Ră anai dêh čar ta hơmâo năng ai 448.000 ha glai kyâo pơprong, đĭ hmar biă pơhmu hăng hlâo adih. Rơngiao kơ anun, hơmâo laih năng ai 63.000 ha glai rưng hơmâo pơplih mơ̆ng kyâo anet jing kyâo prong hluai tui hơdôm jơlan hơdră djru mơ̆ng Kơnuk kơna hăng ngă hrŏm kơnuk kơna - mơnuih ƀôn sang. Đơ đam đang glai hơmâo hră wai lăng kjăp giăm 943.000ha. Mah hơmâo pơplih phrâo hăng hơdôm hră pơsit hơđong kjăp mơ̆ng jar kmar, lu tơlơi tơnap mơ̆ng bruă pla glai pioh sĭ, pơkra gơnam ăt hơmâo mơn kah hăng pơkra raih raih, prăk ngă hră pơsit pơmă, ƀu pơtruh pơkra gơnam hrŏm, wai lăng dŏ tơdu.

Ơi Nguyễn Danh Hùng, Kơ-iăng khua Gơnong bruă hmua hăng ayuh hyiăng Nghệ An brơi thâo: Tơring čar hơmâo tơlơi gêh gal prong yua đang glai prong, lu anom bruă pơkra kyâo hăng hơdôm ƀut ngă hrŏm hợp tác xã ngă tom. Khă hnun, đang glai pla kyâo pơprong mơ̆ng Nghệ An ăt dŏ aset mơn, hăng 33.000ha. Pơ anăp anai, kiăng pơđĭ tui anŏ yôm mơ̆ng kyâo glai pla mă, tơring čar Nghệ An gơñăm nao pla glai kyâo prong hloh:“Tơring čar hơmâo pơtrun hră pơkă hơnong, dưm dăp, kah pơpha rơđah kual ƀơi thơ pla kyâo prong, kiăng thâo jơlan pla glai, nao hrŏm hăng hră pơsit pla glai. Jơnum min pơ ala mơnuih ƀôn sang tơring čar ăt hơmâo hră djru pla kyâo prong, phun ñu mơ̆ng bruă ruah anah kyâo”.

Ƀơi mông jơnum, lu mơnuih kơhnăk, ƀing apăn bruă wai lăng, ƀing kơsem min boh thâo phrâo ba tơbiă lu hơdră kiăng pơđĭ tui kual pla kyâo prong hăng hră pơsit wai lăng glai hơđong kjăp tŭ yua hloh. Tui anun, hơdôm hơdră ngă bruă leng kơ pơƀut čih pơkra giong tơlơi phiăn, ngă amuñ brơi hră pơ-ar, čan prăk kơmlai aset, hơmâo hră pơhlôm nua glai rưng; djru ba anah phun klă kah hăng keo lai mô, keo tam bội; mă yua boh thâo mrô amăng wai lăng hăng čih pơkra anih pla; pơtruh nao rai ba sĭ sui hăng nua hơđong.

Mơ̆ng bruă pơtruh hăng djru ba măi mok boh thâo, ơi Hoàng Văn Hồng, Kơ-iăng khua Anom bruă pơsur ngă hmua dêh čar lăi, kiăng pơtrut kơtang bruă pla glai ba glăi boh tŭ yua prong hloh nao hrŏm hăng hră pơsit, laih dong pơtruh nao rai sang anŏ - anom ngă ƀong hrŏm - anom bơwih ƀong - khul grup brơi hră pơsit. Tui anun, Anom bruă pơsur ngă hmua amra gơgrong pơtruh brơi, djru mơnuih pla glai dưi mă yua boh thâo măi mok, ngă bruă hơđong hăng hơmâo anih ba sĭ hơđong: “Anom bruă pơsur ngă hmua dêh čar ăt glăk pơphun hăng ngă na nao mơn, pơtrut tui bruă pôr pơthâo, pơtŏp bruă boh thâo pơkra gơnam kơ neh met wa. Čih pơkra hơdră pơsur ngă hmua kiăng neh met wa dưi pơtŏng, lăi glăi, mơ̆ng anun kơđiăng lui, či pok prong bruă pơsur pla glai kyâo pơprong hơđong kjăp hloh”.

Mông jơnum ƀu kơnong jing anih či lăi pơthâo nao rai tơlơi thâo thăi ngă bruă, ĕp hơdră pơsir brơi tơlơi tơnap đôč ôh ăt pok rai tơlơi gêh gal ngă hrŏm mơ̆ng hơdôm boh tơring, anom bơwih ƀong hăng pô pla glai. Hơdôm jơlan anăp nao, hră kĭ pơkôl, hăng djru măi mok kĭ thuâ̆t mơ̆ng anih wai lăng, anom pơsur ngă hmua amra djru hơmâo tơlơi gêh gal, pơtrut pran jua či đĭ kyar kual pla kyâo pơprong hơmâo wơ̆t hăng hră pơsit hơđong, djru pơđĭ tui nua, pơplih tui tơlơi hơdip hăng pơgang ba ayuh hyiăng glai klô.