Mă yua boh thâo phrâo amăng đang sâu riêng, ơi Lê Văn Thành ƀơi să Ea Yông, tơring glông Krông Pač, tơring čar Dak Lăk ƀu bơngơ̆t dong tah kơ ia pruih hơdôm pă kiăng djŏp, kmơk pruai hrơi pơpă, ƀudah hơdôm hrơi ƀu hơmâo wan či nao čuă đang. Mông anai, ñu hơđong pran jua yua abih bang mrô pơkă lŏn djrưh, mrô ia kiăng pruih, hrơi ngă hmua...lêng kơ hơmâo măi rơgơi čih pioh hăng lăi pơthâo amăng telephôn.

Ơi Lê Văn Thành lăi, ñu dưi krăp lăng hyuh adai hăng gư̆ măi pruih mơ̆ng ataih, đang sâu riêng rơbêh 3 ha lêng kơ mơtah mơda, mah adai ƀu lăp:“Hơmâo boh thâo anai mơnuih ngă hmua ngă bruă amuñ, hơmâo măi anai ta thâo amăng lăm lŏn ñu kơƀah hơget, ta kiăng pruai kmơk hơget, hơmâo djŏp ia hă ƀô̆ đah mơ̆ng ngă hmua lăp djơ̆ hloh”.

Bơ yă Hroda Ayun ƀơi să Ea Kênh, tơring glông Krông Pač brơi thâo, lơ̆m kiăng phun pla mơboh lu hăng klă hloh, mơnuih ngă hmua khŏm pơplih đah mơ̆ng dưi hơdip tui tơlơi pơplih ră anai. Sang anŏ ñu pơplih mơ̆ng bruă ngă kơphê tui hơđăp jing ngă kơphê rơgơi. Bruă pơkra gơnam hơmâo măi mok ngă mă hơjăn: đing pruih ia tơdjoh, pruai kmơk mă hơjăn, măi pơčrang hăng pơ-iă yang hrơi...djru ñu plai ƀiă rơngiă mông wai lăng, rông phun pla, plai ƀiă mrô ia pruih, kmơk pruai, gơnam tam blơi aset ƀiă mơn.

Tui hăng yă Hroda Ayun, mah prăk blơi măi mok blung a pơmă biă, samơ̆ ñu gêh gal biă mă, biă ñu amăng hrơi mông kiăng pơkra gơnam mơtah mơda - blơi gơnam hơdjă tui hăng ră anai:“Bruă ngă kơphê rơgơi ƀu kơnong djru plai ƀiă ayuh hơƀak mơ̆ng sang mơnil ngă đôč ôh mơ̆ ăt pơgang ba lŏn, ia hăng ayuh hyiăng anih hơdip. Mơnuih ngă hmua ăt pơhrui gơnam lu đôč ôh mơ̆ ăt pơgang ba tơlơi suaih pral mơ̆ng pô wơ̆t hăng mơnuih tơpuôl”.

Lăi nao anih prong hloh, Anom ngă ƀong hrŏm Bơwih brơi bruă ngă hmua hơdjă tơring glông Krông Pač, tơring čar Dak Lăk hơmâo mă yua boh thâo mrô amăng rơbêh 200 ha sâu riêng VietGAP. Ơi Mai Đình Thọ, Khua khul wai lăng Anom ngă ƀong hrŏm brơi thâo, bruă ngă hrŏm mă yua boh thâo mrô ƀu kơnong pơđĭ tui nua gơnam đôč ôh mơ̆ ăt pơjing nua phrâo kơ sâu riêng mơ̆ng bruă pơƀuh rơđah akŏ tlôn bruă pơkra gơnam. Pơ anăp, Anom ngă ƀong hrŏm amra tĕp mrô QR kơ rim blah đang či wai lăng ƀơi boh thâo mrô, djru čih pơthâo, ĕp ƀuh anih pơkra, hăng thâo krăn rim phun sâu riêng. Mơ̆ng anun, ƀrô ngă kơ mơnuih blơi hơđong pran jua, ƀrô pơđĭ tui anŏ yôm mơ̆ng gơnam.

Ơi Mai Đình Thọ brơi thâo:“Boh thâo mrô djru djŏp tơlơi pơhing jing rơđah hloh. Rim blah đang, rim phun kyâo lêng kơ hơmâo anăn phara, dưi ĕp ƀuh bruă wai lăng, hrơi pla...Mơnuih blơi thâo krăn mơn gơnam klă hă ƀu klă. Hơdôm anom bruă wai lăng ăt amuñ krăp lăng mơn”.

Bruă ngă hmua ră anai ăt jing bruă phun mơn, hơmâo 1/3 mrô bơwih ƀong ƀơi Dak Lăk. Yua hnun, bruă ngă hmua tơring čar prăp rơmet pôr pơthâo, djru bruă ngă hmua hăng anom bơwih ƀong dưi mă yua boh thâo mrô amăng bruă ngă hmua, sĭ mơdrô, ba sĭ gơnam. Truh ră anai, lu mơnuih ngă hmua mă yua hơdră ngă hmua phrâo, pơđĭ tui tơlơi rơgơi wai lăng hăng krăp lăng bruă pơkra. Hăng bruă sĭ mơdrô, lu gơnam OCOP hăng gơnam mơ̆ng hmua hmư̆ hing hơmâo ba sĭ amăng glông sĭ mơdrô điện tử ƀudah amăng plang internet či pơƀuh hyu, ba sĭ.

Kiăng pơtrut tui boh tŭ yua boh thâo mrô amăng bruă ngă hmua, ơi Nguyễn Thiên Văn, Kơ-iăng khua jơnum min mơnuih ƀôn sang tơring čar Dak Lăk brơi thâo:“Tơring čar glăk pơphun ngă hơdôm kơčăo bruă gum djru, amăng anun hơmâo mă yua boh thâo yôm, pơplih boh thâo mrô amăng bruă akŏ pơjing anăn hmư̆ hing, akŏ pơjing mrô kual pla hăng mrô grek gai, mă yua boh thâo mrô. Mơ̆ng anun djru anăn gơnam mơ̆ng hmua ƀơi Dak Lăk yôm hloh, ba glăi tơlơi klă kơ mơnuih ngă hmua hăng anom bơwih ƀong”.

Pơplih boh thâo mrô glăk pơsit tơlơi yôm phun amăng bruă pơđĭ tui anŏ yôm gơnam mơ̆ng hmua, pok prong anih sĭ blơi gơnam hăng pơtrut đĭ kyar bơwih ƀong plơi pla ƀơi Dak Lăk. Tơlơi ngă hrŏm kơplah wah gong gai, anom bơwih ƀong hăng mơnuih ƀôn sang amra jing tơlơi phun či akŏ pơdong sa kual ngă hmua phrâo, hơđong hăng mut hrŏm dlăm hloh./.