Jing mơnuih ngă khua mơ̆ng Anom bruă pơtrut pơsur ngă hmua tơring čar Gia Lai, mơ̆ng hrơi grup pơtrut pơsur ngă hmua plơi pla să Ia Băng tơring glông Đăk Đoa hơmâo akŏ pơdong, ayong Bùi Văn Thuận hơmâo thim bruă pơtô ba, gum hrŏm hăng mơnuih pơkŏn amăng grup. Hrŏm ha grup pơtrut pơsur ngă hmua hăng ayong Thuận, hơmâo mơnuih jing mơnuih ngă hmua rơgơi, hơmâo mơnuih lĕ kĭ sư ngă hmua....Hrơi anai, gơñu nao pơ rim blah đang, rim boh sang anŏ ngă kơphê či djru, pơtô ba neh met wa pla phrâo phun kơphê vô̆i tha jing pla djuai phrâo dong, ngă tui hơdră pla kơphê hơmâo hră pơsit 4C.

Mơta pơkŏn dong, grup pơtrut pơsur ngă hmua amăng plơi ăt pơphun pơtŏp brơi neh met wa ngă hmua kơ boh thâo ngă hmua tui hră pơsit, wai lăng gơnam yua ngă hmua mơ̆ng blung a. Kual pơkra gơnam pơhlôm klă, djŏp kơ mrô lŏn ngă hmua, grup djru ba neh met wa pơtruh hăng anom bơwih ƀong či sĭ hơmâo nua pơmă hloh. Ayong Thuận brơi thâo tơdơi kơ boh tŭ yua blung a mơ̆ng hơbô̆ bruă anai, tơring glông Phú Thiện hăng tơring glông Čư̆ Prong ăt hrăm tui hăng akŏ pơdong thim 9 grup pơtrut ngă hmua ƀơi hơdôm kual ngă hmua pơdai, pla boh troh mơ̆ng tơring glông:

“Mah 2 grup phrâo akŏ pơdong đôč samơ̆ ăt hơmâo pơtô brơi kiăng pơđĭ tui tơlơi apăn bruă. 2 grup ăt jơnum, čih pơkra bruă mă amăng hrơi blan pơ anăp. Tal sa lĕ pơtruh hăng hơdôm boh kông ti či kĭ hră ba gơnam mă yua blung a hăng ba sĭ gơnam mơ̆ng mơnuih ngă hmua”.

Tui anun mơn, ƀơi tơring čar Kon Tum, ơi Đới Văn Cương, Khua grup pơtrut pơsur ngă hmua să Hà Mòn (tơring glông Đăk Hà, tơring čar Kon Tum) brơi thâo, kơnong amăng 1 thun ngă bruă, grup hơmâo ngă hrŏm hăng Anom pơtrut pơsur ngă hmua tơring čar Kon Tum pơphun hơdôm pluh anih pơtô hrăm, jao glăi boh thâo kĭ thuâ̆t ngă hmua; pok pơhai 3 hơbô̆ bruă pla plah sầu riêng amăng đang kơphê, pla glăi phun kơphê kơjăp, pla plah phun mắc ca amăng đang kơphê...

Truh ră anai, ƀơi Kon Tum, hơmâo 840 boh sang anŏ ngă kơphê hơmâo mă tơlơi gum djru mơ̆ng grup pơtrut pơsur ngă hmua amăng plơi, hơmâo akŏ pơdong kual ngă kơphê tui hơnong pơkă 4C hơdôm rơtuh ha, laih anun glăk pok prong tui. Yua hơmâo ngă kơphê 4C mơ̆ gơnam neh meh wa pơkra lêng kơ hơmâo blơi nua pơmă hloh kơ kơphê xô. Ơi Cương čang rơmang hrơi blan pơ anăp, hơbô̆ bruă pơtrut pơsur ngă hmua hơmâo blơi thim măi mok, boh thâo ngă hmua kiăng ding kơna amăng grup mă bruă klă hloh.

“Yua anai lĕ anom bruă hlong djru mă pô, anun anom bruă pơtrut pơsur ngă hmua amăng plơi kơƀah măi mok gơnam yua. Tal dua aka ƀu thâo hluh kơ anih sĭ mơdrô, pơtruh nao rai pơka gơnam, pơplih mrô amăng bruă ngă hmua. Rơkâo anom bruă pơtrut pơsur ngă hmua Dêh čar hrơi blan pơ anăp hrăm bruă hloh dong kiăng pơđĭ tui tơlơi rơgơi apăn bruă mơ̆ng grup pơtrut pơsur ngă hmua plơi pla kual ngă hmua laih anun djru gơnam yua kơ hơdôm grup, biă ñu lĕ măi mok gơnam yua pioh pơtô hrăm kah hăng măi computer, telephôn”.

