Plơi pla bơwih brơi tuai čuă ngui Trà Nhiêu, tơring glông Duy Xuyên ataih mơng plơi prong Hội An kơnong 5 km hăng ataih mơng ƀôn prong Đà Nẵng 30 km. Ƀơi anai hơmâo 10 ektar phun boh đung ia hăng lu plơi pla mơñam pơkra gơnam sô hơđăp.

Ayong Phạm Minh Tâm, pô anih ba hyu tuai čuă ngui hăng song nan Cô Mốt, ƀơi să Duy Vinh, ñu bơwih brơi tuai čuă ngui 7 thun laih, ñu juăt ba hyu tuai čuă ngui jum dar glai boh đông ia, dăng ñuôl mă akan. Amăng bơyan ngă yang, pơdơi prong, ƀơi anai čơkă mơng 50-100 čô tuai, lu hloh lĕ tuai mơng tač rơngiao. Nua duh lơm đĭ hyu song, ƀong huă mơng 200 rơbâo truh 250 rơbâo sa čô. Ayong Phạm Minh Tâm brơi thâo, anih bơwih brơi tuai čuă ngui hơmâo 15 boh song nan, ăt pơhlôm brơi bruă mă kơ lu mơnuih ƀơi anai.

“Tuai nao čuă ngui ƀơi glai phun đung ia hăng song nan. Ƀing gơmơi ăt pŭ brơi gơnam ƀong amăng yang hrơi dong brơi tuai. Ha wŏt ba hyu tuai mơng 6-7 boh song, mơng 14 truh 16 čô, 2 čô tuai đĭ sa boh song nua ñu 100 rơbâo, bơ ƀong huă yang hrơi dong tui hluai ƀing gơñu rơkâo. Čang rơmang tuai nao čuă ngui lu, kơnong kơ kâo pô hăng mơnuih ƀôn sang hur har biă mă yua hơmâo dong prăk pơhrui rĭm hrơi”.

Tuai čuă ngui nao pơ Trà Nhiêu jai hrơi lu tui, ngă gêh gal brơi kơ bruă bơwih brơi tuai čuă ngui, đĭ tui prăk pơhrui, mơnuih ƀôn sang hơmâo dong prăk apah. Ră anai amăng plơi Trà Nhiêu hơmâo mơng 15-20 čô mơnuih mut hrŏm grup čeo song nan kơ ayong Phạm Minh Tâm. Yă Đỗ Thị Sáng, mơnuih ƀôn sang dŏ amăng plơi Trà Đông, să Duy Vinh brơi thâo, hlâo anun ngă hmua kơnong djop yua rĭm hrơi đôč. Mơng hrơi amăng plơi bơwih brơi tuai čuă ngui, ñu mut hrŏm grup čeo song nan, dưi pơhrui hơdôm rơtuh prăk amăng ha hrơi.

“Ƀing gơmơi amăng grup čeo song na ba hyu tuai čuă ngui jum dar glai boh đông ia hăng trah jal mă akan, đa hrơi hơmâo lu tuai biă mă. Ngă kơ tuai čuă ngui hăng mơnuih ƀôn sang hok mơ-ak biă mă, hăng hơmâo dong prăk pơhrui rĭm hrơi”.

Dua rơkơi bơnai yă Trần Thị Xì hăng ơi Trần Văn Hùng dŏ amăng plơi Trà Đông, să Duy Vinh pơdong anih ƀong huă lĕ anih čơkă tuai čuă ngui. Tuai nao pơ anai, dưi ƀong huă hơdôm gơnam ƀong jơman anun lĕ mi Quảng, asơi añăm mơnŭ, ƀañ kuấn…Dua rơkơi bơnai yă Xì ăt pơkra lu gơnam pioh sĭ tuai, anai gơnam pơkra mơng kram hăng lu gơnam pơkra rai anun lĕ apui kơđen pit, apui kơđen hruh, kơƀang grê…kiăng sĭ brơi kơ tuai. Yă Xì brơi thâo:

“Hlâo anun ngă hmua tơlơi hơdip tơnap tap biă mă, ră anai sang anŏ hơdai nao bơwih brơi tuai čuă ngui, tơlơi hơdip jai hrơi jơnap tui. Amăng hơdôm blan hơmâo lu tuai čuă ngui pơhrui glăi hơdôm hơpluh klăk. Ƀing gơmơi kơnong tơbă hơbai gơnam ƀong huă pŭ brơi tuai, bơ rơkơi kâo mơñam gơnam mơng kram pioh sĭ brơi kơ tuai hăng ba hyu tuai čuă ngui”.

