Ƀơi tơring čar Dak Lăk hơmâo 51 anom ngă ƀong hrŏm pơtruh pơkra hăng ba sĭ gơnam hăng anom bơwih ƀong. Hơdôm hơbô̆ bruă pơtruh nao rai ngă gêh gal prong biă kơ Anom ngă ƀong hrŏm amăng bruă plai ƀiă huač prăk, pơkra prong, gơnam dưm kơnar, klă, ngă bruă hơđong hăng hơmâo anih blơi sĭ hơđong.

Tui hăng ơi Huỳnh Bài, Khua khul pơlir hơbit ngă ƀong hrŏm tơring čar Dak Lăk, kiăng pơtruh nao rai hơdôm anom ngă ƀong hrŏm hăng anom bơwih ƀong sĭ mơdrô, amăng hơdôm thun rơgao, Khul pơlir hơbit anom ngă ƀong hrŏm pơtrut tui bruă pơtô, djru ba, amăng anun hơmâo bruă pơtô pơjuăt, pơtô bruă mă kơ ƀing khua, mơnuih amăng Anom ngă ƀong hrŏm, pơtô kiăng thâo git gai, wai lăng bruă, čih hră pơ-ar tuh pơ alin, čih pơkra hơdră ngă bruă, sĭ mơdrô, jŭ yap prăk kăk, wai lăng djŏp bruă...đah mơ̆ng pơđĭ tui mơnuih mă bruă rơgơi kơ anom ngă ƀong hrŏm. Laih dong, ngă hrŏm pơphun lu bruă djru pơtrut sĭ mơdrô, pok prong anih sĭ mơdrô hluai tui bruă ba gơnam mơ̆ng anom ngă ƀong hrŏm sĭ pơ mông jơnum ngui sang čơ, pơdă gơnam amăng hăng gah rơngiao tơring čar.