Ơi Nguyễn Thành Vinh, dŏ pơ să Bàn Long, tơring glông Châu Thành, tơring čar Tiền Giang ăt kah hăng lu sang anŏ mơnuih ngă hmua pơkŏn amăng plơi pla gơñu koh drôm hĭ abih phun boh đung hlăk boh, pioh pla pơhrua phun boh sầu riêng. Ñu lăi boh đung sĭ ƀu hơmâo kơmlai ôh kơ bơwih ƀong huă ôh; lơ̆m anun pla boh sầu riêng hơmâo pơhrui glăi lu hloh:

“Boh đung sang anŏ gơmơi sĭ kơnong 18 rơbâo prăk đôč lơ̆m 10 boh ƀudah 12 boh hiư̆m thâo djop hơdip mơda, ƀu tŭ yua ôh. Phun boh sầu riêng ră anai, hơdôm đang ieo gah jĕ giăm đang gơmơi arăng sĭ mơdrô pơhrui glăi prăk mơ-ai amăng thun anai djơ̆ blan rơnoh sĭ pơmă biă mă. Lơ̆m anun pơ dêh čar Khač arăng kiăng blơi lu đôč, mơnuih ƀôn sang ƀu thâo pla phun hơgĕt tah, ruah pơjeh hơgĕt či pla anun yơh pla boh sầu riêng tui hluai hiư̆m či jing mă đôč”.

Ƀơi hơdôm să Bình Trưng, Vĩnh Kim, Đông Hòa, Bàn Long, tơring glông Châu Thành ră anai hơmâo lu đang boh đung, phun boh tơsâo rơmô lò rèn, boh hồng xiêm, boh kruăi dŭng...mơnuih ƀôn sang ăt uă drôm lui mơ̆n, kai čuar glăi lŏn đang, čoh amăng luh pla boh sầu riêng....Tui hăng mơnuih ngă hmua pơ anai lăi, đang boh sầu riêng tuh pơ alin pla pơjing wai lăng djơ̆ hơdră lơ̆m sa hektar truh 200 klăk prăk hăng amăng 5 thun kah hơmâo pĕ boh. Lu đang boh troh ƀu tŭ yua đơi ôh, mơnuih ngă hmua ăt hlăk pơrai lui klơi luh ngă glông či pla boh sầu riêng pơhrua nao.

Bruă pla boh sầu riêng gah rơngiao kual pơkă hlâo lĕ, mơnuih ngă hmua phă pơrai tui hluai gơñu pô ngă đôč, kiăo tui ƀuh arăng sĭ hơmâo rơnoh, gong gai kơnuk kơna hăng anom bruă wai lăng đang hmua tơring čar Tiền Giang kơnong pơtô lăi, pơtă pơtăn hlâo đôč, aka ƀu hơmâo hơdră pơgăn khut khăt oh. Ơi Trần Thanh Hải, Khua jơnum min mơnuih ƀôn sang să Vĩnh Kim, tơring glông Châu Thành lăi:

“Phun boh sầu riêng ƀơi să hơmâo hơdôm hơpluh hektar, hlăk bơnga lu biă mă.Ră anai, đang boh đung koh drôm hĭ ƀiă, ƀing adơi ayong apăn bruă rai khă samơ̆ ană plơi pla ƀu hmư̆ ôh, bơrơjah glăi mơtam. Ană plơi pla lăi boh đung rơgêh đơi, boh krô lui hĭ soh sel”.

Tui hăng ơi Nguyễn Văn Bườn, Khua anom bruă ngă hmua hăng pơđĭ kyar plơi pla tơring glông Tân Phước, phun boh sầu riêng pla amăng kual lŏn Đồng Tháp Mười hiam biă, sit mơ̆n amra boh lu samơ̆ anŏ jơman ñu ƀu hmao hăng kual lŏn anih pơkŏn ôh. Tơring glông ƀu hơmâo jơlan hơdră pơtrun brơi pok prong đơ đam pla phun boh troh anai:

“Pla boh sầu riêng hơmâo năng ai 5 hektar, phun ăt boh lu samơ̆ asar amăng lăm ƀu lôm ôh yua kơ phara ba kual lŏn mơnai, glai ia....Sit mơ̆n mơnuih ƀôn sang pla mă ƀơi kual lŏn bơnư̆ akŏ tli hnoh ia, ta ƀu kơ̆m ôh samơ̆ kŏn pơtrut lơi bruă pơđĭ kyar pla phun sầu riêng amăng tơring anai”.

