Sang anŏ amai Lê Thị Thắm, amăng phường Chiềng Cơi, plơi prong Sơn La ră anai glăk pla giăm 2 ektar đang añăm. Tơdah hlâo anun amai Thắm juăt mơng mơguah sing bring ba añăm tam nao pơ sang čơ sĭ, nua ăt rơgêh dong, samơ̆ dong mơng hrơi mut hrŏm anom bơwih ƀong hrŏm gah Ngă hmua mơtah 26-3 ƀơi plơi prong Sơn La, añăm tam ñu pla lêng hơmâo anom bơwih ƀong hrŏm blơi abih hăng nua hơđong. Mơng đang pla añăm lŏn hiam dưi pla lu añăm tam hơdjă, rĭm boh sang anŏ ăt dưi pơhrui glăi giăm 200 klăk prăk.

“Dong mơng hrơi mut hrŏm anom bơwih ƀong hrŏm, añăm tam mơng sang anŏ pla jai lu tui hăng dưi ba sĭ mơdrô hơđong, ƀu kiăng ba nao tơl sang čơ, nua sĭ hơmâo dua bơnah pơkôl lui hlâo, yua nua sĭ hơđong anun ƀing gơmơi ăt pơhlôm brơi añăm tam ba nao sĭ djơ̆ hăng tơlơi pơkă mơng anom bơwih ƀong hrŏm.

Tơdơi kơ 8 thun mut hrŏm sĭ mơdrô gơnam đang hmua hơdjă, anom bơwih ƀong hrŏm gah Ngă hmua mơtah 26-3 lĕ anom bruă arăng đăo gơnang mơng pla pơjing hăng blơi pơhrui gơnam đang hmua hơdjă ƀơi Sơn La. Ƀu djơ̆ kơnong djru pla pơjing, blơi pơhrui gơnam đang hmua hơdjă brơi 12 čô ding kơna hăng hơdôm boh sang anŏ pơlir hơbit, anai ăt lĕ anom bruă črâo brơi boh thâo, djru brơi mơnuih ƀôn sang pơplih tơlơi pơmĭn, bruă mă amăng ngă hmua. Ayong Trần Mạnh Hùng, dŏ amăng plơi Nong Nái, să Chiềng Mung, tơring glông Mai Sơn brơi thâo:

“Hlâo adih kâo pla pơtơi, pơhrui glăi 5 klăk prăk rĭm blan, ră anai pla añăm tam giăm 2 ektar dưi pơhrui glăi 7 klăk prăk rĭm blan, mơng blan 6 thun hlâo kâo hơmâo pơlir hơbit hăng anom bơwih ƀong hrŏm, ăt ƀuh ba glăi tŭ yua amăng bơwih ƀong huă. Anom bơwih ƀong hrŏm djru brơi pơjeh phun pla, kmơk hăng boh thâo pla pơjing”.

Hăng kual pla añăm rơbêh 13 ektar, rĭm blan anom bơwih ƀong hrŏm 26-3 ba hyu sĭ mơng 30-40 tơ̆n añăm, hơbơi pơtơi djop mơta. Kiăng blơi pơhrui abih gơnam đang hmua, anom bơwih ƀong hrŏm hơmâo ngă hăng glăk tŏ tui pơdă ƀơi 4 anih sĭ mơdrô gơnam mơtah mơda amăng sang čơ 7/11, sang čơ 308 hăng sang čơ Rặng Tếch, plơi prong Sơn La. Tŏ tui kĭ pơkôl sui thun hăng hơdôm anih tơnă hơbai asơi huă añăm ƀong ƀơi sang ia jrao, sang hră; laih dong pok prong hơdôm anih sĭ mơdrô gơnam đang hmua hơdjă tơl hơdôm anih sĭ mơdrô pơprong, sang sĭ mơdrô pơprong amăng kual Kơdư. Hơdôm añăm tam, hơbơi pơtơi hơdjă mơng anom bơwih ƀong hrŏm lêng kơ sĭ nua lu hloh ƀơi hơdôm anih anom sĭ mơdrô mơng 20-30%, yua anun nua gơnam đang hmua ăt đĭ lu ƀiă. Amai Hoàng Thị Thắm, Kơ-iăng khua anom bơwih ƀong hrŏm gah ngă hmua mơtah 26-3 Sơn Lan brơi thâo:

“Bruă blơi pơhrui gơnam hăng anom bơwih ƀong hrŏm, ƀing gơmơi hơmâo hơdră, blung hlâo lĕ amăng plang mơnuih mơnam anun lĕ facebook, zalo hăng hơdôm plang sĭ mơdrô điện tử. Ƀing gơmơi juăt ba sĭ mơdrô amăng plang mơnuih mơnam ăt ba glăi boh tŭ yua hloh, arăng rơkâo blơi gơnam hăng ƀing gơmơi amra ba nao tơl anih, djop mơta lêng kơ gêh gal hăng ngă amuñ biă mă. Tal dua lĕ ƀing gơmơi sĭ gơnam offline ƀơi hơdôm anih sĭ mơdrô ƀơi anăp mơtăm”.

Hăng bruă mă hơdeč hmar, pơčeh phrâo, bruă pơlir hơbit bơwih ƀong sĭ mơdrô ƀu djơ̆ kơnong djru anom bơwih ƀong hrŏm pok prong bơwih ƀong, hơmâo lu tui gơnam đang hmua, mơng gơnam mơtah mơda truh pơ gơnam pơkra rai đôč ôh mơn ăt djru brơi mơnuih ngă hmua dưi sĭ mơdrô gơnam hăng nua hơđong. Sa hơdră bơwih ƀong phrâo dưi akŏ pơjing, ba glăi tơlơi dưi brơi abih bang mơnuih mut hrŏm, mơng anun pơtrut pơđĭ kyar bơwih ƀong huă ngă đang hmua. Ayong Nguyễn Đình Đại, dŏ amăng plơi Thống Nhất, să Chiềng Mung, tơring glông Mai Sơn, tơring čar Sơn La brơi thâo:

“Ră anai ƀing gơmơi pla boh thanh long, añăm hơbơi anung, trong glăk pơlir hăng anom bơwih ƀong hrŏm. Lơm ƀing gơmơi pơlir hơbit, bruă sĭ gơnam đang hmua ăt amuñ mơn, pơhlôm hơđong kjăp ƀiă”.

Ƀơi hơdôm kual plơi pla amăng tơring čar Sơn La, bruă pơlir hơbit bơwih ƀong arăng lăng lăp djơ̆ biă mă, ba glăi boh tŭ yua amăng bruă pơplih bơwih ƀong huă, pơjing hơdră pơlir hơbit amăng bơwih ƀong, hrưn đĭ klă dong gơnam đang hmua, djơ̆ hăng tơlơi kiăng mơng mơnuih blơi yua gơnam./.