Anai lĕ tal blung gơnam sĭ mơdrô mơ̆ng boh durian (sầu riêng) dưi pơkă djơ̆ hơnơ̆ng brơi pel ĕp anŏ hơdjă rơgoh huăi đôm ia jrao ƀudah kmơ̆k ia jrao amăng gơnam sĭ mơdrô pơjing mơnong ƀong amăng dêh čar ta, pơhlom abih bang djop mơta gơnam pơkra ming, yap mơ̆ng bruă pla pơjing, truh pĕ boh, pơkra rai gơnam sĭ mơdrô, pơdŭ pơgiăng hyu, răk pioh, pơđôm lui sui hrơi blan truh kơ bruă dưm amăng kơdung, hruh gơnam sĭ mơdrô ba nao pơ tač rơngiao.

Tui hăng ơi Lê Anh Trung-Khua khul Sầu riêng Dak Lak, hơdră ĕp lăng anŏ hơdjă mơnong ƀong huă hơmâo čih pơkra tal anai gêh găl hăng bruă sĭ mơdrô boh durian (sầu riêng) mơ̆ng Việt Nam hăng tơlơi pơtrun mơ̆ng dêh čar tač rơngiao blơi pơmut.

“Tơlơi pơkă anai hơmâo tom khul bruă pla pơjing hăng sĭ mơdrô boh sầu riêng, mơ̆ng bruă pla, blơi boh, pơkra ming hăng dưm amăng kơdung, hruh ba sĭ. Khom nhă djop tơlơi pơtrun, sang bruă mơdrô hăng mơnuih ƀôn sang ngă tui djop tơlơi pơtrun mơ̆ng anih blơi gơnam sĭ mơdrô pơ tač rơngiao. Anai lĕ, atur tơlơi phiăn pơkă yom biă mă, djru kơ anom bruă huăi sư̆ rơbư̆ ƀơi anăp kơ tơlơi pơgăn phrâo kơ hơdră pơkă lăng gơnam sĭ mơdrô amra hơmâo kơñ pơgi ni anăp”.

Lăng yom tơlơi pơkă phrâo anai mơ̆ng Ding jum Ngă hmua hăng Ayuh hyiăng, ơi Vũ Ngọc Huy, Kơ-iăng khua anom bruă phun kông ty pơčruh ngăn sĭ mơdrô Dũng Thái Sơn-brơi thâo, lu sang bruă sĭ mơdrô hlâo adih dir wir yua kơƀah tơlơi pơtô ba. Samơ̆ ră anai, tơlơi pơkă phrâo anai, pơjing rai atur tơlơi phiăn, djru ngă sa hơnơ̆ng tơlơi pơtrun mơ̆ng sang bruă pla pơjing, truh sang bruă sĭ mơdrô:

“Bruă kiăng ƀing sĭ mơdrô hyu blơi ƀơi đang mơtam lĕ, khom čih anăn hăng gong gai kơnuk kơna plơi pla ƀudah hơmâo anŏ pơsit gêh găl rơđah rơđong djru kơ bruă wai lăng mơ̆ng kơnuk kơna tŭ yua hloh, djơ̆ hăng tơlơi pơtô mơ̆ng tơring čar...Anun lĕ tơhnal pơkă klă pioh kơ anom bruă nao djơ̆ jơlan, pơđĭ tui boh tŭ yua hơđong”.

Gah anom bruă gong gai kơnuk kơna wai lăng amăng bruă mă anai, ơi Nguyễn Minh Huấn, Khua Gơnong bruă Ngă hmua hăng Ayuh hyiăng tơring čar Dak Lak brơi thâo, anom bruă ngă hmua hơmâo pơtong rơđah Hră pơtrun mrô 3015 mơ̆ng Ding jum Ngă hmua hăng Ayuh hyiăng lĕ sa tơlơi phiăn phun kơnang yom biă mă pioh pơđĭ tui bruă mă pel ĕp hơnơ̆ng pơkă hiam mơnong ƀong huă pơkra ming mơ̆ng boh sầu riêng.

Gơnong bruă Ngă hmua hăng Ayuh hyiăng hlăk ngă hrŏm hăng djop să, plơi pla, sang bruă mơdrô hăng khul grup pơtô lăi, pơhrăm glăi kơ mơnuih ngă hmua, mơnuih hyu blơi sĭ glăi boh sầu riêng thâo tơlơi pơtrun phrâo, laih dơ̆ng rơkâo djop plơi pla, tơring čar ngă tui tơpă tơlơi pơtrun krăo lăng anŏ hơdjă mơnong ƀong huă, hơduah ĕp phun tơdŭ, pơhlom tơlơi tơpă, rơđah rơđong hăng sem lăng tơlơi truh či hơmâo tañ hloh. Ơi Nguyễn Minh Huấn brơi thâo:

“Gơnong bruă ngă hrŏm anom bruă pla pơjing hăng pơgang phun pla laih anun jơnum min mơnuih ƀôn sang djop să, phường pơđĭ tui tơlơi thâo hluh kơ bruă wai lăng anŏ hơdjă hăngrơnuk rơnua mơnong ƀong huă; kơtưn amăng bruă wai lăng pla, pơjing đang boh sầu riêng djơ̆ tơlơi pơkă, tơhnal pơtrun pơgang anŏ pơblih ayuh hyiăng lŏn tơnah; kơtưn hyu ĕp lăng, sem tong ten tơlơi hơdjă hăng rơnuk rơnua mơnong ƀong laih anun gru mrô pơkă kual pla, ngă hmua hăng sang bruă dưm amăng kơdung, hruh sĭ boh sầu riêng”.

Bruă Ding jum Ngă hmua hăng Ayuh hyiăng čih pơkra hơdră pel ĕp anŏ hơdjă rơgoh boh sầu riêng, ƀu kơnong ngă djơ̆ hmao kru tơlơi kiăng mơ̆ng anom blơi pơ dêh čar tač rơngiao đôč ôh, dŏ jing sa yak bruă, pơdah rơđah tơlơi pơtrun pơtô ba mơnuih ngă hmua Việt Nam thâo atur tơlơi phiăn pơkă rơđah rơđong. Tơlơi bơ tŭ ư hrŏm mơ̆ng khul wai lăng bruă sầu riêng, khul mơnuih ngă bruă sĭ mơdrô hăng gong gai kơnuk kơna plơi pla brơi ƀuh, anom bruă sĭ mơdrô boh sầu riêng Việt Nam hlăk ngă djơ̆ sa jơlan ngă tui hơdră pơđĭ kyar tơpă, hơđong kơjăp hăng kơhnăk hloh.