Buh ao pơđao, klŭm đuăn, băk akhăn sir amăng drơi jăn, tơkuai rơkông đok kiăng pơgang tơlơi suaih pral yua amăng adai rơ-ot trun 10 đô̆ C, amai Nguyễn Thị Yến, ding kơna sang bruă ngă ƀong hrŏm sĭ mơdrô gơnam đang hmua plơi Ngăm Mak, să Lãng Ngâm, tơring glông Gia Bình, tơring čar Bắc Ninh djă kơthung dưm rơsun toih hăng rơya sô̆ săn giong tui hăng tơlơi pơtô mơ̆ng ƀing mơnuih apăn bruă pơsur ngă hmua lăi brơi,  ba nao pruih amăng đang boh tơrong mơsăm, añăm hơbơi anung ƀiă truh hrơi pĕ pơhrui pioh pơgang arong aruač hŭi ngă sat. Amai Yến brơi thâo, lơ̆m ƀing khua mua apăn bruă pơsur ngă hmua hăng wơ̆t ƀing mơnuih rơgơi kơhnâo bruă hmua dêh čar Japan pơtô brơi hơdră pla pơjing tui mơneč phrâo ia rơgơi pla añăm rơgoh, huăi yua hơbâo pruai kmơ̆k ia jrao, kơnong mă yua kmơ̆k pruai djah djâo pơkra rơgoh mơ̆ng Japan, ñu ƀuh añăm pơtam boh troh, boh hiam, lôm, ƀong jơman, sĭ hơmâo rơnoh yôm mơ̆n:

“Ngă hmua pla añăm tui hơdră pơtô mơ̆ng dêh čar Japan ƀu tơnap lơi. Ƀing gơmơi ngă tui djơ̆ tơlơi pơtô ba, čih pioh amăng hơdrôm hră, ƀu pruih ia jrao ôh kơnong sô̆ rơya hăng rơsun toih pioh pruih pơgang arong aruač hlăt pơčram. Ngă hnun tŭ yua biă mă”.

Sang bruă ngă ƀong hrŏm gah đang hmua plơi Ngăm Mak, să Lãng Ngâm, tơring glông Gia Bình, tơring čar Bắc Ninh lĕ sa amăng boh anom bruă ngă ƀong hrŏm dưi hơmâo Anom bruă pơsur ngă hmua dêh čar hăng Anom bruă ngă hrŏm jar kmar dêh čar Japan Jica djru pơtô hrăm brơi mơnuih ngă hmua pla pơjing tui hơdră phrâo djơ̆ hnơ̆ng mơ̆ng dêh čar Japan hăng djru pơblih tơlơi pơmin bruă mă ĕp anih sĭ mơdrô “Pla pioh sĭ” pơhrua kơ bruă juăt ngă “Sĭ anŏ hơgĕt ta pla”.

Ơi Phan Duy Phương, Khua anom bruă ngă ƀong hrŏm đang hmua plơi Ngăm Mak, să Lãng Ngâm, tơring glông Gia Bình, tơring čar Bắc Ninh brơi thâo, pioh prăp lui ĕp anih sĭ mơdrô gơnam têt Giáp Thìn 2024, anom ngă ƀong hrŏm hơmâo prăp lui laih 200 tơn boh kruăi, giăm 300 tơn añăm pơtam boh troh, hơbơi pơtơi djop mơta, ƀuăn hăng gơnam sĭ mơdrô hơdjă rơgoh djơ̆ tơlơi pơkă VietGap, hơmâo tem ƀlir pơthâo rơđah anih pla, pô gơnam anun tong ten biă mă:

“Hlâo adih ăt pla añăm pơtam mơ̆n, pla añăm hơbơi anung, pla tơmun ia djop mơta, mơ̆ng hơmâo anom bruă Jica glăi pơ anai lĕ pla pơjing djơ̆ rơ-ua hloh, boh glăi boh tŭ yua, ƀing gơmơi pơđĭ kyar bơkơnar hăng huăi hơmâo hlăt pơčram arong aruač ngă ôh, anih ba sĭ mơdrô hơđong mơ̆n, hră rơkâo blơi hơmâo na nao ƀu djop añăm ba sĭ, têt anai gơmơi ba nao djop mơta añăm man ƀrô djop rơnoh pơkă đôč, ƀu ba nao rơbêh ôh, kiăng dưi ba truh pơ mơnuih pô blơi thâo krăn añăm pơtam mơ̆ng sang bruă ngă hmua pla hrŏm jing añăm pơtam rơgoh hơdjă”.

