Ayong Nguyễn Lê Duy, să Ea Tar, tơring glông Čư̆ M’gar, tơring čar Dak Lak hơmâo rơbêh 10 ektar đang pla sầu riêng Dona. Ñu brơi thâo, bơyan hlâo anun sang anŏ pĕ pơhrui dưm dưm 200 tơ̆n, hăng nua sĭ ƀơi đang lĕ 42.000 prăk sa kĭ, pơhrui 8 klai 400 klăk prăk. Amăng bơyan pĕ pơhrui thun anai, him lăng pơhrui đĭ dua wŏt yua nua sĭ mơdrô đĭ kơtang. Ayong Nguyễn Lê Duy hok mơ-ak brơi thâo.

“Kar hăng thun hlâo nua ñu giăm 40.000 prăk sa kĭ, bơ ră anai nua sĭ mơng 60-70 rơbâo sa kĭ, hăng arăng ăt nao blơi tơl anih dong. Nua sĭ anai ngă mơnuih ngă hmua hok mơ-ak biă mă, neh met wa gir tuh pơ alin, wai lăng pla pơjing brơi phun sầu riêng hiam mơboh”.

Ăt hok mơ-ak lơ̆m boh sầu riêng sĭ hơmâo nua, samơ̆ ơi Ngô Công Lương, să Ea Yông, tơrign glông Krông Pač, aka ƀu kĭ pơkôl sĭ mơdrô boh sầu riêng hăng 180 phun djuai Dona pla pơplah hăng kơphê. Ñu brơi thâo rĭm hrơi hơmâo lu mơnuih tui nao lăng tơl hmua hăng rơkâo blơi hlâo abih boh sầu riêng mơtăm.

“Sit biă ñu đa hơmâo anih lăi pơthâo amra blơi nua ñu 72.000 prăk sa kĭ, hăng hơmâo lu mơnuih mă prăk hlâo, rĭm ektar ƀing gơñu mă hlâo mơng 400-500 klăk. Sang anŏ gơmơi aka hăt ôh, yua nua sĭ aka ƀu tong ten, yua anun aka ƀu mă prăk hlâo. Ƀing gơmơi pơmĭn giăm 1 wŏt hrơi tơjuh hlâo kơ pĕ kah mơng lăi pơthâo nua sĭ, lơm anun hlơi tui nao blơi amra sĭ mơtăm”.

Krông Pač lĕ tơring glông pla lu sầu riêng hloh amăng tơring čar Dak Lak hăng rơbêh 7.100 ektar, amăng anun hơmâo rơbêh 3.000 ektar glăk amăng thun pĕ pơhrui. Sầu riêng ƀơi anai lu hloh lĕ djuai Dona hăng Ri6. Pĕ pơhrui mơng 18-20 tơ̆n sa ektar. Ơi Nguyễn Huy Hoàng, Khua anom bruă ngă hmua hăng pơđĭ kyar ƀon lan tơring glông Krông Pač brơi thâo, thun anai ayuh hyiăng ƀu gêh gal, akŏ bơyan ƀuh sầu riêng hlung lu bơnga hăng boh mơda. Samơ̆, yua wai lăng klă ră anai dŏ mơboh lu, sầu riêng lêng kơ prong, him lăng pĕ pơhrui ăt hơmâo hmăi mơn.

“Tơring glông Krông Pač him lăng amra pĕ pơhrui boh sầu riêng hơmâo hmăi. Ră anai neh met wa ăt glăk tŏ tui pla pơjing, hăng giăm 45 hrơi dong amra pĕ pơhrui. Truh bơyan pĕ pơhrui, Jơnum min mơnuih ƀon sang tơring glông amra hyu pel ĕp hăng hyu pơtô pơblang tơl neh met wa kiăng pơhlôm hơđong amăng kual kah hăng wai lăng gơnam đang hmua”.

Đơ đam tơring čar Dak Lak ră anai hơmâo 22.500 ektar đang pla sầu riêng, amăng anun giăm 10.000 ektar glăk amăng thun pĕ pơhrui. Boh sầu riêng pĕ amăng bơyan thun hlâo (2022) dưm dưm 170.000 tơ̆n, sĭ rơbêh 9.500 klai prăk. Bơyan pĕ thun anai, him lăng boh sầu riêng ƀơi Dak Lak pĕ pơhrui truh 185.000 tơ̆n. Ră anai, tui hơduah ĕp amăng đang hmua ƀơi Krông Pač, Krông Năng, Buôn Hồ, Čư̆ M’gar…nua arăng rơkâo blơi hlâo ƀơi đang hmua mơtăm mơng 65-75 rơbâo sa kĭ, tui hluai djuai Dona ƀudah Ri6 kah hăng boh hiam hă ƀŭ. Hăng bruă nua sĭ hăng pĕ pơhrui lêng kơ đĭ lu, sầu riêng Dak Lak thun 2023 anai him lăng amra pơhrui glăi lu hloh.