Tom brơi (14/6), ƀơi plơi prong Buôn Ma Thuột, tơring čar Dak Lak, anom bruă pơsur ngă hmua dêh čar gum hrŏm hăng anom bruă kơsem min boh thâo ngă hmua, pla glai kual Dap kơdư hăng kông ti pơčuh ngăn kmơk Bình Điền pơphun jơnum pok pơhai jơlan hơdră “Pla kơphê rơgơi hluai tui ayuh hyiăng pơplih ƀơi kual Dap kơdư” rơwang thun 2023-2025. Jơlan hơdră hơmâo pok pơhai lông lăng ƀơi 15 boh tơring glông pla kơphê hăng pla pơplah hăng sầu riêng, tiu ƀơi kual Dap kơdư. Amăng mông jơnum, ƀing mơnuih apăn bruă hơmâo pơtop hrăm brơi hơdră jŭ yap glăi mơng rơbêh 500 boh sang anŏ pla kơphê ƀơi 5 boh tơring čar kual Dap kơdư.

Ơi Phan Văn Tâm, kông ti pơčuh ngăn kmơk Bình Điền brơi thâo: Jơnum djru brơi djop bơnah hluh rơđah dong kơ bruă mơng rĭm čô ding kơna amăng jơlan hơdră, mơng anun pơhlôm ba glăi tŭ yua hăng amra djru brơi klă hloh kơ mơnuih ƀon sang pla kơphê ƀơi kual Dap kơdư, djru mơnuih ngă hmua mă yua hăng tŭ mă hơdôm tơlơi dưi mơng jơlan hơdră tŭ yua hloh.