Jơnum anai, kiăng pơsir tơlơi tơnap tap mơ̆ng anom bruă bơwih ƀong sĭ mơdrô, brơi dưi čan prăk amuñ hloh kơ hơdôm sang bruă bơwih ƀong sĭ mơdrô amăng kual Dap Kơdư hăng pơtrut bơwih ƀong huă mơnuih mơnam pơđĭ kyar.

Amăng 2 thun rơgao, gơnong sang bruă prăk dêh čar hơmâo lu jơlan hơdră pioh pơtrut pơsir brơi anom bơwih ƀong sĭ mơdrô dưi tŭ mă prăk čan kiăng pơsir tơlơi tơnap tap yua bơbeč djơ̆ klin kheng Covid 19 ngă ăt kah hăng bơbeč djơ̆ tơlơi bơwih ƀong huă, kơđi čar ƀơi rŏng lŏn tơnah rung răng jai kơtang. Samơ̆ bruă sĭ mơdrô hăng jao rơnoh prăk čan kơ djop anom bruă bơwih ƀong sĭ mơdrô amăng dêh čar hăng amăng kual Dap Kơdư dŏ lu tơlơi tơnap tap biă mă anun rŭ đĭ bơwih ƀong huă kaih hăng rơnang  đôč.

Yă Trần Thị Lan Anh, Kơ-iăng khua kông ty mơnuih ƀôn sang ngă pô Vĩnh Hiệp brơi thâo, sa boh sang bruă sĭ mơdrô kơphê, ba nao pơ tač rơngiao ƀơi tơring čar Gia Lai: Yua tơnap čan prăk anun lu sang bruă bơwih ƀong sĭ mơdrô ƀu djop rơnoh prăk blơi hăng pơpha bruă mă. Tơlơi anai, ba truh tơlơi hơmâo arăng blơi gơnam juă nua yua kơphê lu đơi amăng bơyan pĕ boh, sĭ mơdrô amăng ƀiă blan đôč.

“Sa bruă phara biă mă gah anom bruă kơphê yua tơki kơ bơyan pĕ boh, prăk kiăng ba yua hmao kru lĕ lu biă mă, anun yơh kiăng hơmâo hơdră phru ƀiă hơdră čan prăk kiăng ngă gêh găl kơ sang bruă sĭ mơdrô, brơi čan đah mơ̆ng dưi pơblih hăng ba yua rơnoh prăk mơ̆ng tač rơngiao blơi gơnam sĭ mơdrô, kah hăng ră anai, hơdră brơi čan prăk kiăng hơmâo kông ngăn song mă ngă anŏ gơgrong lĕ ƀu găl đơi ôh hăng bruă pơkra ming gơnam sĭ mơdrô mơ̆ng hơdôm sang bruă sĭ mơdrô hăng tač rơngiao”.

Yă Huỳnh Thị Thùy Trâm, Khua kông ty JFT Việt Nam ƀơi Lâm Đồng lăi, tơlơi tơnap tap kơƀah prăk čan kơ anom bruă bơwih ƀong sĭ mơdrô boh troh đang hmua pơdjơ̆ nao bruă čan prăk khom hơmâo kông ngăn gơgrong, gah sang bruă prăk brơi čan hăng rơnoh prăk ƀiă đôč. Yă Trâm rơkâo đĭ hơdôm sang bruă prăk hăng kơnuk kơna dêh čar khom hơmâo hơdră pơsir kơ tơlơi anai:

“Čang rơmang gah sang bruă prăk kơnuk kơna hrŏm hăng jơlan hơdră mơ̆ng kơnuk kơna pơtrun dưi pơsir hĭ hơdôm tơlơi pơkă kơ kông ngăn ngă anŏ gơgrong. Sa tơlơi dơ̆ng kiăng rơkâo đĭ anŏ pơhlôm nua kông ngăn sit hơmâo tơlơi truh hơgĕt thâo lŏn adai ngă anom bruă pơhlôm nua ăt djru kơ sang bruă prăk hmao kru hăng anom bơwih ƀong sĭ mơdrô hnun kah dưi djru kơ bruă sĭ mơdrô huăi tơ̆i đưn”.

