Gruh rông akan mơng sang anŏ ơi Đinh Văn Thắng dưm tong krah dơnao pơkŏng ia ƀơi drai ia apui lơtrik Dak R’Tih dar plơi prong Gia Nghiã, tơring čar Dak Nông. Ñu brơi thâo, drai ia apui lơtrik agaih biă mă, lăp djơ̆ hăng bruă rông lu djuai akan anun lĕ: akan čep, trắm, diêu hồng, akan koi…Rĭm thun, sang anŏ ñu pơhrui glăi hơđong mơng 500-700 klăk prăk mơng 2 boh gruh rông anai:

“Dơnao pơkŏng ia anai agaih hơdjă yua ƀơi anai dơnao ia ƀơi drai ia apui lơtrik, glông rô huăi akhŭ hơƀak jrak. Rông akan juăt djai amăng hơdôm hrơi blung a, kiăng pơgang blung hlâo, găn rơgao mơng 10-15 hrơi, lơm akan juăt hăng anih dŏ hơdip phrâo amra huăi ƀuh djai dong tah”.

Ataih mơng Gia Nghĩa giăm 100 km, amăng ia Krông Nô, mơng hơdôm thun anai, sang anŏ ơi Bùi Văn Xô, dŏ amăng să Buôn Choáh, tơring glông Krông Nô rông 15 gruh rông akan diêu hồng. Ñu brơi thâo, rĭm thun sang anŏ pơhrui giăm 120 tơ̆n akan, tơdơi kơ duh hĭ prăk tuh pơ alin kmlai dŏ glăi giăm 400 klăk prăk. Kual anai dơnao ia prong, ia rô gap ƀrô lăp djơ̆ kiăng pơđĭ kyar bruă rông akan, mah ăt hơmâo lu tơlơi bơngŏt:

“Tơlơi tơnap tap lĕ amăng bơyan hơjan hlim akan juăt djai; dua dong lĕ bơyan không phang ia khŏt ƀiă ăt ngă akan djai mơn. Rông akan ră anai ĕp djuai akan rông tơnap biă mă”.

Tơring čar Dak Nông hơmâo đơ đam dơnao ia rông akan hơdang giăm 17.500 ektar, hăng lu drai ia apui lơtrik prong anun lĕ Buôn Tua Srah, Buôn Kuốp, Đồng Nai 3, Đồng Nai 4, Đăk R’tih, hrŏm hăng rơbêh 250 boh dơnao pơkŏng ia hăng sa, dua arăng ia krông čroh hnoh. Truh ră anai, đơ đam dơnao rông akan amăng tơring čar giăm 2.000 ektar, hăng giăm 1.200 boh gruh, pơhrui glăi rơbêh 7.300 tơ̆n rĭm thun. Tui ơi Ngô Xuân Đông, kơ-iăng khua gơnong bruă ngă hmua hăng pơđĭ kyar ƀon lan tơring čar Dak Nông, ră anai dŏ lu tơlơi gun găn kiăng pơđĭ kyar rông akan hơdang amăng tơring čar, yua kơƀah hơdră djru kiăng dưi rông akan amăng hơdôm dơnao pơkŏng ia hăng aka ƀu hơmâo anih anom sĭ djuai akan rông hiam hloh. Gơnong bruă ngă hmua glăk ĕp hơdră pơsir hĭ tơnap tap kiăng pơtrut rông akan ba glăi tŭ yua, hơđong kjăp, wai pơgang dơnao ia, akan hơdang.

“Tal sa lĕ pel ĕp glăi hơdră djru hăng kơsem min hơdôm hơdră phun kiăng ngă gêh gal pơtrut rông akan hơdang amăng hơdôm boh dơnao, ia krông amăng tơring čar Dak Nông anun lĕ hơdôm boh dơnao, drai ia apui lơtrik amăng ia Krông Nô. Dua dong lĕ kơtưn pơtô hrăm brơi boh thâo hăng pok prong hơdôm hơbô̆ bruă rông akan hơdang ba glăi tŭ yua kiăng pơtrut pơđĭ kyar gơnong bruă anai”.

Hăng lu dơnao pơkŏng ia prong, rơngeh hơdjă, Dak Nông dŏ lu tơlơi gal kiăng pơđĭ kyar rông akan hơdang. Tơring čar ba tơbiă hơnong pơkă gir run truh thun 2030, đơ đam dơnao rông akan amra pok prong giăm 4.500 ektar, pơhrui glăi rơbêh 20.000 tơ̆n./.