Ngă tui tơlơi pơtô ba mơ̆ng gong gai hăng anom bruă hmua tơring glông Kon Plong, amăng hơdôm hrơi adai rơ-ŏt kơtang, hơmâo kơthul, ia ngom, hơjan rơ-ŏt, 145 boh sang anŏ djuai ania Sêdang amăng plơi Kon Vơng Kia, tơring kual Măng Đen hơmâo ngă lu hơdră pơhlôm pơgang brơi hlô rông. Hrŏm hăng bruă lui hĭ rông prưh rơmô kơbao amăng glai, hơdôm boh sang anŏ pơkra 35 boh drông, war phrâo krư̆ hlô rông đah mơ̆ng amuñ wai lăng. Ayong A Ka Riắc sa čô mơnuih amăng plơi brơi thâo rim hrơi hơdôm boh sang kah pơpha bruă pơhlôm pơgang hŭi kơƀah gơnam čem, hŭi rơ-ŏt rơngoh kơ rơmô kơbao:

“Hrơi ƀơi thơ sang anŏ hlơi thơ nao kiă rơmô kơbao lĕ sang anŏ anun nao yuă rok pơ hmua ba glăi kơ rơmô kơbao ƀong. Wơ̆t hăng eh rơmô kơbao hai hnun mơn, sang anŏ hlơi thơ nao wai lĕ tơdơi kơ anun kih rơmet, kuăi eh ñu hlao, anun jing drông war hơdjă biă. Pơging war rơmô kơbao, čuh drăng, hơkam đah mơ̆ng ngă pơđao anih rơmô kơbao pit”.

Jing tơring glông juăt bơbeč djơ̆ biă adai rơ-ŏt bơyan puih, hơdôm thun giăm anai tơring glông Kon Plong, tơring čar Kon Tum juăt pơtô lăi iâu pơthưr neh met wa djuai ƀiă lăp đing nao bruă pơgang kơƀah gơnam čem, hlô rông rơ-ŏt rơngoh. Yua huăi prưh lui amăng glai, ƀơi Kon Plong huăi hơmâo dong tah rơmô kơbao djai amăng tuh rơyuh yua rơ-ŏt, pŭ hlô rông mơ̆ng tơring glông hrôh tañ mơn hăng giăm 24.000 drơi. Ơi Võ Đình Tân, Kơ-iăng khua anom bruă hmua hăng pơđĭ kyar ƀôn lan tơring glông Kon Plong brơi thâo, ƀơi anăp bơyan puih truh, anom bruă hơmâo plĕ 1.000 pok hră pơtô ba mơnuih ƀôn sang pơgang brơi rơmô kơbao hŭi kơƀah gơnam čem, pơgang rơ-ŏt hăng pơgang klin kơ hlô rông:

“Bơyan puih truh, adai rơ-ŏt kơtang kơtit, mơnuih ƀôn sang thâo pơging mă, pơkra kơjăp war. Kơ gơnam čem rông lĕ ană plơi thâo mă drăng kruh kiăng pơđao. Rơngiao kơ anun thâo pla rok, giong anun pla phun pơtơi čem hlô mơnŏng. Lơ̆m adai rơ-ŏt kơtang lĕ krư̆ rơmô kơbao amăng war. Lu sang anŏ thâo čem rông, wai lăng, mơmot puh glăi rơmô kơbao pơ sang, krư̆ amăng war, kih rơmet, kuăi eh, pruih jrao pơdjai mač kman na nao”.