Lăng trun mơ̆ng dlông mă rup, ƀuh 18 boh anih lŏn kơdư ƀit ƀut pơtir hơbit kah hăng čơlŭ mong arăng pơkup lui čơčruai hăng đơ đam prong rơhaih truh 30 hektar mơ̆ng kual lŏn Dap Kơdư Sipa Phin hyơ hyơr ia mơtah mơda hla añăm pơtam. Lơ̆m sa blah đang arăng pơkă hnơ̆ng tơpă bơbrăng pơjing king hmua pla añăm, đang hơbơi pơtơi, tui hluai kơ bơyan, arăng pla amăng đang ngă sang hơñôl sreh, sang mơnil kơsu phrâo hiam.

Ơi Vàng A Kỷ, Khua git gai ping gah să Sipa Phin brơi thâo, abih bang amăng kual anai hlâo adih lŏn ngă hmua pla pơjing pơpha brơi kơ ană plơi nao dŏ ƀơi plơi phrâo. Hlăk tal pơdong plơi phrâo thun 1992, mơnuih ƀôn sang arăng djru ba pla tơbâo, pla kyâo, pơgang glai rưng samơ̆ ƀu hơmâo boh tŭ yua đơi ôh yua kơ tơbâo pla pơkra sik ƀu hơmâo anih ba sĭ mơdrô, ƀu hơmâo sang măi djet ia tơbâo pơkra sik hiam; kơčăo bruă pla kyâo glai, phun kyâo hơdip ƀu lu ôh bơyan phang adai không djai krô abih.

Tơlơi hơdip mơda mơnuih ƀôn sang djuai ania Thái pơ anai dŏ amăng hơdôm boh plơi kah hăng: Tân Lập, Tân Hưng, Chiềng Nưa, Tân Phong….yua kơ anun yơh bưp ƀu ƀiă ôh tơlơi tơnap tap kơnong kơnang kơ bruă ngă hmua ia đơ đam anet ƀu djop ƀong huă, khom hyu mă bruă apah, ană bă dŏ anet mơ-it kơ amĭ ama lăng ba, rơkơi bơnai ƀing hlăk ai khom đuăi lui pưk sang đang hmua, mă bruă apah ĕp prăk, sang anŏ krư̆ kăl hĭ bah amăng tơreh tơruai, tung tăng rơkut mơnuih mơnam hyiăl amăl biă mă.

Hnun mơ̆, ră anai, kual lŏn dăo juăt lăi Lŏn Dap Kơdư Sipa Phin pơblih laih, lăng nao kơ đang añăm pơtam mơtah mơda hlơ hlip djop bơyan. Mơnuih ƀôn sang thâo pla añăm pơtam pioh sĭ mơdrô, pla boh troh hiam, ƀong jơman, sĭ hơmâo rơnoh, pla amăng đang ngă sang dăng hơñôl, sreh, sang mơnil. Añăm pơtam, boh troh mơ̆ng Sipa Phin ba sĭ ƀu kơnong pơ plơi prong Điện Biên Phủ đôč ôh, dưi djop añăm ƀong, pioh čem rông ba 15.000 čô čơđai sang hră kơnuk kơna rông ba hăng ƀing čơđai sang hră apah dŏ glăi ƀong huă ƀơi sang hră tơhrơi lơ̆m tơring glông Nậm Pồ laih anun sa črăn brơi kơ čơđai sang hră amăng tơring glông Mường Chà. Ơi Vàng A Kỷ, Khua git gai ping gah să Sipa Phin lăi:

"Ngă tui ƀơƀrư̆ đôč, kiăng mơnuih ƀôn sang hrăm hăng ba yua boh thâo ia rơgơi ngă hmua pla pơjing hăng anăp nao pơblih ba yua ia rơgơi phrâo tơlơi pơhing tañ kiăng mơnuih ƀôn sang dŏ amăng kual anai djop anŏ gêh găl ĕp lŏn hmua pla pơjing hăng djop ia pruih pok prong đơ đam pla añăm pơtam. Mơ̆ng anun, djru tơlơi hơdip mơda mơnuih ƀôn sang dưi pơblih phrâo, hrưn đĭ ngă pơdrong lăp djơ̆”.

Ơi Ngô Xuân Chiến, Khua anom pơtô hăng pơjuăt tơring glông Nậm Pồ, pô pơčeh rai tơlơi pơmin djru kơ ană plơi pla ngă đang añăm amăng kual lŏn dăo či dap kơdư Sipa Phin lăi: Lơ̆m anom bruă ping gah tơring glông Nậm Pồ ngă hră pơtrun mrô 56 kiăng pơđĭ kyar bruă pla añăm pơtam, boh troh, hơbơi pơtơi hơdjă rơgoh, mơ̆ng thun 2023-2025, bruă blung a pơmin nao lĕ kiăng râo pơdưh anŏ gêh găl mơ̆ng lŏn mơnai glai klô pơ Sipa Phin pioh ngă hmua pla pơjing laih anun pơhlôm djop añăm pơtam brơi čơđai sang hră amăng kual giăm guai dêh čar dŏ ƀun rin. Tơlơi pơmin anai dưi hơmâo ană plơi pla hok mơak, laih anun khua mua amăng să, khua mua hơđăp glăi pơdơi abih thun bruă laih, ƀing khua plơi, tha ƀôn mơnuih arăng đăo kơnang tŭ ư hrŏm soh ƀơi Sipa Phin.