Amăng plơi bơwih brơi tuai čuă ngui Trà Nhiêu hơmâo 5 boh sang anŏ bơwih  brơi tuai čuă ngui. Amăng plơi Trà Nhiêu glăk pơđĭ kyar lu bruă mă bơwih brơi tuai čuă ngui anun lĕ: trah jal, dăng ñuôl amăng ia krông, mơñam rêu rô, kŏng tơpai. Thun 2010, plơi bơwih brơi tuai čuă amăng plơi Trà Nhiêu akŏ pơdong, mơng anun truh ră âni pok rai tơlơi dưi brơi mơnuih pơđĭ kyar bơwih brơi tuai čuă ngui. Ơi Nguyễn Sáu, Khua Jơnum min mơnuih ƀôn sang să Duy Vinh, tơring glông Duy Xuyên brơi thâo, lu sang anŏ hlâo anun tơnap tap ră anai dưi hrưn đĭ pơdrong asah.

“Ƀing gơmơi čang rơmang bruă bơwih brơi tuai čuă ngui amăng plơi pla pơđĭ kyar kiăng pơplih bruă bơwih ƀong huă, hơmâo dong bruă mă. Amăng plơi pla hơmâo 5 boh sang anñ pơdong anih bơwih brơi tuai, hơmâo prăk pơhrui, ĕp brơi bruă mă hăng tơlơi hơdip jai hrơi hrưn đĭ. Bruă bơwih brơi tuai čuă ngui ngă pơđĭ kyar bơwih ƀong huă. Čang rơmang plơi bơwih brơi tuai čuă ngui amăng plơi Trà Nhiêu hơmâo gong gai đing nao tuh pơ alin man pơdong anih čơkă tuai hăng hơdôm anih pơdă prưng gơnam sĭ brơi tuai mơng ƀon lan kiăng pơhưč hăng črâo brơi mơnuih ƀôn sang thâo rơđah dong amăng bruă bơwih brơi tuai čuă ngui”.

Ră anai, bruă bơwih brơi tuai čuă ngui amăng plơi pla hăng pơ đang hmua glăk pơđĭ kyar kơtang biă mă amăng hơdôm boh ƀon lan amăng tơring čar Quảng Nam. Lu anih hơmâo akŏ pơjing grup ngă hrŏm, anom bơwih ƀong hrŏm bơwih brơi tuai čuă ngui amăng plơi pla. Ơi Hồ Quảng Bửu, Kơ-iăng khua Jơnum min mơnuih ƀôn sang tơring čar Quảng Nam brơi thâo, tơring čar hơmâo lu hơdră djru brơi mơnuih ƀôn sang bơwih brơi tuai čuă ngui, pơtop hrăm brơi, ba neh met wa hyu čuă lăng, hrăm tui hơdôm boh plơi pla pơkŏn. Hơdôm hơbô̆ bruă bơwih brơi tuai čuă ngui anai ƀu djơ̆ kơnong pơgôp ngă lu tui gơnam bơwih brơi tuai, pơđĭ kyar bơwih ƀong huă đôč ôh mơ̆ ăt pơlir hăng lăi pơthâo gru grua.

“Ră anai, tơring čar pơsur pơđĭ kyar hơbô̆ bruă bơwih brơi tuai čuă ngui amăng plơi pla, hơdôm plơi pơkra gơnam hăng čuă ngui ƀơi ƀon lan. Ƀing gơmơi hơmâo lu tơlơi črâo ba hơdôm ƀon lan, anun lĕ gum djru hăng lu hơdră, djru bơwih brơi tuai čuă ngui amăng plơi pla ƀon lan pơlir hăng hơdôm anih čuă ngui hơmâo Hội An, Mỹ Sơn hăng čuă ngui ter hang ia rơsĭ ƀơi Quảng Nam. Ƀing gơmơi čang rơmang dưi pơđĭ kyar bơwih brơi tuai čuă ngui amăng plơi pla pơlir nao rai, ba glăi tơlơi dưi brơi kơ ƀing bơwih brơi tuai čuă ngui amăng plơi pla kah hăng bruă bơwih brơi tuai čuă ngui amăng mơnuih mơnam”./.