Bơyan hơjan hlim lŏn djrưh, bơyan phang lŏn krô kreñ, kual lŏn ƀơi să Ea Nuôl, tơring glông Buôn Đôn, tơring čar Dak Lak, tơnap biă mă amăng pơđĭ kyar pla phun boh troh. Ĕp jơlan ngă pơdrong asah amăng đang hmua plơi pla, ƀing hlăk ai dŏ amăng să Ea Nuôl hơmâo khin hơtai pla boh ƀâo mơtah, ngă hơdôm tơlơi tơnap mơng ayuh hyiăng lŏn mơnai jing tơlơi gal amăng bruă ngă hmua. Ayong Võ Hoài Ân, mơnuih ngă bruă gah boh thâo pla pơjing boh ƀâo brơi thâo:

“Thun 2021 pơphun pla lông lăng hơdôm phun boh ƀâo, ƀuh bluh đĭ hiam biă mă. Tơdơi anun pla pơhrua dong hơdôm pơjeh phrâo kiăo tui lăng ăt hiam mơn. Yua ayuh hyiăng pơplih amăng tơhrơi hăng mlăm ƀơi kual Buôn Đôn, bơyan puih phang amra pơplih rơbêh 10 độ, tơlơi anai amra ngă boh ƀâo ƀong ƀâo hiam, mơmih ƀiă”.

Mơng hơbô̆ bruă pla lông lăng blung a, truh ră anai, đơ đam đang hmua pla 1,8 ektar hơmâo 10.000 phun boh ƀâo dưi pĕ pơhrui laih. Ayong Nguyễn Quốc Lập, sa amăng ƀing mơnuih pơgôp prăk, pơgôp hrơi mă bruă tuh pơ alin pla boh ƀâo brơi thâo, găn rơgao lu tơnap tap amăng čoh pơkra glăi đang hmua, tuh pơ alin pơkra sang păng hơñuôl, mă yua boh thâo phrâo, tơdơi kơ rơbêh 3 thun, đang pla boh ƀâo dưi pĕ pơhrui dưm dưm 10 tơ̆n rĭm thun. Nua sĭ 400.000 prăk sa kĭ samơ̆ hơmâo lu mơnuih rơkâo blơi, đa hơmâo bơyan ƀu djop boh ƀâo sĭ brơi arăng. Tui ayong Nguyễn Quốc Lập, bruă pơđĭ kyar brơi phun boh ƀâo anai ăt pok prong.

“Tơdah djop mơta lêng kơ gêh gal hăng mơnuih ngă hmua ƀơi anai tŭ ư gum hrŏm, gir run hrŏm, ƀing gơmơi čang rơmang anai lĕ kual pla boh ƀâo mơtah phun amăng tơring čar”.

Ƀing hlăk ai hơmâo tŭ mă djop tơlơi gal amăng internet kiăng lăi pơthâo hơbô̆ bruă pla boh ƀâo mơta mơng ƀing gơñu brơi lu mơnuih thâo. Amăng bơyan pĕ pơhrui, hơdôm rơtuh glông pla boh ƀâo tơpă brăng mơtăm, mơtah mơda, mơboh gut than pơhưč lu mơnuih nao pel ĕp lăng, Amai Nguyễn Thị Thu Hằng brơi thâo:

“Kâo ăt hyu lăng lu anih, mơng đang pla boh dâu Đà Lạt, đang pla boh ƀâo Ninh Thuận, lơm pot glăi pơ plơi dưi pla đang boh ƀâo tui anai kâo hok mơ-ak biă mă. Čang rơmang amăng ƀon lan amra hơmâo dong đang pla boh ƀâo hrup hăng anai kiăng pơđĭ kyar bơwih ƀong huă kah hăng tuai čuă ngui dong”.

Yă Đinh Thúy Lăng, Kơ-iăng khua Jơnum min mơnuih ƀôn sang să Ea Nuôl, tơring glông Buôn Đôn, tơring čar Dak Lak brơi thâo, mơng tơlơi truh kih blung a mơng hơbô̆ bruă pla boh ƀâo mơtah pok rai jơlan bơwih ƀong phrâo brơi mơnuih ngă hmua amăng ƀon lan:

“Hơbô̆ bruă anai ba glăi lu tơlơi dưi. Blung hlâo lĕ ngă pơplih phun pla, pơplih pơjeh phrâo lăp djơ̆ hăng ayuh hyiăng lŏn mơnai ƀơi să Ea Nuôl. Hrŏm hăng anun, hơmâo jơlan pơđĭ kyar amăng bơwih brơi tuai čuă ngui ƀơi đang hmua. Sa jơlan yak nao pơđĭ kyar amăng tơring glông. Gah gong gai ƀon lan, ƀing gơmơi ăt amra kơsem min lăi pơthâo hơbô̆ bruă anai tơl neh met wa ngă hmua amăng să kiăng hơmâo lu dong mơnuih dưi ngă tui hơbô̆ bruă anai. Črâo brơi ƀon lan pơđĭ kyar ngă hmua, pơplih phun pla ba glăi tŭ yua ƀiă dong”./.