Hơbô̆ bruă pơtrut pơsur ngă hmua hăng kual ngă hmua pla kơphê, hơmâo Anom bruă pơtrut pơsur ngă hmua Dêh čar, Ding jum Ngă hmua hăng Đĭ kyar plơi pla pok pơhai ƀơi 5 boh tơring čar kual Dap Kơdư truh ră anai giăm 2 thun laih. Tui anun, rim boh tơring čar hơmâo 2 grup pơtrut pơsur ngă hmua amăng plơi ƀơi kual ngă hmua pơkra gơnam. Hrơi blan rơgao, hơdôm grup pơtrut ngă hmua amăng plơi hơmâo djru ba mơnuih ƀôn sang, hơdôm anom ngă ƀong hrŏm kơ boh thâo ngă kơphê tui hơnong pơkă, pok prong kual ngă kơphê hơđong kiăng pơđĭ tui anua. Hrŏm hăng anun, pơtruh nao rai hăng anom bơwih ƀong hmư̆ hing či ba sĭ kơphê hơmâo hră pơsit hăng nua lăp djơ̆.

Amăng hơdôm thun laih rơgao, hơbô̆ bruă pơsur ngă hmua amăng djop ƀon lan ƀơi kual Dap kơdư hơmâo pơdah tơlơi gơgrong yôm phăn hăng bruă pok prong hăng hrưn đĭ klă dong ƀơi hơdôm kual pla đang kơphê. Kiăng thâo rơđah dong kơ hơbô̆ bruă grup pơsur ngă hmua ƀon lan, jơlan gah hrưn đĭ klă dong bruă mă mơng hơdôm grup, pô mă tơlơi pơhing črăn hơdră hơmâo mông bơră ruai hăng ơi Lê Quốc Thanh-Khua anom bruă pơsur ngă hmua dêh čar.

- Kơkuh kơ ơi Lê Quốc Thanh! Blung hlâo, ih dưi lăi pơthâo mơn, pơhmu hăng hơnong pơkă mơng akŏ bruă ngă lông lăng, boh tŭ yua sit nik mơng hơdôm hơbô̆ bruă pơsur ngă hmua ƀơi ƀon lan ba glăi hiưm pă ñu ?

Ơi Lê Quốc Thanh: Ră anai, kơ akŏ bruă pơjing grup pơsur ngă hmua ƀơi ƀon lan pơphun amăng đơ đam dêh čar, ƀing gơmơi dưi lăi, anai lĕ boh than ba glăi rơgao hăng hơnong pơkă ngă lông lăng. Hơdôm boh ƀon lan, djop anom bruă, glăk mut hrŏm lu biă mă, sit biă ñu lĕ hơdôm kual ngă lông lăng ƀơi hơdôm đang pla kơphê ƀơi kual Dap kơdư, djop grup pơsur ngă hmua ƀơi ƀon lan phrâo akŏ pơjing, dưi pok pơhai mă bruă, hơmâo lu grup dưi ngă tui hơdôm boh than klă hloh. Tơlơi čang rơmang mơng ƀing gơmơi lĕ akŏ pơjing hơdôm grup pơsur ngă hmua amăng ƀon lan kiăng ngă hiưm pă pơlir hơbit kơplah wah hơdôm anom bruă boh thâo măi mok, pơlir hăng anom bơwih ƀong sĭ mơdrô, laih dong hơdôm anih anom sĭ mơdrô. Ră anai, hơdôm grup pơsur ngă hmua ƀơi ƀon lan glăk pok pơhai klă hloh hăng ba glăi boh tŭ yua.

- Tui ih pơmĭn, bruă mă mơng hơdôm grup pơsur ngă hmua ƀơi ƀon lan ƀơi kual pla kơphê hơmâo tơlơi tơnap tap hiưm ñu ?

Ơi Lê Quốc Thanh: Bruă mă mơng hơdôm grup pơsur ngă hmua ƀon lan hơmâo djop mơta, yua ƀu hơmâo hơbô̆ bruă pơhmutu pơpă ôh. Hăng anai lĕ ƀing gơmơi kơtưn klă dong bruă mă amăng grup pơsur ngă hmua ƀon lan ngă hiưm pă jak iâu, pơsur djop bơnah, djop anom bruă mut hrŏm amăng hơdôm bruă pơsur ngă hmua. Yua anun tơlơi ngă tơnap tap hloh lĕ bruă mă mơng hơdôm anih anom ngă hmua mơng ƀing ta aka ƀu ha amăng plĕ. Đa hơmâo anih, ƀing mơnuih mă bruă klă amra dưi pơđĭ kyar, dưi pơlir hơbit klă. Bơ hơdôm anihmơ̆ mơnuih apăn bruă gah pơsur ngă hmua aka ƀu lăp djơ̆ ăt dŏ tŏ tui kiăng ngă hiưm pă kơtưn amăng pơtô pơjuăt ƀing apăn bruă.

