Tui hăng hră lăi pơthâo hlâo mơ̆ng Ding jum bruă hmua hăng pơđĭ kyar plơi pla brơi ƀuh, grup pơsur ngă hmua amăng kual plơi pla blung hlâo hơmâo ngă bruă tŭ yua hăng tơlơi glăm ba pơtruh nao rai plah wah sang bruă sĭ mơdrô hăng mơnuih ngă hmua, djru kơ sang bruă sĭ mơdrô dưi jĕ giăm lir hơbit hăng mơnuih ngă hmua, hăng hơdôm anih ngă hmua pla boh troh pioh pơkra ming gơnam sĭ mơdrô amuñ hloh. Grup pơsur ngă hmua plơi pla djru pơtô brơi, djru mơnuih ngă hmua ba yua hơdră phrâo ngă hmua pla pơjing kiăng pơhlôm pơgang boh tŭ yua hiam, hơđong hơdră djơ̆ anŏ kiăng mơ̆ng sang bruă sĭ mơdrô blơi ba glăi pơkra ming hăng sĭ mơdrô arăng blơi yua.

Lu khua mua nao jơnum lăi lĕ, yua phrâo akŏ pơdong hăng mă bruă đôč anun yơh grup pơsur ngă hmua dŏ lu tơlơi tơnap tap amăng bruă git gai wai lăng. Djop grup pơsur ngă hmua plơi pla, kơnong ngă bruă pơtruh brơi hơdôm bơnah ngă hrŏm; lu sang bruă aka ƀu hơmâo tơhnal pơkă pơhno gơnam sĭ mơdrô bơwih bơwăng kơ bruă pơsur ngă hmua. Ƀing ding kơna amăng grup pơsur ngă hmua dŏ kơƀah tơlơi thâo anŏ găn rơgao amăng bruă mă, djru pơtô brơi mơnuih ngă hmua amăng plơi pla. Aka ƀu hơmâo tơlơi phiăn pok pơhai bruă mă djru kơ bruă pơsur ngă hmua kual plơi pla ôh. Ơi Lê Trí Nhân, mơnuih apăn bruă Anom bruă pơsur ngă hmua tơring čar Bến Tre lăi:

“Khul mơnuih ngă hmua, djop khua khul, kơ-iăng khua khul lĕ jing ƀing lir hơbit anŏ gêh găl ƀơi djop plơi pla, ƀing ta dưi dăp hơdră brơi kơ ƀing anai yơh pơphun mă bruă  ƀudah ngă kơ-iăng khua grup pơsir ngă hmua amăng plơi pla. Ƀing ding kơna amăng grup ƀing ta ruah ƀing ngă hmua rơgơi ƀudah khua grup bơwih ƀong hrŏm gum ngă khua grup pơsur ngă hmua amăng plơi pla. Grup pơsur ngă hmua anai, amra djru ba anom bruă pơsur ngă hmua ƀơi tơring glông, anom bruă pơsur ngă hmua djop anih djru ba grup anai mă bruă tŭ yua hloh”.

Lu khua mua nao jơnum rơkâo akŏ pơjing tơhnal pơkă kơ bruă mă kiăng pơtong rơđah, anŏ bơbeč djơ̆ kơ bruă pơsur ngă hmua, kah hăng tơhnal pơkă amăng bruă mă dơ̆ hnong mă bruă, ngă hmua pla pơjing; akŏ pơdong hăng čih pơkra bruă akŏ pơdong laih anun djru pơsur bruă ngă hmua amăng kual plơi pla kiăng pok pơlar tui amăng dêh čar....Ơi Lê Quốc Thanh, Khua anom bruă pơsir ngă hmua dêh čar lăi lĕ:

"Tơlơi tơnap  lĕ ƀing ta kiăng dăp glăi bruă mă, ƀing ta khom akŏ pơdong glăi hơdră pơphun bruă ngă hmua, boh nik ñu hơmâo tơlơi gum hrŏm mơ̆ng lu sang anŏ, khul grup ngă ƀong hrŏm, tơdah ƀing ta ngă bruă hlơi thâo hlơi ngă, hlơi kơtang hlơi dưi raih daih lĕ, bruă jĕ giăm anih ngă hmua pơprong, lir hơbit lu anih ngă hmua amra tơnap tap. Hăng anom bruă sĭ mơdrô ƀing gơmơi iâu pơthưr ngă hrŏm tong ten, pơtong rơđah anih pla pơjing gơnam kiăng blơi sĭ mơdrô gơñu kiăng, akŏ pơjing bruă mă lir hơbit tong ten hrŏm mơnuih ngă hmua, tơdah anom bruă sĭ mơdrô ƀu ngă hrŏm tong ten ôh, bing ta amra bưp tơlơi hơmâo mơnuih tuh pơ alin hăng mơnuih ƀu gưt tuh pơ alin amăng bruă ngă hmua pla pơjing laih anun hnong pơhno gơnam sĭ mơdrô pơkă nua rơnoh sĭ mơdrô ƀu hơđong ôh”.

Ƀrô tal anai, anom bruă pơsur ngă hmua, Ding jum Bruă hmua hăng pơđĭ kyar plơi pla hơmâo ƀơk 10 boh măi komputer kơ hơdôm grup pơsur ngă hmua kual plơi pla ba gru hlâo amăng bruă mă lơ̆m tơring lŏn mơnai ia krông Cửu Long.