Yua hơmâo tơlơi dong yua mơ̆ng ană plơi pla, tơlơi djru ba abih pran jua mơ̆ng khua mua gong gai kơnuk kơna să Sipa Phin, lŏn dŏ glăi amăng să hơmâo truh 30 hektar hlong akŏ pơjing anih pla đang añăm pơtam. Kiăng hơmâo ia pruih kơ đang añăm lĕ, bơyan phang mơnuih ƀôn sang, gong gai kơnuk kơna amăng să brơi klơi dơnao pơkong ia hơjan, ƀudah pơđoh ia mơ̆ng čroh hnoh Nậm Chim kiăng hơmâo ia dong. Găn rơgao lu tơlơi tơnap tap, mơ̆ng blan 1/2024, đang añăm anai hơmâo djru ba djop rơnoh kiăng añăm pơtam, hơtŭk riă tơnă hơbai asơi huă kơ 15.000 čô čơđai sang hră amăng tơring glông hăng ba sĭ mơdrô truh pơ plơi prong Điện Biên Phủ.

“Anom Pơtô hăng Pơjuăt dưi hơmâo khua mua tơring glông jao brơi, ngă pô anom bruă ĕp lăng pơphun ngă đang pla pơjing añăm pơtam ba yua boh thâo ia rơgơi djru kơ mơnuih ƀôn sang ngă tui pla añăm, kiăng ngă hiư̆m pă pla djơ̆ hơdră pơgang rơnăk anŏ hơdjă rơgoh mơ̆ng phrâo pla truh kơ pĕ ba hơtŭk riă amăng sang hră čem rông čơđai kiăng pơhlôm añăm pơtam rơgoh hơdjă”.

Mơ̆ng đang añăm Sipa Phin, lu sang anŏ hrăm tui tơlơi thâo thăi pla añăm pơtam, hơbơi pơtơi djơ̆ hơdră tui boh thâo ia rơgơi, pơhlôm rơnuk rơnua rơgoh, hơdjă. Yôm hloh lĕ, kiăng pơblih tui hơdră pơmin, bruă mă mơ̆ng ană plơi pla.

Amai Lò Thị Phương, mơnuih ƀôn sang plơi Tân Lập, brơi thâo: rim blan ñu hơmâo pơhrui glăi 7 klăk prăk arăng apah, rơnoh prăk anun pioh pơplai amăng bruă mă bơwih ƀong huă sang anŏ laih anun rông ană bă hrăm hră pơar. Ƀu kơnong hơjăn amai Phương ôh, lu mơnuih lui hĭ yơh bruă hyu mă bruă apah pơ ataih adih glăi mă bruă pơđĭ kyar tơlơi bơwih ƀong huă amăng sang anŏ či plơi pla pô mơtam. Ră anai rim hrơi hơmâo giăm 20 čô mơnuih mă bruă lĕ mơnuih djuai ƀiă mă bruă amăng đang añăm, djơ̆ hrơi pĕ añăm kiăng lu mơnuih hơmâo truh 50 čô mơnuih mă bruă.

“Yua kơ hơmâo ƀing khua mua apăn bruă pơtô ba, djru brơi, anun bruă mă kơ mơnuih ƀôn sang dưi hơđong, gơmơi hơmâo bruă mă klă hơđong, ană bă nao hrăm hră huăi pơmin lu đơi mơ̆n kơ bruă ĕp prăk kăk pơ ataih. Đang añăm pơtam gơmơi pla rơgoh hơdjă ƀơi đang sang ăt pĕ añăm anun ƀong rah sĭ mơdrô rah”.

Lŏn Dap Kơdư Sipa Phin ră anai kah hăng buh ao phrâo hiam biă mă hăng ia mơtah mơda hla añăm pơtam, kyâo pơtâo. Mơ̆ng đang añăm pơtam anai, tơlơi kiăng găn rơgao hĭ pơklaih ư̆ rơpa tơ-ua mơhao mơ̆ng mơnuih ƀôn sang hrưn đĭ kơtang biă mă, pok pơhư prong lŏn pla añăm, hơbơi pơtơi gum hrŏm gong gai kơnuk kơna kiăng truh rơnuč thun 2024 pơhrŏ hĭ mrô sang anŏ ƀun rin amăng să trun dŏ 32%, pơhrua hĭ rơnoh hơđăp rơbêh 40%, anŏ ngă dŏ kơđông hĭ hơdôm thun hăng anai ƀơi kual lŏn ư̆ rơya rơpa mơhao anai.