Bruă ngă anai ba glăi boh tŭ yua lu amăng bruă ngă hmua rah pơdai, pla hơbơi čên, pơboh lu; laih dơ̆ng dưi pơkrem ia bruih, kmơ̆k, hơbâo pruai; boh nik ñu dưi pơkrem pran jua mơnuih mă bruă, hrơi blan hăng pơgang tơlơi suaih pral kơ ană mơnuih.

Plah rơwang amăng blan 6, amăng đang hơbơi čên prong rơhaih 10 ha ƀơi să Ƀuôn Triă, tơring glông Lăk, ơi Phạm Đăng Xuân hlăk kơtit măi mơgăt mơ̆ng taih, măi rơdêh por anăn Drone pioh bruih ia kơ đang hơbơi čên hlăk pơđĭ prong hơbơi. Ñu lăi, rĭm hrơi, rơdêh por ñu anai mă bruă mơ̆ng 8-10 mông mơtam, bruih brơi mơ̆ng 25-30 ha hmua đang phun pla. Bruă ba yua măi anai amuñ mơ̆n, kơnong ƀôp ia bă gêt kơthung prong amăng rơdêh por, lŭk hơbâo kmơ̆k pơkra mơ̆ng djah djâo, pơdưm anŏ pơkă hnong pơčrâo anih či nao ƀơi măi anun, gư̆ măi dar laih anun pơpor đĭ hyu bruih hơbâo kmơ̆k yơh:

“Rơdêh ƀudah măi thâo por ƀu tơguan mơnuih mơgăt anai, gơmơi pruih hơbâo pruai hăng ia lŭk kmơ̆k gêh găl biă, huăi huač pran mơnuih mă bruă, hlâo adih dua čô mơnuih nao bruih hơbâo ƀudah ia jrao amăng sa hektar mơkrah hrơi kah giong. Măi phrâo rơgơi anai klă biă. Gơmơi ba yua măi bruih hơbâo pruai thâo por anai pruih đang hơbơi čên hiam biă mă, klă mơ̆n”.

Anŏ gêh găl kơ ñu hơmâo blơi măi thâo por ƀudah rơdêh por ƀu tơguan mơnuih mơgăt anai, arăng pơkra ming pioh kơ bruă ngă hmua, ba yua ƀơi tơring glông Lăk dŏ kơtuă mơ̆n hnang blung. Ơi Cao Xuân Phương-Khua anom bruă ngă ƀong hrŏm ngă hmua HTX Thành Tín, să Dak Nuê, tơring glông Lăk, brơi thâo, hơdôm thun hlâo kơ anun, tơdơi kơ hyu ĕp lăng hơdră bruih ia jrao pơgang phun pla yua măi thâo por anai arăng ba yua ƀơi tơring glông Đức Trọng, tơring čar Lâm Đồng, ñu rơkâo blơi 2 boh mơtam mơ̆ng Cần Thơ ba glăi yua. Blung a, anom ngă ƀong hrŏm ruah 2 čô tơdăm hlăk ai beč bal hloh, amăng anun hơmâo ơi Xuân, brơi nao pơ anih sĭ măi adih, kiăng hrăm hơdră ba yua ñu. Lơ̆m mă yua măi por ƀu hơmâo mơnuih mơgăt anai pioh wai lăng phun pla ƀuh tŭ yua biă mă:

“Rơgao 2 thun ba yua pơ anai, gơmơi ƀuh pơhrŏ rơnoh prăk tuh pơ alin truh 30% hăng ia jrao pơgang phun pla , pruih ia kơmơ̆k; tơdah mơnuih ƀôn sang mă bruă hăng tơkai tơngan lĕ rơngiă mơ̆ng 40-50% hrơi mông mă bruă. Yua kơ rơdêh por bruih ia jrao, dưm ia jrao lŭk hăng ia anai lĕ bruih bơbruih kơ phun pla laih anun hrip mă ia jrao amăng hla, yua kơ anun huăi huač ia jrao, ia bruih lu ôh laih anun huăi bơbeč truh kơ tơlơi suaih pral ană mơnuih lơi”.

Anom ngă ƀong hrŏm đang hmua Thành Tín să Dak Nuê, tơring glông Lăk hơmâo giăm 100 boh sang anŏ ngă ding kơna, pla rơbêh 130 ha đang hơbơi čên, giăm 700 ha hmua pơdai ia. Ba yua boh thâo ia rơgơi anai, hơmâo rơdêh por ƀu hơmâo mơnuih mơgăt lĕ ngă hmua, bruih ia, bruih ia jrao, kmơ̆k pruai tŭ yua biă mă. Hơbơi čên mơ̆ng anom ngă ƀong hrŏm gơñu arăng pơpha brơi gru mrô pơkă anih pla rơđah rơđong, pioh pơsit ba sĭ mơdrô pơ dêh čar Khač kiăng arăng mơ̆ng đăo kơnang sit nik hăng blơi lu. Mơ̆ng boh tŭ yua ƀuh rơđah tui anun, phrâo anai, Anom ngă ƀong hrŏm hơmâo Thành Tín hơmâo blơi 2 boh rơdêh por ƀu hơmâo mơnuih mơgăt blung a hăng djuai phrâo rơgơi hloh, ba glăi ngă bruă wai lăng phun pla, lơ̆m sa boh măi anun rơnoh blơi 250 klăk prăk.