Đơ đam tơring čar Dak Lak ră anai hmâo năng ai ñu 22.500 ektar đang sầu riêng, amăng anun hmâo giăm truh 11.000 ektar glăk pĕ pơhrui. Sầu riêng pla lu biă ñu ƀơi hơdôm bôh tơring glông Krông Pač, Krông Năng, Krông Ƀuk, Ea Hleo, Čư̆ Mgar, Čư̆ Kuiñ hăng plơi prong Buôn Ma Thuột.

Ơi Vũ Đức Côn, Kơ-iăng Khua Gơnong bruă đang hmua hăng pơđĭ kyar ƀôn lan tơring čar Dak Lak – Khua Khul sầu riêng tơring čar Dak Lak pơsit, thun anai sầu riêng mơ̆ng tơring čar djơ̆ bơyan, mrô lu djơ̆ anô̆ ñu mơ̆ng 18 truh kơ 20 tơn sa ektar. Abih bang mrô sầu riêng thun 2023 anai hmâo rơbêh kơ 214.000 tơn, lu hloh kơ mrô pơkă lăng hlâo 195.000 tơn mơ̆ng akô̆ bơyan. Hăng nua sĭ đĭ trun ƀơi rơnoh 55.000-75.000 prăk sa kg (tui hluai hiam ƀudah sat), pơhrui mơ̆ng sầu riêng hmâo mrô lu hloh giăm truh 15.000 klai prăk. Rim ektar rơngiao kơ prăk yua bơwih brơi kơ phun pla hmâo kơmlai mơ̆ng 800 truh rơbêh kơ 1 klai prăk./.