Mơnuih ruah khua tơring čar Long An rơkâo kơ Ding jum Bruă hmua hăng pơđĭ kyar plơi pla, Ding jum kông ngăn lŏn mơnai ayuh hyiăng ăt kah hăng hơdôm ding jum, anom bruă pơdjơ̆ nao ăt đing nao kơ tơlơi ia mơsin hram ƀơi hmua dơnao djop tơring čar gah dơnung. Mơ̆ng anun, kiăng hơmâo tơlơi djru ba, đing nao lu hloh tong ten kơ bruă anai. Amăng bruă mă ngă ƀong hrŏm pơlir hơbit lu mơnuih, lu khul tơring čar Long An brơi thâo, tơring čar anai hlă akŏ pơdong bruă ngă hmua lir hơbit ta juăt lăi ngă ƀong hrŏm mơ̆ng bruă pla pơjing truh kơ pĕ pơhrui kiăng hơmâo boh troh hơdjă, rơgoh, sĭ mơdrô amuñ arăng blơi.

 Mah hnun, khul apăn bruă amăng sang bruă ngă ƀong hrŏm dŏ tơdu aka ƀu kơtang đơi ôh, yua kơ ƀing ngă khua lĕ mơnuih ƀôn sang amăng plơi pla, lu mơnuih ngă hmua đôč, anun bruă pơđĭ kyar aka ƀu lăp hăng anŏ gêh găl ôh. Tui anun, djop ding jum, anom bruă ƀơi dêh čar, boh nik ñu Ding jum bruă hmua hăng pơđĭ kyar plơi pla kiăng hơmâo lu hơdră rơđah rơđong hloh kơ bruă djru sang bruă ngă ƀong hrŏm hrưn đĭ kiăng jing ƀing ba akŏ kơ glông bruă bơwih ƀong huă ngă hmua, kah hăng boh yôm phun Hră pơtrun mrô 150 mơ̆ng Kơnuk kơna pơtrun, khom pơblih tơlơi pơmin mơ̆ng bruă ngă hmua jing bruă bơwih ƀing huă mơ̆ng bruă ngă hmua.

Amăng bruă pơđĭ kyar ngă hmua, ơi Lê Văn Nam, mơnuih ruah khua ƀơi Bến Lức, tơring čar Long An lăi lĕ, kiăng biă mă ñu tơlơi pơhing hmao kru pơthâo kơ anih anom sĭ mơdrô amăng dêh čar hăng jar kmar. Kơnôl ƀuh rơđah ƀơ tơring čar, tui hăng ơi Nam lăi, tơring glông Bến Lức hơmâo 100.000 ha đang boh kruăi ƀu hơmâo asar pơjeh. Bruă mă sĭ mơdrô hăng tač rơngiao, akŏ pơjing bruă mă ba gru hlâo, sĭ mơdrô pơ kual Mi kô̆ hăng Trung Đông. Samơ̆ anom bruă ngă ƀong hrŏm hyu blơi kơnong tui rơnoh bruă pơkra ming jăng jai....ƀu hơmâo măi mok mă bruă hơđong ôh anun yơh mơnuih ngă hmua tơnap pơkă nua, rơnoh sĭ mơdrô:

“Anai yơh tơlơi dŏ kơƀah prong. Yua kơ anun, mơnuih ruah khua ƀơi Long An ăt čang rơmang dưi hơmâo tơlơi pơhing pơthâo brơi hmar hmao kru đah mơ̆ng thâo anŏ kiăng mơ̆ng anom sĭ mơdrô rơngiao kơ tơlơi pơthâo anun. Mơ̆ng anun, mơnuih ƀôn sang dưi prăp hlâo gơnam sĭ mơdrô ba nao pơ dêh čar tač rơngiao, bưp arăng hăng sĭ mơdrô djơ̆ rơnoh pơkă kơ boh troh đang hmua”.

