Yang hrơi dong hơmâo wan, nao lăng đang pla añăm hla rok, bơbôr lŏn pla trŏng dô mơboh biă mă, pơhlôm hơmâo gơnam kơ ƀing hyu mơdrô pĕ amăng hơdôm hrơi pơ anăp, mơnuih ping gah Ya Dũng, Khua plơi Labouye A, să Lạc Xuân, tơring glông Đơn Dương (Lâm Đồng) brơi thâo, ƀuh bruă ngă hmua tui đưm ƀu tŭ yua đơi ôh, hơmâo prăk aset mơn, anun jing sang anŏ ñu ngă hmua tui boh thâo phrâo dong. hăng 4 sao lŏn pla añăm pơtăm boh troh djŏp mơta, rim bơyan sang anŏ ñu hơmâo rơbêh 100 klăk prăk. Tui hăng Ya Dũng, mơ̆ng bruă ngă hmua tui anai, jing djru iâu pơthưr, tơlơi pơhiăp mơ̆ng sa čô ping gah tui hăng ñu amra hơmâo neh met wa hmư̆ tui:“Sit pô ta khŏm hrăm tui lu anih, ƀu kơnong pơ anai đôč ôh mơ̆ hrăm tui tơring pơkŏn dong. sem lăng arăng pla phun anai, phun adih. Jing sa čô mơnuih thun aset, samơ̆ hơmâo neh met wa kơnang, jing khua pơ ala lĕ ta khŏm gir hrăm, hơduah ĕp hơdră ngă hmua phrâo, kah hăng ră anai kâo glăk ngă hmua tui boh thâo ia rơgơi phrâo. Ngă bruă yua kơ mơnuih ƀôn sang, gum hrŏm pơđĭ kyar plơi pla”.

Kar kăi hnun mơn, mơnuih ping gah K’Hiệu, dŏ ƀơi thôn 2, să Đinh Trang Thượng, tơring glông Di Linh (Lâm Đồng) ăt pơtô ba neh met wa amăng plơi pơplih djuai phun pla. Ơi K’Hiệu brơi thâo, thun 2014, tơdơi kơ nao hrăm pla phrâo phun kơphê yua anom bruă ngă hmua tơring čar pơphun, ñu plih hĭ laih đang kơphê tha ƀu mơboh đơi mơ̆ng sang anŏ ñu hơdai pla djuai phrâo dong. 3 thun pla glăi, đang kơphê sang anŏ ơi K’Hiệu mơboh lu tui laih, prăk pơhrui hơđong mơn. Lăng ƀuh anŏ klă, lơ̆m anun kah neh met wa mơ̆ng hla tui. Mơnuih ping gah K’Hiệu lăi, kiăng neh met wa đăo kơnang, ngă tui lĕ pô ta khŏm ba jơlan hlâo, tơlơi pơhiăp nao hrŏm hăng bruă mă.

“Hăng sa čô mơnuih ping gah, jing mơnuih ngă khua plơi, kâo gir glăm ba bruă amăng plơi. Kâo iâu pơthưr mơnuih ƀôn sang đăo kơnang jơlan hơdră git gai mơ̆ng Ping gah, tơlơi phiăn mơ̆ng Kơnuk kơna, iâu pơthưr ană amon gir hrăm hră truh anih, đah mơ̆ng thâo phô ƀiă, thâo bơwih ƀong, kah hăng thâo ngă kơphê, mă yua măi mok pla pơjing laih anun iâu pơthưr neh met amăng plơi ngă klă djŏp bruă bơkơtưn bơwih ƀong yua să pơphun”.

Bơ tui hăng mơnuih ping gah K’Lèn, khua grup ping gah plơi K’Long, să Hiệp An, tơring glông Đức Trọng, hlâo adih, tơlơi hơdip neh met wa tơnap biă, prăk hơmâo mơ̆ng hơdôm sao pơdai ia đôč yơh, anun jing tơlơi rin rơpa dŏ tlep na nao. Yua hơmâo Ping gah hăng Kơnuk kơna lăng ba, pơphun ngă lu jơlan hơdră tuh pơ alin, djru prăk blơi anah phun pla hăng pơtô brơi hơdră ngă hmua, wơ̆t hăng tơlơi pơtô ba iâu pơthưr mơ̆ng khul grup, gong gai djŏp gưl, pơtrut tui tơlơi gơgrong bruă “mơnuih ping gah nao hlâo, ană plơi kiăo tlôn”, neh met wa pơ anai ƀơ ƀrư̆ pơplih tơlơi pơmin, hrăm tui, hla tui boh thâo phrâo kiăng pơđĭ tui anŏ yôm mơ̆ng gơnam tam. Ơi K’Lèn lăi:“Blung a ta khŏm prăp rơmet kơ pô ta djŏp tơlơi thâo, thâo hluh djŏp tơlơi pơtrun mơ̆ng Ping gah hăng tơlơi phiăn mơ̆ng Kơnuk kơna anun kah mơ̆ng pơtô lăi kơ neh met wa amuñ ƀiă. Rơngiao kơ anun, lơ̆m ta ngă djŏp bruă hơget thơ ta khŏm nao hlâo yơh, pơhmutu ta pơkra sang klum jal hñôl lơ̆m ngă hmua tui boh thâo phrâo kiăng ană plơi hrăm tui. Tơdah ta lăi amăng bah soh đôč arăng ƀu thâo ôh, pô ta khŏm ngă, ană bă ta hai hnun mơn, lơ̆m ƀuh klă kah arăng mơ̆ng ngă tui”.

Hăng hơdôm bruă ngă rơđah rơđông, sit nik mơ̆ng rim čô mơnuih ping gah amăng pơtrut tui tơlơi gơgrong nao hlâo, ngă bruă pôr pơthâo, iâu pơthưr hăng pơtô ba mơnuih ƀôn sang pơđĭ tui bruă ngă hmua, pơđĭ tui tơlơi hơdip mơda, lu hơbô̆ bruă pơkra gơnam hơmâo tŭ yua, jai hrơi pok prong tui amăng djŏp kual plơi pla djuai ania ƀiă mơ̆ng Lâm Đồng. Mơ̆ng anun, djru ba mrô sang anŏ rin mơ̆ng tơring čar trun dlăm, dŏ glăi yŭ kơ 2%, amăng anun mrô sang anŏ djuai ania ƀiă dŏ glăi 5,6%./.