Tơring čar Tiền Giang hơmâo đang boh sầu riêng sĭ mơdrô sui thun laih hăng đơ đam pla prong hloh kual ia krông Cửu Long. Hlâo adih, phun boh sầu riêng pla lu biă mă ñu ƀơi ƀơi kual lŏn mơnai treng hang ia krông Tiền gah tơring glông Cai Lậy. Yua kơ boh tŭ yua amăng tơlơi bơwih ƀong huă lu anun yơh arăng pơlar tui brơi pla truh 22.000 hektar, luhloh lĕ tơring glông Cai Lậy, Cái Bè, plơi prong Cai Lậy, tơring glông Châu Thành. Thun hlâo, boh sầu riêng sĭ mơdrô ba nao pơ dêh čar Khač, ñu mông rơnoh đĭ yôm, pô sang đang hmua pơhrui glăi rơbêh 1 klai prăk lơ̆m sa hektar.

Thun blan rơgao, gong gai kơnuk kơna hăng djop anom bruă tơring čar Tiền Giang hơmâo lu hơdră, bruă mă djru kơ pô đang hmua, sang bruă pla hăng sĭ mơdrô boh sầu riêng kah hăng: pơkă kual pla sa hnong, pơtô ba boh thâo ia rơgơi pla hăng wai lăng đang boh sầu riêng, man pơkra bơnư̆ pơkong ia pơgăn ia mơsin hram, pơpha gru mrô pla, anih pĕ pơhrui hăng dưm amăng kơdŭng kơsu, dưm amăng hruh pơgang pioh. Khă tui anun, boh tơhnal bơwih ƀong huă hơmâo yơh samơ̆ jơlan hơdră mơ̆ng tơring čar Tiền Giang lĕ, ƀu pơtrut pơsur mơnuih ƀôn sang pla ôh amăng kual lŏn pơkă hnong pla sa mơta phun boh troh, đing nao kơ bruă pla hneč ƀu dưi kiăo tui bruă ngă hrŏm ƀuh ƀơi anăp mơta đôč ôh, kah hăng phă pơrai lui hĭ đang boh troh pơkŏn hlăk pĕ boh sĭ mơdrô pioh pla pơhrua hăng boh sầu riêng. Ơi Võ Văn Men, Khua anom bruă wai lăng phun pla pơgang đang hmua tơring čar Tiền Giang brơi thâo dơ̆ng:

"Ră anai, tơlơi pơhing lăi dêh čar Khač kiăng blơi boh sầu riêng lu biă mă, tui hăng akŏ bruă pơđĭ kyar pla boh sầu riêng lĕ đơ đam pla rơbêh laih. Ƀing gơmơi ră anai, hơmâo ngă hră mơ-it djop tơring glông sem glăi jŭ yap đơ đam lŏn đang hơdôm laih anun đơ đam pla phrâo đĭ tui hơdôm dơ̆ng, pơă pla, hlăk mă hiăp pơgôp mơ̆ng mơnuih ƀôn sang. Jơlan hơdră mơ̆ng ta lĕ tơđah đơ đam lŏn đang đĭ tui rơkâo Jơnum min mơnuih ƀôn sang tơring čar pơkă glăi akŏ bruă pơđĭ kyar boh sầu riêng truh thun 2030 hăng pơđĭ kyar amăng kual brơi pơblih pơjeh phun pla đôč. Ƀing gơmơi ăt hơmâo mă čơđeh lŏn gah kơdư jơlan mrô 1 laih, kual brơi pơblih pơjeh phun pla, kual lŏn pơpă ñu ƀu djơ̆ găl ôh lĕ, pơtrut pơsur mơnuih ƀôn sang anăm pla ôh, phun pla pơpă ƀu hơmâo rơnoh kơ tơlơi bơwih ƀong huă lĕ brơi pơblih hĭ”.

Phun boh sầu riêng ră anai hlăk ba glăi boh tơhnal kơ tơlơi bơwih ƀong huă lu, samơ̆ ăt dŏ kơnang nao anih sĭ mơdrô pơ dêh čar tač rơngiao hăng kiăng hơmâo tơlơi thâo rơgơi hơdră pla pơjing pơkă hăng phun pla pơkŏn, boh nik ñu lŏn kual ia mơsin hram. Yua kơ anun, mơnuih ngă hmua tơring čar Tiền Giang kiăng sem glăi, kơđiăng hloh lơ̆m pơđĭ kyar phun pla anai anăm pla dŭk dăk lu đơi, ƀu ngă tui rơnoh pơkă hnong hăng tơlơi pơtô ba mơ̆ng anom bruă kơnuk kơna.