Amăng bruă pơđĭ kyar ngă hmua plơi prong phrâo hăng lu hơbô̆ bruă ngă hmua hơmâo ba yua boh thâo ia rơgơi kiăng lu prăk kăk tuh pơalin. Sang bruă sĭ mơdrô amăng bruă ngă hmua pla pơjing kiăng djru čan prăk kơmlai ƀiă tui hăng kơčăo bruă pơprong mơ̆ng plơi prong. Djop sang bruă ngă ƀong hrŏm gah đang hmua, pô ngă hmua blôk prong ăt kiăng djru ba rơnoh prăk čan kơmlai rơgêh đah mơ̆ng dưi pơblih pơjeh phun pla hơmâo rơnoh ƀiă, pơphun bruă čem rông hlô mơnong amăng anet hăng man ƀrô.

Ƀôn prong Hồ Chí Minh pơkă tơhnal pơtrun pơjing ruăi pơtruh brơi mơnuih ngă hmua, anom bruă ngă ƀong hrŏm hăng sang bruă sĭ mơdrô tui hơdră logistics pơčrâo anih ngă hmua. Glông bruă anai kiăng pơđĭ kyar bruă sĭ mơdrô, blơi boh troh gơnam đang hmua bơwih brơi kơ bruă hmua kah hăng: Gơnam ngă hmua, hơbâo, kmơ̆k pruai, ia jrao pơgang phun pla, hơbâo pruai pơkra ming mơ̆ng djah djâo mơ̆ng ƀôn prong Hồ Chí Minh hăng hơdôm tơring čar pơkŏn....Anăp ngă bruă anai, djru kơ mơnuih ngă hmua, bruă ngă hmua ƀơi ƀôn prong HCM hăng hơdôm tơring čar gah dơnung gêh găl hloh. Khă hnun, kiăng pơđĭ kyar hloh bruă ngă hmua amăng plơi prong kiăng akŏ pơjing ring bruă pioh kơ ngă hmua, tơlơi anai dŏ gun hĭ lu tơlơi pơtrun mơ̆ ƀôn prong HCM aka dưi pơsir ôh. Ơi Võ Hoàng Vũ, mơnuih ruah khua să Hưng Long, tơring glông Bình Khánh, ƀôn prong HCM rơkâo:

“Mơuih ƀôn sang rơkâo kiăng man pơdong ring bruă jăng jai amăng lŏn ngă hmua, bơwih brơi bruă nga whmua, ba yua boh thâo ia rơgơi, kah hăng pơdong hơjai prong dưm gơnam ngă hmua, pơdong sang hñôl....hơdră ngă anai dŏ gun lu tơlơi phiăn pơkă, ngă hră pơar man pơdong, ƀơi anŏ hŭi bơbeč djơ̆ ngă soh bruă man pơdong ƀu găl tơlơi phiăn. Yua kơ anun, bruă pơtrut ngă hmua tui plơi prong bưp lu tơlơi tơnap tap. čang rơmang Ding jum ngă hmua hăng pơđĭ kyar plơi pla hăng hơdôm anom bruă pơdjơ̆ nao hơmâo hơdră pơsir djru kơ mơnuih ngă hmua tañ pok pơhai tuh pơ alin hơđong bơwih ƀong huă pơ anăp adih”.

Ƀơi mông lăi glăi tơlơi tơña tlam lơ 6/11, Khua ding jum ngă hmua hăng pơđĭ kyar plơi pla ơi Lê Minh Hoan lăi lĕ, lu sang anŏ mơnuih ƀôn sang pla kyâo glai kual 2, kual 3 hơdôm să tơnap tap hloh, gah plơi pla mơnuih ƀôn sang djuai ƀiă hăng čư̆ siăng, rơđah biă ñu ƀơi tơring čar Bắc Kạn laih anun hơdôm tơring čar hơmâo glai klô, djơ̆ biă ñu tŭ mă prăk pơgang glai rưng kơnuk kơna jao wai lăng, pơgang glai mơ̆ng thun 2021, samơ̆ truh ră anai aka ƀu tŭ mă prăk ôh. Hrŏm hăng anun, Ding jum ăt rơkâo đĭ čih pơkra glăi 31 tơhnal pơkă plơi pla phrâo djơ̆ găl hăng hơdôm anŏ phara hơjăn kual tơnap tap hloh.