čih pioh djop bruă mă tong ten.

Anai lĕ tơlơi mơ̆ng hlâo ƀu hơmâo mơnuih đing nao ôh. Hơmâo sang bruă bơwih ƀong sĭ mơdrô ngă hrŏm djru mơnuih ƀôn sang ngă hmua mơ̆ng blung phrâo ngă hmua, dăp hơdră tong ten, kiăng huăi rơngiă đôč đač amăng rơnuč bơyan pĕ boh, hơpuă yuă ƀudah boh čroh rơbêh rơbai lui soh sel. Yă Nguyễn Thị Ngân, Khua kông ty mơnuih ƀôn sang ngă pô sĭ mơdrô boh čroh hăng gơnam đang hmua Ngân Nguyễn brơi thâo:

“Ngă tui kơčăo bruă pơtô hrăm hơdră ngă hmua pla boh čroh, abih bang črăn bruă mơ̆ng pruai kmơ̆k, dưm hơbâo laih anun pruih ia jrao pơdjai hlăt kman lêng kơ hơmâo ƀing kơhnăk bruă ngă hmua hăng ƀing adơi ayong thâo ngă hmua đang lăi pơthâo brơi mơnuih ƀôn sang thâo rơđah. Laih anun pơblang brơi mơnuih ƀôn sang thâo mă yua hơbâo pruai djah djâo klă hloh kơ yua kmơ̆k jrao hiư̆m pă kiăng boh mơboh hiam ƀong jơman. Djop mơta gơnam boh čroh pla tui hơdjă rơgoh, ba yua hơbâo djah djâo brơi mơnuih ƀôn sang thâo krăn, juăt hăng mă yua pơblih phrâo amăng bruă ngă hmua pla pơjing, dưm kmơ̆k hơdjă”.

Tơdơi kơ dua thun ngă hrŏm, hơmâo tơlơi djru mơ̆ng lu jơlan hơdră dêh čar pơtrun, hơbô̆ bruă anai, hơmâo ba glăi boh tơhnal tŭ yua klă lăp bơni, Phun boh kruăi dŭng đĭ hiam, boh lu truh bơyan, thun pĕ boh sĭ hơđong. Lu sang anŏ djuai ania Raglai, Êđê hlâo adih kơnong pla hơbơi plum amăng hmua, pla kơtor kiăng hơmâo gơnam ƀong mơnong sĭ, ră anai pơblih pla boh čroh hơmâo rơnoh sĭ pơmă ƀiă, prăk pơhrui glăi dua, klâo wơ̆t lu hloh pơkă hăng hlâo. Ƀu kơnong lir hơbit hăng sang bruă mơdrô đôč ôh, ƀơi să Trung Khánh Vĩnh, hlâo adih să Khánh Trung, tơring glông Khánh Vĩnh hơđăp, bruă ngă hrŏm đang hmua hơdjă, pơgang mơtah mơda Khánh Trung ăt hlăk mă bruă ba glăi boh tŭ yua. Bruă ngă hrŏm anai hơmâo rơbêh 20 boh sang anŏ ngă ding kơna pơphun ngă hrŏm ngă hmua pla pơjing laih anun djru brơi bruă hơtŭk riă tơnă hơbai, ba mơnong ƀong huă hăng pơdŭ pơgiăng gơnam đang hmua, boh čroh, anih dŏ kơ ƀing tuai hyu lăng đang hmua.

Bruă lir hơbit plah wah ding kơna gum hrŏm ƀu kơnong djru pơhrŏ ƀiă rơnoh prăk tuh pơ alin hnang blung đôč ôh, dŏ djru kơ bruă sĭ mơdrô boh čroh, gơnam mơ̆ng đang hmua tui khul, pơđĭ rơnoh hơđong ƀiă. Sa tơlơi lăp đing nao, bruă ngă hrŏm anai, lir hơbit ngă hmua hăng pơđĭ kyar bơwih bơwăng sĭ mơdrô. Hmua đang boh čroh Hoa Quả Sơn mơ̆ng yă Lê Thị Kim Thanh lĕ sa amăng hơdôm hmua đang lăp bơni biă mă. Mơ̆ng bruă kơnong pla phun boh čroh pioh ƀong đôč, yă Thanh khin pơblih anăp ngă bruă, ngă hmua pla pơjing dưm hơbâo pruai djah djâo hơdjă huăi đôm jrao, lir hơbit hăng bruă ba tuai hyu ngui amăng plơi pla, hyu lăng đang hmua. Ƀing tuai nao ĕp lăng đang hmua, amra hyu pĕ boh amăng đang, dŏ glăi hơtŭk riă tơnă hơbai asơi añăm, dŏ ngui hăng pô hmua, pô sang, plơi pla. Yă Lê Thị Kim Thanh lăi, rim kơ bruă bơwih brơi tuai găn rơgao lĕ yua ƀing ding kơna ngă hrŏm soh pô gơgrong ba.

