Ră anai, lu sang anŏ ƀơi tơring glông Duy Xuyên, tơring čar Quảng Nam hơmâo pơkra ming, rơmet pơagaih jum dar plơi pla, đang hmua jing anih hiam pơhưč tuai čuă ngui laih dong hơmâo dong bruă mă brơi kơ lu mơnuih amăng plơi pla.

Tơdơi kơ glăi mơng hrăm hră pơ dêh čar Japan, amai Trần Thị Ngọc Trang, dŏ amăng să Duy Thành, tơring glông Duy Xuyên dưm dăp, pơkra ming jum dar sang, klơi dơnao, pla phun sup mriah, pơkra tơdrông kram rông akan, pơđĭ kyar bơwih brơi tuai čuă ngui amăng plơi pla. Tuai rai pơ anai dưi hyu lăng dơnao pla sup, čeo song nan amăng dơnao. Hrŏm hăng anun pơphun brơi tuai hyu lăng amăng dơnao pla sup, amai Trần Thị Ngọc Trang pla lu djuai bơnga pơkŏn, dưm dăp jum dar brơi lăp djơ̆, lăng hiam kiăng tuai nao čuă ngui dưi phĭn rup. Amai Trang brơi thâo, ñu ƀu sĭ vĕ mut nao čuă ngui ôh mơ̆ brơi mut nao rai tui hluai, ñu sĭ gơnam ƀong huă hăng ia mơñum đôč. Lơm tuai nao phĭn rup dưi dŏ glăi mơñum ƀong hăng hơdôm gơnam ƀong nua gap ƀrô.

“Tuai rai pơ anai dưi hyu ngui gah yŭ phun đông hăng abih bang dưi čeo song nan amăng dơnao pla sup. Hơbô̆ bruă anai pơhlôm brơi bruă mă, hơmâo dong prăk pơhrui brơi mơnuih ƀon sang”.

Thun 2019, yă Lê Thị Thanh Nga yua apah 2 ektar lŏn arăng lui ruh giăm sang măi pơkra geč hơđăp ƀơi hmua pơdai să Duy Vinh, tơring glông Duy Xuyên kiăng kơ ngă hmua pơdai jŭ tui hơdră ngă hmua hơdjă. Tơdơi kơ yuă hơpuă hmâo hmăi, yă Nga tŏ tui pok prong hmua pơdai đĭ 5 ektar. Rĭm thun, anom bruă anai yuă hơpuă, ba sĭ mơdrô rơbêh 30 tơ̆n pơdai brông hăng sa, dua gơnam pơkra mơng braih anun lĕ: ia tơsâo braih jŭ, tơpai braih jŭ, če braih jŭ. Ƀơi anai, rĭm hrơi pơhưč giăm 200 čô tuai nao čuă ngui. Ƀing tuai nao pơ anai blơi gơnam pơkra mơng braih jŭ, hyu čuă lăng hmua pơdai, pĕ añăm tam hăng tơnă hơbai, ƀong huă ƀơi anun hlao. Yă Lê Thị Thanh Nga brơi thâo, rơngiao kơ bruă ngă hmua pơdai kiăng hơmâo braih hơdjă, anai ăt lĕ anih phĭn rup hiam hăng dưi gum hrŏm ngă hmua hlao.

“Čang rơmang ngă hiưm pă hrưn đĭ rơnoh yôm mơng gơnam đang hmua yua neh met wa pla pơjing. Ngă hmua pơlir hăng bơwih brơi tuai čuă ngui lĕ akŏ phun kiăng dưi ba sĭ mơdrô tač rơngiao gơnam đang hmua mơng plơi pla. Hơdôm gơnam tam dưi ba sĭ mơdrô pơ hơdôm boh dêh čar. Anai lĕ hơbô̆ bruă ba glăi tŭ yua kiăng pok prong brơi lu mơnuih ngă hmua ngă tui. Ră anai hơmâo lu hlăk ai nao hrăm tui hơbô̆ bruă anai.”

Ƀơi tơring glông Duy Xuyên, tơring čar Quảng Nam ră anai hơmâo 25 boh sang anŏ tuh pơ alin bơwih brơi tuai čuă ngui pơ đang hmua, čuă ngui amăng đang glai, pơgôp hơmâo lu dong bruă mă brơi kơ mơnuih ƀon sang, ba glăi prăk pơhrui lu ƀiă dong brơi mơnuih ƀon sang. Ơi Phan Xuân Cảnh, Khua Jơnum min mơnuih ƀon sang tơring glông Duy Xuyên, tơring čar Quảng Nam brơi thâo, tơring glông hơmâo lu hơdră djru brơi mơnuih ƀon sang bơwih brơi tuai čuă ngui, pơtô hrăm brơi kơ bruă čơkă tuai, ba neh met wa hyu čuă lăng, hrăm tui hơdôm ƀon lan pơkŏn.

“Hơdôm boh ƀon lan pơlir ngă đang hmua hrŏm hăng pơđĭ kyar hơdôm bruă bơwih brơi tuai čuă ngui kiăng hrưn đĭ rơnoh yôm hăng ba glăi pơhrui lu ƀiă dong brơi mơnuih ngă hmua hluai tui hơdôm anih čuă ngui amăng plơi pla, đang hmua. Pơhmutu plơi phun kâo Trà Đông, hơbô̆ bruă pla phun kyâo boh troh, ngă anih čuă ngui kiăng pơhưč tuai čuă ngui hrŏm hăng ngă hmua. Hơdôm hơbô̆ bruă anai blung a ba glăi tơlơi pơplih phrâo, pơgôp hrưn đĭ prăk pơhrui brơi neh met wa”./.