Ƀơi anom bruă ngă hmua pla pơjing hăng sĭ mơdrô gơnam đang hmua rơgoh Bạch Đằng, plơi Đại Uyên, să Bạch Đằng, plơi prong Kinh Môn, tơring čar Hải Dương, hơdôm đang boh kuga juăt lăi Thanh Long hơtai mriah pơmin pla pơ kual gah dơnung đôč. Boh kuga djuai boh lu mơnuih hor ƀong, čơkiă dưm pơdă amăng jam ngă yang bơyan têt ƀudah pơdă boh dŏ hnơ̆ng mơtam či ngă yang hrơi têt. Ơi Nguyễn Văn Thuấn, Khua anom bruă ngă ƀong hrŏm hăng sĭ mơdrô boh troh đang hmua rơgoh Bạch Đằng brơi thâo, boh kuga ƀơi plơi pla gơñu hiam biă mă, ƀong jơman kar hăng boh kuga pla pơ kual dơnung mơ̆n:

“Pla boh troh hơmâo boh ƀu djơ̆ bơyan phiăn boh, sĭ hăng rơnoh pơmă hloh. Ta dưi lăi, anŏ pơhno nao rai sĭ mơdrô ñu gêh găl hloh kơ boh kuga mơ̆ng dơnung. Mơ̆ng kual dơnung ba sĭ mơdrô khom pơgiăng nao hơdôm hrơi krah jơlan, lơ̆m anun boh kuga pla pơ kual gah kơdư mơtam lĕ tơsă boh phun mơtam, boh ƀong jơman hloh, sĭ mơdrô pơ anih anom sĭ mơdrô pơ kual gah kơdư mơtam anun pơhno klă hloh”.

Laih ĕp lăng hơdră ngă hmua pla pơjing ƀơi Bắc Ninh, Hải Dương, Hưng Yên, ơi Naoki Kayano, mơnuih kơhnâo kơhnăk mơ̆ng anom bruă Jica bơni biă mă, mơnuih ngă hmua gum hrŏm, djop sang bruă ngă ƀong hrŏm laih anun hơmâo tơlơi djru hrŏm mơ̆ng anom bruă pơsur ngă hmua. Ñu lăi, bơyan têt anai amra djơ̆ mông lu anih anom rơkâo blơi laih anun mông gêh găl kơ mơnuih ngă hmua sĭ boh troh gơnam tam đang hmua. Mơnuih ngă hmua pla pơjing khom thâo tañ anŏ kiăng amăng anih sĭ mơdrô, kơnang kơ bruă mă pôr tơlơi pơhing. Jica amra ngă hrŏm anom bruă pơsur ngă hmua dêh čar laih anun hăng lu anom bruă pơsur ngă hmua djop tơring čar pioh pơphun lu wơ̆t jơnum pơtruh nao rai, bơkơtuai ƀudah pơčrong sai kiăng pơtrut hăng pơđĭ kyar hloh bruă ngă hmua rơgoh hơdjă ƀơi Việt Nam.

Tui hăng Khua anom bruă pơsur ngă hmua dêh čar, Lê Quốc Thanh, mơ̆ng boh tơhnal tŭ yua blung a, thun blan pơ anăp adih, anom bruă pơsur ngă hmua dêh čar hăng anom bruă Jica ăt pok prong djru lu hơdră ngă phrâo kơ hơdôm anom bruă ngă ƀong hrŏm laih anun hăng mơnuih ngă hmua:

“Pơ anăp anai, ƀing gơmơi amra ruah thim 50 boh anom ngă hrŏm hăng pơjing anih ngă hmua pla pơjing mơ̆ng ƀing ta dưi pok prong na nao jing kual ngă hmua pla pơjing rơnuk rơnua hơdjă rơgoh. Laih anun gơnam ngă hmua mơ̆ng ƀing ta ƀu kơnong tui rim tal ôh, ƀrô djơ̆ tal ƀing ta sĭ amra hơmâo boh troh, añăm pơtam hơdjă rơgoh abih amăng ha thun”.

Têt lĕ mông gêh găl ba sĭ mơdrô djop mơta boh troh đang hmua, mơnong ƀong huă; boh nik ñu djop mơta boh troh, añăm pơtam, hơbơi pơtơi hơdjă djơ̆ hnơ̆ng pơkă khut khăt mơ̆ng dêh čar Japan, amra hơmâo lu mơnuih blơi. Djop sang bruă ngă hmua bơwih ƀong hrŏm brơi thâo, amra gir run hloh djă pioh gơnam sĭ mơdrô boh troh đang hmua pla pơjing hơdjă rơgoh pioh sĭ mơdrô kơ mơnuih blơi ƀu kơnong amăng hrơi ƀong têt pơ anăp anai đôč ôh.