Ơi Hà Văn Mừng, plơi Lũng Vân, să Ia Lâu, tơring glông Čhư̆ Prong phrâo koh drôm abih ha mơkrah đang boh ñông gơñu amăng 3 hektar (ha). Lu thun ngă bruă tong ten hăng pơjeh phun pla anai yua tŭ añ amăng kual lŏn khăng khăi, rơga čuah, pơđiă hang ơi Mừng ăt khin mơ̆n hơdai tơngan khom koh drôm lui hĭ đôč yơh, samơ̆ 3 thun na nao hăng anai, rơnoh sĭ asar boh ñông trun nua truh mơkrah mơtam, hnong boh ăt hrŏ dŏ glăi 30% đôč anun yơh sang anŏ ƀu anăm bong glăi dơ̆ng tah. Blung hlâo ñu pơmin tơjŭ pơdai hmua kơdư hăng hmua ia pling nao amăng đang boh ñông phrâo koh drôm lui kiăng hơmâo mơnong ƀong huă kơ sang anŏ ƀơ̆i:

“Hơdôm thun hlâo kơ anai, 3 ha hơmâo pơhrui truh 200 klăk prăk. Samơ̆ dơ̆ng mơ̆ng răm hĭ ƀu pơboh ôh 3 thun giăm anai, rơnoh ăt trun hĭ mơ̆n khom koh drôm lui ƀơƀrư̆ yơh. Bơnư̆ pơkong ia plơi Pai hơmâo ia laih, djop bruih kơ 500 ha hmua ia, ta čuk hĭ ngă hmua pơdai hơmâo 8 tơn lơ̆m sa ha".

Bruă koh pơrai hĭ đang boh ñông hơmâo lu anih ngă tui mơ̆n amăng lu să kual giăm guai dêh čar kah hăng ƀơi să Ia Lâu, Ia Ga, Ia Piơr, tơring glông Chư̆ Prong, Gia Lai. Kơnong ƀơi să Ia Piơr, mơ̆ng rơnuč thun 2022 truh ră anai, hơmâo 300 ha đang boh ñông arăng koh lui pơblih pla phun pla pơkŏn ƀiă hrơi blan, kah hăng tơjŭ pơdai, pla hơbơi plum, kơtor....Ơi Bùi Văn Tiến, Khua Jơnum min mơnuih ƀôn sang să Ia Piơr brơi thâo, ră anai, ƀơi să aka ƀu hơmâo hơdră rơđah rơđong pơpă ôh laih anun djru kơ mơnuih ngă hmua amăng bruă pơblih pơjeh djuai phun pla. Bruă ngă hmua pla phun pla ƀiă hrơi blan amăng đơ đam pla boh ñông hlâo adih kiăng pơsir tơlơi tơnap tap ƀơi anăp mơta blung hlâo:

“Tơlơi pơmin mơ̆ng să lĕ jak iâu, pơtô lăi mơnuih ƀôn sang, đơ đam hmua đang boh ñông pơpă ƀu pơboh ôh lĕ koh drôm lui, hơdôm đang dŏ pơboh jor djă lui, wai lăng răk rem klă. Hơdôm đang hmua dăo, kai čuar glăi pla hơbơi plum, pla kơtor....phun pla ƀiă hrơi blan. Dŏ glăi đơ đam hmua pơpă djop ia lĕ pla phun boh troh hăng tơjŭ pơdai”.

Bruă ngă koh drôm lui laih anun pla glăi, pla laih anun koh lui ngă pơđĭ trun nua boh troh gơnam đang hmua hơmâo na nao amăng kual pla pơjing gơnam sĭ mơdrô phun ƀơi Gia Lai kah hăng kơsu, tiu, kơphê,....ră anai hơmâo wơ̆t đang boh ñông dơ̆ng. Tơlơi anai, sa wơ̆t dơ̆ng kiăng anom bruă wai lăng đang hmua khom pơtong rơđah, anăp brơi kơ mơnuih ngă hmua thâo hơdră pla pơjing phun pla hơđong, huăi đĭ trun nua sĭ mơdrô, pơblih pơjeh djuai phun pla djơ̆ lăp, pơgang pioh rơnoh sĭ mơdrô hơđong kơ tơring čar.