Sang anŏ amai Đàm Thị Thảo (plơi Bản Hoàng, să Trường Hà, tơring glông Hà Quảng, Cao Bằng) jing sa amăng hơdôm boh sang anŏ pơhrui prăk lu mơ̆ng kơčăo bruă pơkra sang klum jal (hơñôl) pla djŏp djuai tơmun. Hăng rơbêh 100 klăk prăk hơmâo hơđăp, hrŏm hăng prăk djru 150 klăk mơ̆ng kơnuk kơna, sang anŏ ñu blơi gơnam, măi mok ngă hmua pla tơmun tơmun mơkai amăng sang klum jal. Amai Đàm Thị Thảo brơi thâo: Đang hmua ñu hơmâo 1.000m2, mă yua măi pruih ia tơdjoh hăng 2.000 phun tơmun mơkai djŏp mơta. Bruă pla brơi ƀuh phun čăt hiam, bơnga lu, boh prong biă, pơadai boh rơbêh kơ 90%.

“Pla tơmun amăng sang klum jal lĕ bơyan phun ñu ta pla tơmun brung hăng tơmun sơreh, bơ bơyan tơdơi lĕ ta pla tơmun ia, juăt ñu pla amăng bơyan puih. Rim thun 3 bơyan, kah hĭ prăk pla dŏ glăi rơbêh 200 klăk prăk. Tơdơi kơ nao hrăm bruă pla amăng sang klum jal, kâo thâo hrơi mông lăp djơ̆ či pla, pruai kmơk, anun jing phun tơmun mơboh biă, pla hrŭp hăng kơtor, pơdai mơn”.

Bruă pla gơnam amăng sang jal hăng măi pruih ia tơdjoh djru kơ phun pla huăi kơnang kơ ayuh hyiăng lŏn adai đơi ôh, laih anun plai mơn hơmâo hlăt kman ƀong. Ƀu kơnong tui anun đôč ôh mơ̆, neh met wa plai ƀiă huač prăk yua huăi mă yua jrao pơgang phun pla, pơhlôm gơnam hơdjă, klă hiam hăng tơlơi suaih pral pô pla wơ̆t hăng pô blơi ƀong. Blung a hơbô̆ bruă anai pơtrut pran jua kiăng mơnuih ngă hmua khin tuh pơ alin blơi măi mok ngă hmua. Ăt jing sa amăng hơdôm boh sang anŏ hơmâo djru pơkra sang klum jal, ayong Nguyễn Văn Quảng (plơi Bản Chá, să Ngọc Đào, tơring glông Hà Quảng, tơring čar Cao Bằng) brơi thâo:“Sang anŏ gơmơi pla tơmun brung, tơmun ia. Anah phun pla bơyan blung a hơmâo arăng djru brơi. Bơyan tŏ tui kâo blơi mă. Lơ̆m phrâo pla tơmun amăng sang jal, ƀing apăn bruă kĭ thuâ̆t trun rai tơl anih mơtăm či pơtô pla hăng wai lăng. Bruă pla amăng sang klum jar tơdah ta ngă tui tơlơi pơtô ñu amuñ mơn. pla tơmun tui anai rim thun hơmâo 3 bơyan. Tơdah ta pla klă lĕ mơboh hiam, prăk hơmâo lu hloh kơ phun pơkŏn mơn”.

Mơ̆ng boh than ba glăi, lu sang anŏ ƀơi hơdôm boh să pơkŏn amăng tơring glông nao lăng, hrăm tui, khin pla, hơmâo prăk djru mơ̆ng gong gai đah mơ̆ng pơplih hơbô̆ bruă bơwih ƀong. Ơi Đàm Quang Đạo, Khua khul ngă hmua să Ngọc Đào, tơring glông Hà Quảng, Cao Bằng lăi: Hơdôm hơbô̆ bruă mă yua boh thâo măi mok ƀơi tơring hmao kru kiăo tui tơlơi kiăng ră anai mơ̆ng anih sĭ mơdrô.

“Thun 2022, tơring glông Hà Quảng djru ba să Ngọc Đào 3 boh sang klum jar tui hơdră prăk djru mơ̆ng kơnuk kơna 50%. Thun blung a ngă lĕ kơnuk kơna djru anah, boh thâo wai lăng. Hrơi blan pơ anăp, Khul mơnuih ngă hmua pơtô pơblang brơi kơ neh met wa pok prong ngă hmua hơdjă, măi mok rơnuk phrâo, pơđĭ tui prăk pơhrui, djru lŏm lui rơmon rơpa, gir akŏ pơjing gơnam OCOP”.

Hơbô̆ bruă pla tơmun amăng sang klum jal, mă yua măi pruih ia tơdjoh jing pok jơlan bơwih ƀong phrâo gah bruă ngă hmua pơ tơring čar. Anai jing tơlơi gêh gal djru ba mơnuih ngă hmua hrăm boh thâo, mă yua măi mok phrâo či pơkra rai gơnam ƀong huă hơdjă, klă kơ mơnuih blơi yua./.