Ring bruă mrô 5 mơng akŏ bruă tuh pơ alin man pơkra anih anom djru brơi anom bơwih ƀong hrŏm pơđĭ kyar kual kơpla kơphê hiam hơdjă amăng kual Dap kơdư hơmâo: Man pơkra jơlan glông amăng ƀon lan dưi pơlir hăng hơdôm kual pla pơjing ƀơi Gia Lai, Dak Lak; man pơdong phrâo 3 boh sang pioh pơƀut kơphê brơi 3 anom bơwih ƀong sĭ mơdrô amăng tơring čar Dak Lak, đơ đam rơbêh 1.000 met karê. Man pơdong phrâo 2 sang pioh pơƀut hrŏm hăng pơdă prưng gơnam kơphê brơi anom bơwih ƀong hrŏm ƀơi tơring čar Gia Lai hăng Dak Lak hăng đơ đam 158 met karê sa boh sang. Abih tih prăk tuh pơ alin ring bruă mrô 5 giăm 80 klai prăk.

Bruă tuh pơ alin kiăng pơjing kual pla kơphê pok prong dưi pĕ pơhrui hmâo hmăi, pơplih phrâo, kiăng pơtrut tañ, ba glăi tŭ yua hăng hơđong kjăp amăng pơplih ngă hmua, man pơdong plơi pla phrâo amăng tơring čar Gia Lai, Dak Lak; pơđĭ kyar hăng hrưn đĭ pran gơgrong, ba glăi tŭ yua amăng bruă mă mơng hơdôm anom bơwih ƀong hrŏm kiăng pơhlôm ba glăi rơnoh yôm mơng kơphê amăng pơkra pơjing hăng sĭ mơdrô pơ tač rơngiao; pơgôp ngă hrưn đĭ tơlơi hơdip mơda brơi mơnuih ƀon sang.