Tơdơi kơ hmư̆ hơdôm tơlơi rơkâo anun mơ̆ng khua mua djop sang bruă bơwih ƀong sĭ mơdrô hăng hơdôm tơlơi pơblang glăi mơ̆ng sang bruă prăk sĭ mơdrô, ơi Đào Minh Tú, Kơ-iăng khua sang bruă prăk kơnuk kơna Việt Nam lăi, anom bruă prăk amra pok pơhai lu hơdră pơsir tơlơi tơnap tap, kiăng pơtum ngăn rơnoh prăk brơi sang bruă bơwih ƀong sĭ mơdrô čan pơđĭ kyar bơwih ƀong huă ƀơi kual Dap Kơdư. Sa amăng hơdôm bruă či ngă pơ anăp adih, git gai djop sang bruă prăk brơi čan anăp nao kơ bruă sĭ mơdrô, hơdôm bruă đing nao hlâo, hơdôm mơta gơnam sĭ mơdrô troh đang hmua amăng kual pla kơphê, kơsu, tiu, boh troh....kiăng ngă gêh găl brơi mơnuih ngă hmua hăng sang bruă sĭ mơdrô dưi tŭ mă prăk čan, djru pơgăn hĭ bruă čan prăk gah rơngiao kơmlai lu.

Rơngiao kơ anun, hơdôm sang bruă prăk khom pơhrŏ ƀiă kơmlai čan hăng rơnoh prăk čan laih anun hnoh dŏ dong, jŭ yap glăi, pơhrŏ ƀiă rơnoh prăk apah kiăng ngă gêh găl amuñ hloh kơ sang bruă sĭ mơdrô, mơnuih ƀôn sang, pơkra hơdră, prăk čan kơmlai man ƀrô; ngă hră pơar amuñ hloh.

Ơi Đào Minh Tú, Kơ-iăng khua anom bruă prăk kơnuk kơna Việt Nam brơi thâo, tơdơi kơ jơnum anai, sang bruă prăk kơnuk kơna amra git gai djop sang bruă prăk tañ pok pơhai lu hơdră djru kơ anom bruă bơwih ƀong sĭ mơdrô dưi čan prăk:

“Ƀing gơmơi amra git gai sang bruă prăk ngă hmua hăng pơđĭ kyar plơi pla Việt Nam amra ngă hrŏm sang bruă prăk sĭ mơdrô pơkŏn kơsem min lăng tong ten laih anun tañ ba tơbiă jơlan hơdră pơsir hmar tañ hloh rŭ pla glăi kơphê hăng hơdôm phun pla phun pơkŏn. Dua dơ̆ng lĕ djru bruă blơi pơmut, pơkra ming, sĭ mơdrô kiăng tŭ yua hloh. Amra git gai sang bruă prăk sĭ mơdrô khom hmar ƀiă, pơsir brơi djop sang bruă sĭ mơdrô laih anun djru pơhlôm prăk čan rơnuk rơnua”.

Tui hăng tơlơi jŭ yap, rơnoh prăk čan amăng kual Dap Kơdư truh lơ 30/9/2023 hơmâo brơi čan 508.000 klai, đĭ tui 6% pơkă hăng rơnuč thun 2022 hăng năng ai rơbêh 4% rơnoh prăk dong hnưh amăng tơlơi bơwih ƀong huă. Amăng anun, prăk čan gah bruă ngă hmua, kual plơi pla lĕ 297.000 klai, đĭ tui rơbêh 3% pơkă hăng rơnuč thun 2022, dưm dưm hăng rơnoh pơhrui rơbêh 58% pơkă abih rơnoh prăk dong hnưh amăng kual.