Bruă bơwih ƀong mut hrŏm jai dơlăm, bruă pơjing anăn păn gơnam jai yôm phăn biă. Bôh than mơ̆ng pơjing anăn păn jing pơjing sa gru nam phara ha jăn, sa anăn păn phara, sa gru rup pơmlăi phara hăng ƀu hmâo ôh mơ̆ng hlâo mơ̆ mơnuih blơi amra thâo hăng pơmin nao truh gơnam ƀudah bruă blơi sĭ anun. Kơnang kơ anom bơwih ƀong amra dưi sĭ gơnam hăng nua yôm, ba glăi lu nua yôm hloh.

Tơlơi găn rơgao sit nik mơ̆ng lu dêh čar ƀơi rŏng lŏn tơnah brơi ƀuh, pioh truh kih amăng bruă pơtrut sĭ gơnam phara mơ̆ng tơring čar pơ̆ hơdôm bôh anih sĭ mơdrô kơ dêh čar arăng, kiăng biă đing nao pơjing, pơgang hăng djă pioh anăn păn. Ƀơi Việt Nam, khă hmâo hơdră pơtrun laih, kơčăo bruă pơjing anăn păn kơ mơnuih ngă đang hmua sĭ kơ dêh čar tač rơngiao. Khă hnun hai, tơlơi dưi lăi nao hrŏm hrŏm, akă rơđah ôh. Hơdôm gơnam dŏng raih daih ƀơi hơdôm tơlơi pơsit, jơlan hơdră, akă hmâo tơlơi tô nao rai, pơpha hyu kơplah wah hơdôm bơnah bơdjơ̆ nao... Yua anun, bruă pơjing anăn păn gơnam mă mơ̆ng đang hmua truh ră anai akă dưi pơkă kah hăng čang rơmang mơn.

Pơhmu hăng braih, Việt Nam jing dêh čar sĭ braih prong dŏng tal 3 ƀơi rŏng lŏn tơnah, samơ̆ lu ñu braih mơ̆ng Việt Nam sĭ braih phrâo pơtop mă, anung amăng kơsak kô̆, ƀu hmâo anăn păn, ba nao pơ̆ dêh čar arăng mơ̆ng pơkra pơjing kơsat dưm braih, ƀlir logo anăn păn pô ba hyu sĭ pơ̆ dêh čar arăng. Yua anun anăn braih Việt Nam ăt akă sit nik hmâo mơnuih blơi yua hơdôm bôh dêh čar thâo truh mơn. Ơi Phan Minh Thông, Khua Khul wai lăng, Khua Grŭp Phúc Sinh lăi lĕ:

 “Ƀing ta dưi thâo truh lĕ pô sĭ braih lu samơ̆ ƀing ta ƀu thâo truh lĕ pô sĭ braih hmâo anăn păn. Hơdôm anăn păn hmư̆ hing ƀơi rŏng lŏn tơnah ƀu hmâo anăn mơ̆ng Việt Nam”.

Tui hăng ƀing juăt bruă bơwih ƀong, Việt Nam sĭ lu biă gơnam mơ̆ng đang hmua kơ dêh čar arăng, samơ̆ yôm phăn lĕ khom dưi ruah gơnam phara ha jăn, hmâo anô̆ gal bơkơtưn pioh đing nao pơjing anăn păn. Hmâo gơnam phara laih anun lĕ khom hmâo tơhnal pơkă klă hăng khom hmâo bruă mă marketing tui tơhnal lŏn ia...