- Dơnun tui ih pơmĭn, pơ anăp anai, hơdôm grup pơsur ngă hmua amăng ƀon lan ƀơi kual Dap kơdư kiăng pơplih pơkra tơlơi hơget amăng bruă mă mơng anun pơgôp ngă tui bruă pơlir hơbit sĭ mơdrô kơplê ?

Ơi Lê Quốc Thanh: Ƀing gơmơi lăng grup pơsur ngă hmua amăng ƀon lan, ñu amra tŭ mă djop mơta tơlơi, ƀu djơ̆ kơnong boh thâo măi mok đôč ôh mơ̆ ăt anai lĕ hơdôm bruă kiăng pơlir hăng hơdôm anih anom sĭ mơdrô. Yua anun kiăng hơmâo hơdôm tơlơi pơhing tong ten, lăp djơ̆ hăng tơlơi gak bơwih ƀong, laih anun pơlir kơplah wah hơdôm anom bơwih ƀong sĭ mơdrô, hơdôm anom bruă blơi mut hăng sĭ mơdrô. Hăng ăt ngă tui hơdôm bruă jao pơkŏn dong. Yua anun yơh, bruă ba ƀing mơnuih ania mut amăng ngă bruă amăng hơdôm grup pơsur ngă hmua ƀon lan hơmâo pơtrut pơsur tơdruă. Anai lĕ ƀing mơnuih ngă tui gah boh thâo măi mok kah hăng kiăng thâo hluh ƀiă dong tơlơi bơdjơ̆ nao mơng boh thâo phrâo nao hơdôm anih anom sĭ mơdrô; laih dong hơdôm anom bruă tŭ yap kiăng gum hrŏm mơng hrơi akŏ pơjing bruă bơwih ƀong; laih dong hơdôm anom bruă ngă hrŏm, mơng anun pơđĭ kyar ƀing mơnuih mă bruă. Ngă hiưm pă kiăng ƀing ta dưi pơjing anih pơlir hơbit sĭ mơdrô, bruă anai kiăng ngă hơđong mơng hrơi blung a. Ƀing ta pơjing akŏ bruă brơi hơđong kjăp wŏt amăng bruă gum hrŏm ngă tui. Hăng tuč rơnuč lĕ ƀing ta kiăng kjăp sa tơlơi anun lĕ hơdôm bruă gum hrŏm tui anun, ƀing ta amra hơmâo sa gơnam sĭ mơdrô lăp djơ̆ hăng rơnoh ƀing ta tuh pơ alin. Sa tơlơi dong lĕ lơm ngă klă ƀing ta amra hơmâo anih sĭ mơdrô.

- Ơ ơi, pơ anăp anai, anom bruă pơsur ngă hmua dêh čar amra djru brơi, gum hrŏm hăng hơdôm grup pơsur ngă hmua ƀon lan hiưm pă ñu kiăng hơbô̆ bruă anai dưi pơhlôm hơđong kjăp hăng ba glăi tŭ yua ?

Ơi Lê Quốc Thanh: Bruă yôm hloh lĕ ngă hiưm pă kiăng bơrơguăt bruă brơi ƀing apăn bruă. Hlâo adih, hơmâo pơtô hrăm tui jơlan hơdră rĭm bruă phara samơ̆ tui tơlơi sit nik, hơdôm bruă anai kiăng hơmâo anih ngă bruă sit nik. Mơnuih ngă bruă gah pơsur ngă hmua kiăng thâo hluh rơđah lu mơta dong, rơngiao kơ bruă phun mơng ƀing gơñu. Rĭm thun, anom pơsur ngă hmua dêh čar pơphun na nao hơdôm anih pơtô hrăm, jak iâu ƀing rơgơi kơhnâo amăng djop mơta bruă phara kiăng pơtô hrăm brơi ƀing apăn bruă dưi ngă tui hơdôm hơdră phrâo, tŭ mă hơdôm bruă phrâo hăng hơmâo djop gơnam măi mok, boh thâo kiăng djru bruă bruă mă tong ten, gơgrong hloh, tŭ yua.

- Hnun hă! bơni kơ ih, ơi Lê Quốc Thanh hŏ!