Hăng sa čô mơnuih hlăk ai kuh thun ngă đang hmua, samơ̆ kơnang kơ gir run hrăm tui hăng tañ ngă tui amăng bruă đang hmua, khin hơtai mă yua bôh thâo phrâo amăng ngă đang hmua, ayong K’Đức, ƀơi să Đinh Trang Thượng, tơring glông Di Linh, tơring čar Lâm Đồng jing laih mơnuih ƀôn sang mơbruă mơ̆ng plơi hăng dưi pơmut brơi ñu mut Ping gah. Dong mơ̆ng hrơi jing mơnuih ping gah, K’Đức jai hrơi jai ngă tui bruă ba jơlan hlâo, pơsur klă mơnuih ƀôn sang pơplih hơdră phun pla, ngă đang añăm pơtăm tui jơlan gah pơđĭ nua gơnam.

 “Hăng bruă mă lĕ mơnuih ping gah hlăk ai, amăng hơdôm hrơi rơgao, kâo hmâo laih bruă gơgrong, ngă klă amăng djop bruă yua Ping gah hăng Khua git gai plơi pla jao. Amăng anun hmâo bruă ba jơlan hlâo amăng pơđĭ kyar bruă ngă đang hmua, pơplih hơdră phun pla hmâo nua lu hăng pơsur mơnuih ƀôn sang ngă tui. Kah hăng Wa Hồ hmâo pơtô mơnuih ping gah khom nao hlâo pioh ană plơi kiăo tui tlôn”.

 Tui hăng anun, ping gah K’Ly, ƀơi să Tân Thượng, tơring glông Di Linh ăt ngă klă mơn bruă ba jơlan hlâo amăng pơđĭ kyar bơwih ƀong hăng tơlơi hơdip mơda pioh neh wa ƀơi anai hrăm tui hăng mă yua ngă tui. Mơ̆ng hrơi pơdŏng truh kih hơdră pla rơbung prang tui hră rơkâo blơi, đang añăm ơi K’Ly jing laih anih ngă pơphô hlâo, ngă pơhưč lu mơnuih ƀôn sang amăng kual nao hơduah ĕp lăng. K’Ly brơi thâo, kiăng pơplih tơlơi pơmin ngă đang hmua mơ̆ng mơnuih ƀôn sang khom pơdah gŏng jơlan hơdôm bruă ngă rơđah biă hăng sit nik dong.

  “Kiăng mơnuih ƀôn sang hmâo prăk pơhrui glăi mơ̆ng gơnam anai, drơi pô kâo hmâo ba jơlan hlâo laih amăng bruă pla phun rơbung prang pioh mă phun pla ƀiă hrơi rông phun pla sui thun, dưi hmâo mơnuih ƀôn sang hrăm hăng ngă tui. Ră anai phun rơbung prang sĭ hyu hơđong biă, nua sĭ mơ̆ng 70.000 truh 100.000 prăk sa kg, lu mơnuih sĭ mơdrô nao blơi tơl đang pla, samơ̆ ƀu hmâo rơbung pioh sĭ mơn. Truh ră anai, kâo amra gir run pơhư prong anih pla pioh lu neh wa hmâo prăk pơhrui glăi rim hrơi, pơhlôm hơđong tơlơi hơdip mơda”.

 Tui hăng K’Brao, Khua git gai Ping gah plơi Hàng Ùng, să Bảo Thuận, tơring glông Di Linh, bruă ngă tui pô ba jơlan hlâo mơ̆ng ping gah amăng pơđĭ kyar bơwih ƀong huă ngă đang hmua hăng tơlơi hơdip mơda ƀơi plơi pla djuai ania ƀiă lĕ sa amăng hơdôm bruă mă yôm phăn dưi hmâo Ping gah tơring glông Di Linh biă ñu đing nao pơtrut kơtang ngă tui. Yua anun, kiăng pơplih tơlơi pơmin, hơdră ngă mơ̆ng mơnuih ƀôn sang, mơnuih ping gah amăng grŭp hmâo črông lô na nao hăng pơjing hơdôm hơdră bơwih ƀong lăp djơ̆ hăng ba glăi bôh tơhnal. Hmâo tui anun neh wa mơ̆ng đăo kơnang hăng ngă tui.

  “Hlâo adih, yua kơ pla kơphê pơdjuai mă hăng pơjeh anun mrô bôh ƀu lu. Mơ̆ng hrơi mă yua djuai pơjeh kơphê phrâo 138 kơphê gep than anun mrô bôh kơphê lu hloh lu biă bơhmu hăng hlâo adih. Neh wa ƀuh pô ngă ba glăi bôh tơhnal anun lu mơnuih hrăm tui ngă tui pioh pơđĭ kyar bơwih ƀong, pơđĭ dlông tơlơi hơdip mơda”.

Tơring glông Di Linh ră anai hmâo 4.400 čô mơnuih ping gah, amăng anun hmâo rơbêh kơ 900 čô mơnuih ping gah lĕ mơnuih djuai ania ƀiă. Yua mơ̆ng khul mơnuih ping gah anai lĕ hơdôm pô ngă gru, ba jơlan hlâo amăng djop bruă, djru pơplih tơlơi pơmin hơdră ngă amăng neh wa djuai ania ƀiă, djru klă amăng tơlơi pơđĭ kyar bơwih ƀong – mơnuih mơnam mơ̆ng tơring glông Di Linh lăi ha jăn hăng Lâm Đồng lăi hrŏm./.