Ayong A Rất Vu, ƀơi grŭp mơnuih ƀôn sang A Dinh, tơring kual Prao tơring glông Đông Giang pla rơbêh kơ 4 ektar đang keo, kơnang kơ mă yua hơdră phrâo amăng bruă pla, bơwih brơi anun kual glai kyâo keo mơ̆ng ñu bluh čăt đĭ hiam. Bơyan mă kyâo thun anai, ayong A Rất Vu pơhrui hmâo giăm truh 100 klăk prăk. A Rất Vu brơi thâo, kơnang kơ pơđĭ kyar bruă pla kyâo, sang anô̆ ñu tơtlaih mơng ƀun rin, hơđong tơlơi hơdip mơda. Tui hăng ayong Vu: Pla phun keo ƀu yua lu prăk ôh hăng kơnong kơ glêh amăng rơwang bơwih brơi hơdôm thun blung a đôč. Ayong A Rất Vu brơi thâo, ră anai sang anô̆ ñu pơphun gum hrŏm pla kyâo glai păng prong:

“Hlâo adih sang anô̆ ngă hmua pơdai kơnong kơ djop ƀong djop huă, rơgao kơ pla phun keo tơlơi hơdip mơda pơplih hloh. Mơ̆ng hrơi Kơnuk kơna hmâo hơdră pơtrun pla kyâo păng prong mơnuih ƀôn sang anăp nao biă. Ƀing gơmơi pơmin hơdai nao pla kyâo glai prong pioh pơđĭ kyar bruă bơwih ƀong hơđong hloh. Gong gai plơi pla ăt đing nao djru mơn neh wa anăh pla kyâo glai prong”.

Ăt kah hăng ayong A Rất Vu, amai A Lăng Thị Trang, djuai ania Kơtu pơ̆ să Ka Dăng, tơring glông Đông Giang pla rơbêh kơ 6 ektar đang keo. Amai A Lăng Thị Trang brơi thâo, kơnang kơ pơđĭ kyar pla kyâo glai, sang anô̆ hrưn đĭ dưi dăi ƀiă. Khă hnun hai, kiăng pơhrui glăi bôh tơhnal bơwih ƀong sui thun, ñu hơdai nao pla kyâo păng prong ƀơi 2 ektar lŏn.

“Hơdai nao pla phun kyâo păng prong pioh pơđĭ kyar bơwih ƀong hơđong hloh. Tui hluai kơ tơlơi pơkă sui hloh bơhmu hăng phun keo samơ̆ yap biă ñu bơwih ƀong hơđong hloh kơ phun keo. Pla keo bơwih ƀong hơđong hloh bơhmu hăng ngă hmua pơdai, pơsit jơlan gah pơgi kơdih anai pioh pla kyâo glai hăng lŏn pla prong hloh pioh pô pơđĭ kyar. Tơlơi hơdip mơda pô ră anai đĭ gŏ amŏ laih bơhmu hăng đưm hlâo”.

Hơdôm hrơi rơgao, Jơnum min mơnuih ƀôn sang tơring glông Đông Giang, tơring čar Quảng Nam đing nao pok prong lŏn pla kyâo glai, ngă juăt jơlan gah tuh pơplai pơđĭ dlông anô̆ klă kyâo glai hăng pơplih mơ̆ng kyâo pla păng anet hơdai nao pla kyâo păng prong. Hơnong ñu rim thun, tơring glông anai pơpha ngăn drăp mơ̆ng 1,5 truh 2 klai prăk djru mơnuih ƀôn sang pơđĭ tui bruă mă, anô̆ klă phun pla, biă ñu đing nao pla kyâo păng prong. Tơring glông Đông Giang hmâo djru laih mơnuih ƀôn sang pla rơbêh kơ 500 ektar đang kyâo glai păng prong hăng lu djuai phun pla klă hiam kah hăng dổi mơtah, lim mơtah, kyâo giar jŭ, ươi, kyâo pah... Tơring glông Đông Giang hrưn đĭ truh thun 2025 pơđĭ abih bang kual lŏn pla kyâo păng prong truh 4.500 ektar. Ơi Đỗ Hữu Tùng, Kơ-iăng Khua Jơnum min mơnuih ƀôn sang tơring glông Đông Giang brơi thâo:

“Anai lĕ hơdră pơtrun djơ̆ mơ̆ng tơring glông ăt kah hăng mơ̆ng tơring glông pioh pơsur mơnuih ƀôn sang wual pla kyâo glai pơjing glai klô jai hrơi jai pơđĭ kyar. Đơ đam tơring glông hmâo pơsur mơnuih ƀôn sang pla sa thun ƀiă biă mă ñu 300 ektar đang kyâo pla păng prong hăng djop djuai kyâo kah hăng kyâo gáo vàng, kyâo kre, kyâo giar jŭ, yap wot phun kyâo keo ngă hiưm hơpă dưi djă pioh glai klô pơhlôm hăng mơ̆ng anun pơgang pơgăn lŏn tơhroh, rơbŭ kơthel hơjan ia ling dăo ngă. Mơ̆ng anun mơnuih ƀôn anun amra pơgang hăng wai lăng glai klô klă hloh, pơđĭ kyar bơwih ƀong, hrŏ trun ƀun rin. Tơdơi anai ba glăi bôh tơhnal pla kyâo glai păng prong lu hloh hăng ba truh kơ mơnuih ƀôn sang prăk pơhrui glăi lu hơđong sui thun. Amra pơđĭ kyar lu hloh ƀơi djop anih anom đơ đam tơring glông”.

Ƀơi hơdôm bôh tơring glông kual čư̆ siăng tơring čar Quảng Nam hmâo hơdôm rơtuh bôh sang anô̆ neh wa djuai ania Kơtu gum hrŏm pơđĭ kyar bruă pla kyâo keo hăng hmâo prăk pơhrui glăi hơđong. Quảng Nam hmâo mă yua laih lu hơdră pơsur mơnuih pla kyâo glai pơplih mơ̆ng pla kyâo păng anet hơdai nao pla kyâo păng prong djru mơnuih ƀôn sang pơđĭ kyar bơwih ƀong rah, djru pơgang glai klô rah. Dưi thâo, tơring čar Quảng Nam hmâo rơbêh kơ 769.000 ektar glai klô hăng lŏn pơkă pơlar glai klô. Rim thun, mrô kyâo glai pioh yua amăng lŏn ia hăng sĭ kơ dêh čar tač rơngiao mơ̆ng tơring čar năng ai ñu 1,45 klăk khô̆i kyâo, djru pơjing bruă mă, djru mơnuih ƀôn sang kual čư̆ siăng tơtlaih mơ̆ng ƀun rin kơjăp sui thun./.