“Amăng sang bruă ngă hrŏm hơmâo hơdai gum hrŏm tong ten, bơwih brơi kơ ƀing tuai nao pơ Trung Khánh Vĩnh anai, amra bơwih brơi djop bruă mơ̆ng tơlơi hyu ĕp lăng, găn rơgao, dŏ glăi blơi gơnam, ba yua. Yua hơbô̆ bruă ngă hrŏm anai abih bang ƀing ngă hrŏm djop anŏ gêh găl bơwih brơi kơ tuai hyu ngui tŭ mă, ngă bruă ƀu lăi thâo mơtam ôh, khom ngă rah bruă, hrăm rah hơdră bơwih brơi kơ tuai, djop bruă gum hrŏm soh".

Mơ̆ng hơdôm hơbô̆ bruă anet samơ̆ tŭ yua prong brơi ƀuh, lir hơbit jing gai kăl djru mơnuih ƀôn sang djuai ƀiă pơblih hơdră bơwih ƀong huă. Lơ̆m mơnuih ƀôn sang ngă hrŏm hơbit, pơphun  bruă mă, hrŏm hơbit ba sĭ mơdrô gơnam mơ̆ng đang hmua, rơnoh sĭ mơdrô gơnam đang hmua dưi đĭ, pran jua ngă hrŏm dưi kơjăp tui. Pơhrua nao bruă ngă pơphun mă tŭ kơ hơmâo kah hăng hlâo, mơnuih ƀôn sang ƀrư̆ juăt hăng bruă ngă, pơhlom anŏ pơkă djơ̆ hơnơ̆ng hiam hăng anŏ kiăng mơ̆ng anih sĭ mơdrô či blơi gơnam.

Ngă hrŏm lir hơbit lĕ kiăng mơnuih ƀôn sang khom ngă tui djơ̆ mơneč phrâo ia rơgơi amăng bruă mă, glăm ba tong ten hăng gơnam ta sĭ mơdrô. Mơ̆ng anun ruăi bruă ngă sĭ mơdrô, pla pơjing pơhlom akŏ klôn sir krep, pơđĭ tui kơnuih hiam boh tŭ yua anăn boh čroh mơ̆ng đang hmua kual čư̆ siăng ba sĭ mơdrô. Yom hloh dơ̆ng lĕ, lu hơbô̆ bruă anai, hlăk pơgôp hrŏ, tong ten Jơlan hơdră tơhnal pơkă mơ̆ng dêh čar kơ pơđĭ kyar kual mơnuih ƀôn sang djuai ƀiă; amăng anun, pơđĭ kyar ngă hmua, pơsir bruă mă, tơlơi bơwih ƀong huă hăng pơđĭ tui rơnoh pơhrui glăi kơ mơnuih ƀôn sang jing anŏ phun.

Ơi Nguyễn Ngọc Sơn, Kơ-iăng khua Gơnong bruă Djuai ania hăng Tơlơi đăo tơring čar Khánh Hòa, lăi pơtong, truh ră anai, mơnuih ƀôn sang ƀu hơmâo tŭ mă tơlơi djru mơ̆ng sa bơnah dơ̆ng tah, dưi pơtrut pơsur pơgôp hrŏm, glăm ba bruă mă, mơ̆ng anun akŏ pơjing tơlơi juăt amăng bruă mă, ngă hmua pla pơjing, sĭ mơdrô kơhnăk hloh hơđong na nao.

“Kơnuk kơna ƀu hơmâo djru djop mơta dơ̆ng tah, mơnuih ƀôn sang hơmâo djru hrŏm hăng kơnuk kơna sa črăn amăng hơbô̆ bruă anai. Kâo đăo sit anun lĕ hơdră djru tŭ yua hloh pioh pơblih tơlơi pơmin, bruă mă lơ̆m mơnuih ƀôn sang hơmâo rơnoh prăk gơñu pô pơčruh hrŏm amăng anun, gơñu amra glăm ba gơgrong lu hloh amăng kông ngăn prăk kăk hơmâo djru hrŏm. Anai lĕ hơdră hmar hloh pioh kơ mơnuih ƀôn sang thâo hluh, ngă khua pô hăng tong ten hăng bruă ngă hmua phrâo”.

Tơring čư̆ siăng tơring čar Khánh Hòa hlăk hơmâo lu tơlơi pơblih hiam klă. Lơ̆m sang bruă sĭ mơdrô, anom ngă hrŏm hăng mơnuih ƀôn sang mă tơngan lir hơbit ngă hmua pla pơjing ƀu djơ̆ lăi bruă phara ba pô dơ̆ng tah. Hrŏm hơbit bơwih ƀong huă, ngă hmua pla pơjing jing anăp nao hrŏm djơ̆ lăp, djru mơnuih ƀôn sang djuai ƀiă hrưn đĭ ngă pô kơ tơlơi bơwih ƀong huă, ƀơƀrư̆ pơđĭ kyard sang anŏ hơđong kơjăp.