Anai lĕ tơlơi pơhing pôr amăng mông jơnum pok pơhai kơčăo bruă “Pla kơphê djơ̆ găl hăng anŏ pơblih ayuh hyiăng ƀơi Việt Nam” yua Gơnong bruă đang hmua hăng pơđĭ kyar plơi pla tơring čar Dak Lak ngă hrŏm anom bruă pơđĭ kyar dêh čar Hà Lan SNV pơphun tlam lơ 6/3. Kơčăo bruă anai djru kơ tơring čar Dak Lak 18 klai prăk. Thun blan ngă tui mơ̆ng blan 1/2024 truh blan 10/2028 ƀơi hơdôm anih pla kơphê tơnap tap hloh amăng tơring čar.

Tơhnal pơkă mơ̆ng kơčăo bruă anai lĕ pơsir tơlơi bơwih ƀong huă kơ 8000 boh sang anŏ pla kơphê đang anet tơnap tap kơƀah ia bruih hăng aka ƀu ngă hrŏm hơdră pla kơphê hơmâo hră pơsit hrăm bruă pla kơphê; mơ̆ng anun, pơđĭ tui tơlơi thâo hluh ngă tui djơ̆ găl kông ngăn lŏn mơnai glai klô, pơjing rai lu mơta mơnong hơdip, pơhrŏ ƀiă anŏ ba yua ia jrao, put jrao ngă kmơ̆k hơbâo pruai amăng bruă ngă hmua, đah mơ̆ng dưi pơgang tơlơi suaih pral kơ mơnuih mă bruă, pơđĭ tui boh tŭ yua wai lăng prăk kăk kơ mơnuih ngă hmua amăng bruă ngă hrŏ ƀiă djah sat, pơgang hơđong bong kjăp hăng anŏ pơblih ayuh hyiăng.