Tơlơi rơngôt ră anai, khă sa dua anăn păn gơnam mă mơ̆ng đang hmua amăng dêh čar hmâo anô̆ klă hloh samơ̆ anom bơwih ƀong ƀu djop pran prăk pioh pơjing kual pla gơnam sĭ kơ dêh čar arăng. Tơlơi anai khom hmâo tơlơi lăng ba lu hloh mơ̆ng ƀirô kơnuk kơna, djru hơdôm hơdră bruă lăp djơ̆, djru anom bơwih ƀong sĭ mơdrô gơnam mă mơ̆ng đang hmua kơtang đĭ. Tơlơi gum pơhiăp mơ̆ng ơi Lê Thanh Hòa – Kơ-iăng Khua Anom wai lăng gơnam pơjing pơkra hăng pơlar anih anom sĭ mơdrô, Ding jum đang hmua hăng pơđĭ kyar ƀôn lan dêh čar:

 “Drơi pô abih bang hơdôm bôh anom bơwih ƀong sĭ mơdrô Việt Nam leng kơ anom bơwih ƀong anet hăng găp ƀrô, ăt kah hăng ƀing ta kơƀah ngăn rơnoh, ƀing ta kơƀah bôh thâo, amăng bruă sĭ mơdrô, biă ñu sĭ mơdrô hăng dêh čar arăng. Anai lĕ hơdôm anô̆ akă gal mơ̆ kâo pơmin pơ̆ anăp anai, ƀing ta khom hmâo tơlơi kơtưn đĭ klă hloh pioh gum hrŏm bruă sĭ mơdrô anai. Ƀing ta sĭ gơnam kơ lu anom bơwih ƀong sĭ mơdrô pơkra gơnam ƀong huă prong samơ̆ mrô gơnam tuč rơnuč ñu lĕ ƀu hmâo hlă anăn păn Made in Việt Nam. Anai lĕ tơlơi pap ñai biă pioh ƀirô wai lăng Kơnuk kơna khom thâo bruă anai pioh hmâo hơdôm hơdră bruă đing nao klă hloh gah ngăn drăp, anom mă yua, ngă hiưm hơpă hơdôm bôh anom bơwih ƀong djop tơhnal ngă brơi gơnam klă hiam sĭ kơ arăng hăng anăn păn Việt Nam”.

Tui hăng ơi Trần Văn Trung – Khua Sang bruă pơčruh hrom prăk bơwih ƀong tuh pơplai Hải Âu Việt, pơjing anăn kơ gơnam mă mơ̆ng hmua Việt jing tơlơi kiăng tañ. Hrŏm hrŏm hăng anun, anom bơwih ƀong hăng gơnong bruă gơgrong ba bruă anai ăt khom đing nao klă hloh bruă pơgang anăn păn. Bruă ngă anai amra djru anom bơwih ƀong amra hơdư̆ đut hlah hơdôm anô̆ lui ruh yua kơ bruă hyu hơduah ĕp, mă yua anăn păn ƀu djơ̆ phiăn mơ̆ng hơdôm pô pơkon. Mơ̆ng anun amra pơhlôm pran đăo kơnang, anăn păn hmư̆ hing ƀơi anih sĭ mơdrô.

 “Ƀơi hơdôm anih anom sĭ mơdrô mơ̆ng Kơdư nao gah Dơnung hmâo thâo braih ST25 sĭ hăng nua tơket tơkeng mơ̆ng 150.000. Bơ̆ hlâo adih pơhmutu ñu kual Kơdư braih Hải Hậu lĕ hmư̆ hing hyu djop ăt yôl sĭ braih Hải Hậu. Gơñu sĭ tơbiă hăng mơnuih blơi huă ăt tŭ ư blơi mơn. Dua lĕ hơdôm bôh anom bơwih ƀong pung kơ đing nao bruă pơgang anăn păn ba truh lơm hmâo tơlơi bruă tui anun, amra ta ƀu hmâo tơlơi dưi pioh pơgang ôh”.

Ƀing juăt bruă lăi lĕ, bruă ngă kiăng lĕ khom hmâo anăn păn gơnam tam hrŏm kơ gơnam Việt Nam hăng khom dưi pơjing logo. Gah anom sĭ gơnam kơ dêh čar arăng ăt khom hmâo hơdôm tơlơi kiăng mơ̆ng bơnah blơi, pơphun bruă ngă đang hmua pioh djơ̆ hăng mrô kiăng, anô̆ klă, nua sĭ. Đing nao bruă pơphun ngă đang hmua pioh pơjing kual pla pơkra hơđong kơ rim djuai gơnam phara ha jăn./.