Ayong Phạm Đức Dậu dŏ ƀơi phường Đoàn Kết lĕ mơnuih ba jơlan hlâo rŭ ba glăi phun Đào Nhật Tân mơng Hà Nội nao pla pơ Buôn Hồ, Dak Lak sui mơng anai giăm 10 thun laih. Bơyan pla thun anai, sang anŏ ñu hơmâo 800 phun đào, him lăng sĭ mơdrô 400-600 rơbâo sa phun. Tui ayong Dậu, pla đào huăi tơnap ôh, samơ̆ kiăng wai lăng tong ten. Kiăng ñu bluh bơnga krep bơyan čơkă thun phrâo lĕ ăt kiăng pơkă brơi kơ ten, pơhlôm uh pơđao, pruai kmơk lăp djơ̆ hăng pơgang hlăt mŏt pơčrăm ƀơi hla dong:

“Lŏn mriah ƀơi kual Dap kơdư ñu amuñ, huăi khăng kar hăng pla pơ kual kơdư, yua anun phun đào bluh đĭ hiam biă mă. Ƀing gơmơi kơnong pơhlôm brơi kmơk, ia jrao pruih pơgang, anăm brơi hlăt mŏt pơčrăm, tơlơi anai amra ngă phun đào bluh bơnga lu hăng hiam biă mă. Ayuh hyiăng tui ră anai, bơnga amra bluh lu, hiam, mơnuih pla amra hơmâo lu dong prăk pơhrui kơ sang anŏ amăng bơyan čơkă thun phrâo anai.

Ñu lĕ mơnuih rai mơng tơring čar Hà Tây hơđăp hăng nao dŏ hơdip pơ tơring glông Krông Pač bơwih ƀong huă sui mơng anai rơbêh 10 thun laih, ayong Nguyễn Văn Tâm brơi thâo, rĭm thun lêng kơ blơi phun đào ba glăi ngui bơyan čơkă thun phrâo. Phun đào ƀơi anai hiam bơkơnar hăng đào pơ kual kơdư adih, hăng bơnga bluh dua, lăng mriah, than hiam mơn, mơ̆ nua sĭ ăt gap ƀrô.

“Nua đào ƀơi plơi prong Buôn Hồ gap ƀrô đôč, rơgêh hăng hiam dong. Bơnga bluh krep hrơi thun phrâo kiăng neh met wa ngui tết, yua anun kâo rai blơi. Pơhmu hăng đào pơ hơdôm tơring čar kual kơdư, phun đào ƀơi anai ăt hiam bơkơnar mơn”.

Ră anai, ƀơi plơi prong Buồn Hồ hơmâo 36 boh sang anŏ pla phun đào hăng hơmâo pơlir hơbit anom bơwih ƀong hrŏm, hăng abih tih lŏn pla rơbêh 17 ektar. Hơdôm đang pla bơnga thun anai him lăng ba sĭ mơdrô mơng 18.000-20.000 phun Đào Nhật Tân, Đào Bích, Đào Phai hăng Đào Tuyết. Tui ơi Nguyễn Văn Thắng-Khua anom bơwih ƀong hrŏm sĭ mơdrô hăng bơwih bơwang Hoa đào Đoàn Kết, phun đào Buôn Hồ ră anai hơmâo tŭ yap OCOP 3 asar pơtŭ hăng glăk gir run đĭ 4 asar pơtŭ kiăng anăp nao sĭ mơdrô pơ tač rơngiao:

“Anom bơwih ƀong hrŏm hơmâo kĭ pơkôl jak iâu ƀing rơgơi kơhnâo hloh nao djru brơi ƀing ding kơna bơwih brơi klă hloh hơdôm phun đào sui thun kiăng kơ djơ̆ hơnong pơkă ba sĭ mơdrô pơ tač rơngiao, hăng lăi pơthâo ƀơi hơdôm anih anom amăng jar kmar. Anom bơwih ƀong hrŏm amra jao glăi boh thâo, pơjeh brơi neh met wa hơdôm boh tơring čar pơkŏn hăng tơring čar Dak Lak, mah hlơi hlơi kiăng lêng kơ djru brơi pơhlôm đĭ tui prăk pơhrui”.

Amăng hrơi pơphun pla kyâo “Hơdor na nao wa Hồ” thun 2023 amăng plơi prong Buôn Hồ (Dak Lak) hơmâo pla 400 phun đào kiăng ngă hiam rôk ară jơlan amăng phường. Tui tơlơi sit nik amăng ƀon lan brơi ƀuh, ƀơi anai hơmâo tơlơi gal kơ ayuh hyiăng, lŏn mơnai hăng lăp djơ̆ hăng briă pla phun đào. Tơlơi anai ăt pơdah rơđah hơmâo lu sang anŏ amăng plơi prong Buôn Hồ pla hăng ƀơƀrư̆ ngă pơdrong asah yua kơ pla phun đào amăng bơyan čơkă thun phrâo anai.

Ơi Đặng Gia Duẩn- Khua Jơnum min mơnuih ƀôn sang plơi prong Buôn Hồ brơi thâo, mơng tơlơi sit nik amăng ƀon lan brơi ƀuh, ƀơi anai hơmâo tơlơi gal mơng ayuh hyiăng, lŏn mơnai hăng lăp djơ̆ hăng bruă pla phun đào. Anai lĕ hơmâo lu sang anŏ amăng plơi prong Buôn Hồ pla hăng ƀơƀrư̆ ngă pơdrong asah mơng bruă pla bơnga đào sĭ amăng bơyan tết anai. Yua anun, bruă pơphun pla giăm 400 phun bơnga đào amra pok rai rơwang phrâo, pok jơlan bơwih ƀong phrâo brơi mơnuih ƀôn sang. Buôn Hồ amra hơmâo sa ară jơlan bơnga đào, sa anih phĭn rup amăng bơyan ngui tết anai. Lơm anun, neh met wa amra hơmâo lu anŏ pơtrut, tơlơi gal kiăng pok prong lŏn pla. Anai lĕ akŏ phun kiăng pơjing bơnga đào Buôn Hồ jing gơnam tui OCOP hăng hơmâo anăn apăn sĭ mơdrô phara, pơgôp djru brơi plơi prong hơmâo ƀiă biă mă ñu 10 gơnam OCOP amăng thun 2025.

Pơ anăp anai, lơm hơmâo djop tơlơi gal, plơi prong Buôn Hồ amra pơphun “hrơi ngui bơnga đào”, anăp nao “Jơnum ngui bơnga đào Buôn Hồ” kiăng pơhưč tuh pơ alin hăng pơđĭ kyar tuai čuă ngui amăng plơi prong pơ anăp anai. Tơlơi yôm ƀiă lĕ, bruă pơđĭ kyar phun bơnga đào amra ba glăi tơlơi yôm phara mơng kual lŏn hiam anai./.