Mơng mrô 12.000 phun sâm Ngọc Linh pơjeh yua Khua dêh čar Phạm Minh Chính djru brơi sang anŏ ƀun rin, Jơnum min mơnuih ƀôn sang tơring glông Tu Mơ Rông hơmâo kah pha, djru brơi 300 boh sang anŏ ƀun rin ƀơi 23 boh plơi pla amăng 8 boh să amăng tơring glông. Amăng anun, să Măng Ri hơmâo mrô sang anŏ ƀun rin djru brơi pơjeh sâm Ngọc Linh lu hloh hăng 135 boh sang anŏ, ƀiă biă mă ñu lĕ să Đăk Tờ Kan hăng 10 boh sang anŏ.

Hlâo kơ hrơi pla sâm Ngọc Linh, anom bruă ngă hmua tơring glông Tu Mơ Rông gum hrŏm hăng gong gai hơdôm boh să hăng anom bơwih ƀong sĭ mơdrô pơphun akŏ pơjing hơmâo grup pla sâm; pơtop hrăm, pơtô brơi boh thâo pla pơjing; kah brơi pơjeh, gơnam yua pla pơjing…hăng kiăo tui lăng bruă pla phun akha kyâo mơng mơnuih ƀon sang. Tơring glông Tu Mơ Rông ăt čang rơmang mơng đang pla sâm Ngọc Linh hăng 12.000 phun mơ̆ Khua dêh čar Phạm Minh Chính jao brơi, hơbô̆ bruă sang anŏ ƀun rin pla sâm Ngọc Linh amra lar hyu kơtang, pơtrut mơnuih ƀôn sang amăng tơring glông pok prong pla phun akha kyâo yôm anai.