Rơngiao kơ 3 drơi rơmô djai, 29 drơi rơmô dŏ glăi mơng sang anŏ ơi Nguyễn Thanh Phong, amăng plơi bơwih ƀong phrâo, să Tu Tra, tơring glông Đơn Dương, tơring čar Lâm Đồng lêng glăk čroh kian, ƀu-ai buai, ƀu gưt ƀong gơnam, amăng anun sa, dua drơi rơmô amra djai hrơi hơpă ăt aka ƀu thâo lơi. Rơbêh 10 hrơi rơgao sang anŏ rơngiă lu prăk kak blơi ia jrao pơjrao brơi samơ̆ ƀu ba glăi tŭ yua. Ơi Phong brơi thâo, kiăng rông rơmô tui anai sang anŏ hơmâo yua abih prăk pơkrem sui thun, čan pơhrui mơng sang bruă prăk 3 klai prăk. Ră anai rơmô djai rah, ƀă kman rah yua tlâ̆o vaccine, ƀu dưi djet ia tơsâo, yua tơlơi bơwih ƀong huă amăng sang anŏ amra bưp tơnap tap biă mă:

“Rơmô 32 drơi mơ̆ djai 3 drơi hơmâo dor hĭ yơh, 3 drơi pơkŏn glăk pôn ƀu tơpư̆ lư̆. Mrô rơmô ƀă kman glăi dong, ƀu gưt ƀong rơk, čroh kian mơng 5-6 drơi. Kâo ăt bơngŏt biă mă, prăk tuh pơ alin ăt hyu čan mơng sang bruă prăk hăng prăk pơkrem jing abih ƀơi anai yơh. Ră anai rơmô ƀă kman ăt ƀu hơmâo kơñ pơgi amra hiưm pă. Čang rơmang gưl gong gai jŭ yap glăi mrô rơmô djai mơng hơdôm boh sang anŏ kiăng kơ gum djru brơi”.

Kar kăi tui anun mơn, yă Huỳnh Thị Kim Phượng, dŏ amăng plơi Lạc Nghiệp, să Tu Tra, tơring glông Đơn Dương ăt ƀu thâo ngă hiưm pă hlơi lơm rơmô brung amăng sang anŏ dŏ pôn na nao. Tơdơi kơ tlâ̆o vaccine pơgang kman bơbrah tut ƀơi klĭ lơ 31/7, abih bang 76 drơi rơmô brung lêng kơ čroh kian. Mah sang anŏ blơi ia jrao tlâ̆o pơjrao hăng rơbêh 20 klăk prăk rĭm hrơi samơ̆ ăt ƀuh suaih ôh, 8 drơi rơmô djai laih. Yă Phượng brơi thâo, rơmô ƀă kman hăng djai lĕ yua tlâ̆o vaccine bơbrah tut ƀơi klĭ yua kiăng arăng duh glăi.

“Ăt aka ƀu thâo lơi amra djai hơdôm drơi dong, yua dong mơng anai hơdôm hơpluh hrơi laih rơmô ăt dŏ pôn ha anih tui anai, năng ai ñu dŏ tơguăn djai yơh ƀu dưi pơjrao brơi. Rĭm hrơi ƀuh rơmô pôn ha anih, ap na nao sang anŏ ăt bơngŏt biă mă mơn mơ̆ ƀu dưi ngă hiưm pă lơi. Ră anai tơlơi čang rơmang mơng sang anŏ lĕ rơmô ƀă kman yua mơng vaccine, gong gai kiăng djru brơi neh met wa, rơkâo anom bruă sĭ vaccine duh glăi mơnuih ƀôn sang”.

Hluai tui hơdôm nam ruă juăt ƀuh, kah hăng breh pel ĕp lăng, tui pơčrang lăng hăng kiăo tui lăng gen, anom bruă wai lăng rông hlô mơnong (Ding jum ngă hmua hăng pơđĭ kyar ƀon lan) blung hlâo pơsit kman čroh kian ƀơi rơmô brung ƀơi tơring čar Lâm Đồng ƀă kman Pestivirus tauri tơdơi kơ tlâ̆o vaccine NAVET-LPVAC mơng kông ti Navetco. Sit biă ñu, tui sem lăng ƀuh 24/24 get vaccine anai lêng hơmâo kman Pestivirus, anai lĕ virus ngă čroh kian ƀơi rơmô. Laih dong, anom bruă wai lăng rông hlô mơnong ăt pơsit, ƀu ƀuh hơdôm djuai virus, kman hơpă amăng gơnam ƀong kah hăng men vi sinh yua brơi rơmô brung djet ia tơsâo.

Ră anai, bruă rơmô čroh kian hăng djai ƀơi tơring čar Lâm Đông ăt tŏ tui ngă tơnap tap, rĭm hrơi ăt rơngiă lu prăk kak blơi jrao pơjrao brơi rơmô. Samơ̆, mơnuih ƀôn sang ăt duh mă prăk pơjrao brơi rơmô./.