![VOV Tây Nguyên/Nay Jek pơblang](/themes/custom/vov_4/images/avatar.png)
Ră anai, ƀing hyu blơi nao tơl đang hmua, dưm prăk pơkôl blơi boh sầu riêng ƀơi Dak Lak hăng rơnoh 80.000 truh 95.000 prăk sa kg, rơnoh anai sa tơlơi mơak amăng anih anom sĭ mơdrô. Khă tui anun, bruă pơsit rơnoh blơi, dưm prăk pơkôl hlâo tui anun, hŭi mơ̆n hơmâo mơnuih blơi ngă pơđĭ trun nua, leč đuăi ƀu gưt djơ̆ tui hră pơkôl, hơmâo mơtam tơdah rơnoh sĭ mơdrô boh sầu riêng đĭ trun lu. Hrŏm hăng anun lĕ, tơlơi bơrơsua, pơgô̆ sĭ blơi, klĕ dŏp, phă pơrai phun pla kah hăng hơdôm thun hlâo ăt hŭi hơmâo glăi mơ̆n, ngă kơ mơnuih ngă hmua ƀu hơđong pran jua. Ơi Y Khoan Kƀuôr dŏ ƀơi să Čư̆ Pơ̆ng, tơring glông Krông Ƀŭk, tơring čar Dak Lak brơi thâo:
“Ră anai tơlơi hơdip mơda hlăk hơđong, boh sầu riêng hlăk hơmâo nua, tơlơi bơwih ƀong huă sang anŏ pơđĭ kyar. Kâo ƀuh amăng plơi pla lu hlăk ai tơdăm dra gir run biă mă amăng bruă mă bơwih ƀong huă, gir run pla hăng wai lăng đang boh sầu riêng”.
![Hơdôm đang sầu riêng ƀơi Dak Lak prăp či pĕ boh thun 2024](https://vov4-media.solidtech.vn/sites/default/files/styles/large/public/2024-07/sau_rieng_1_-11.07.jpg)
Kiăng pơgang hơđong rơnuk rơna amăng bơyan pĕ boh sầu riêng, gong gai kơnuk kơna tơring čar ngă hrŏm tơhan kông an djop anih amăng tơring čar Dak Lak, dăp hơdră, pok pơhai akŏ bruă kơtưn hyu ĕp hăng pơgăn ƀing soh sat laih anun bruă ngă soh sat amăng bơyan pĕ boh sầu riêng thun 2024. Laih dơ̆ng, ĕp lăng djop anih răk pioh, pơdưm lui boh sầu riêng, hyu ĕp lăng amăng anih pla sầu riêng, boh nik ñu hmua ataih mơ̆ng sang, mơ̆ng plơi pla, krăo lăng bruă sĭ blơi boh sầu riêng, akŏ pơjing khul grup djru ba mơnuih ƀôn sang amăng mông pĕ boh sầu riêng hăng anih blơi, sĭ boh sầu riêng kiăng hơđong, rơnuk rơnua. Đại tá Trần Quang Hiếu, Kơ-iăng Khua gơnong bruă kông an tơring čar Dak Lak brơi thâo:
“Ƀing gơmơi amra hyu ĕp na nao kiăng thâo tơlơi pơhing, laih anun ngă hrŏm hăng djop gơnong bruă ƀơi tơring čar, kơtưn wai lăng pơgang hơđong bơwih ƀon huă, biă mă ñu pơdjơ̆ nao pơ kual pơkă gru pla, dưm amăng hruh hăng bruă sĭ mơdrô boh sầu riêng. Kiăng tañ ƀuh, pơsir hmao kru hơdôm ƀing ngă soh, sĭ mơdrô dŏp, ƀing hyu klĕ dŏp. Kơtưn bruă wai lăng mơ̆ng kơnuk kơna, ĕplăng tong ten mơnuih mut tơbiă mơ̆ng tač rơngiao, pơhlôm hơđong ƀơi jơlan glông, wai lăng bruă mă sĭ mơdrô kiăng ngă gêh găl brơi pơgang rơnuk rơnua hơđong amăng tơring čar”.
![Ƀing kông an să hyu ĕp lăng na nao djru pơgang đang sầu riêng ană plơi](https://vov4-media.solidtech.vn/sites/default/files/styles/large/public/2024-07/_sau_rieng_2_1.jpg)
Tơring čar Dak Lak ră anai hơmâo rơbêh 32.700 ha đang boh sầu riêng, amăng anun 16.000 ha hlăk pĕ boh, jing tơring čar hơmâo đơ đam boh sầu riêng prong hloh amăng dêh čar.thun 2023, boh sầu riêng ƀơi Dak Lak hơmâo pĕ pơhrui truh 285.00 tơn laih anun anai him lăng pơhrui glăi 300.000 tơn.
Viết bình luận