Thun 2023, gơnam đang hmua kah hăng asar boh makka mơ̆ng kông ty pơčruh ngăn Damaca Nguyên Phương tơring glông Krông Năng, tơring čar Dak Lak hơmâo ba truh pơ djop tơring čar, ƀôn prong amăng dêh čar ta laih, hăng ba nao sĭ mơdrô truh pơ dêh čar tač rơngiao, kah hăng ba nao pơ dêh čar Japan. Yă Nguyễn Thị Thu Phương, Khua kông ty brơi thâo, kiăng găn rơgao hĭ tơlơi tơnap tap hăng tơlơi lông lăng yua tơlơi bơwih ƀong huă ƀu hơđong, lu sang bruă bơwih ƀong sĭ mơdrô prăp rơmet mă hơdră blơi gơnam mơ̆ng lu anih anom, đang hmua, pơtrut ĕp anih sĭ mơdrô, pok pơhư prong anih ba hyu sĭ mơdrô. Thun 2024, hrŏm hăng pơđĭ tui boh tŭ yua gơnam sĭ mơdrô, anom bruă sĭ mơdrô ăt hyu pôr pơthâo anăn păn gơnam sĭ mơdrô ƀơi hơdôm anih blơi hơmâo tơlơi gêh găl prong:

“Ƀing gơmơi hlăk nao mă bruă hăng ƀơi anih blơi gơnam lu kah hăng dêh čar Khač laih anun ƀơi hơdôm dêh čar anih sĭ mơdrô kual Arab hăng tơlơi čang rơmang pơ anăp adih ăt tŭ mă lu tơlơi pơhing mơak klă mơ̆ng anih blơi gơnam kiăng hơmâo anih anom sĭ mơdrô hơđong”.

Thun anai, hrŏm hăng bruă pơđĭ kyar anih anom sĭ mơdrô amăng dêh čar ta pô, Anom ngă ƀong hrŏm ngă hmua hăng bơwih bơwăng Ea Tu, să Ea Tu, plơi prong Ƀuôn Ma Thuôt, tơring čar Dak Lak, ăt anăp nao pơ anih sĭ mơdrô hăng dêh čar tač rơngiao, kơnang kơ bruă pơkra ming tơpung kơphê hiam jơman hloh laih anun kơphê jơman phara. Ơi Trần Đình Trọng, Khua khul wai lăng, ngă rah khua sang bruă ngă ƀong hrŏm brơi thâo, sĭ mơdrô kơphê djuai tơpung kơphê jơman hloh lĕ, kiăng pơđĭ tui rơnoh sĭ mơdrô, ba glăi boh tŭ yua sit nik, mơnuih ngă hmua yơh pô tŭ mă, tơdơi kơ rơnoh kơphê hơđong na nao laih anun pơmă hloh sĭ mơdrô hăng gah rơngiao mơ̆ng 2 klăk, truh 2 klăk prăk mơkrah lơ̆m sa tơn. Ră anai, anom ngă ƀong hrŏm ngă hmua hăng bơwih bơwăng Ea Tu hlăk dăp bruă pơkra ming rai lu mơta gơnam sĭ mơdrô tui hăng tơlơi kiăng mơ̆ng anih či blơi, jai hrơi pơđĭ tui rơnoh hiam, jơman mơ̆ng tơpung kơphê pơkra ming anŏ hiam phara.

“Phrâo anai, ƀing gơmơi hơmâo tŭ mă gru tăm pong kơdŏm ƀơi hruh pioh dưm tơpung kơphê, asar kơphê hna giong laih anun kơphê tơpung tuh ia mơñum mơtam juăt lăi kơphê tơpung lik (hoà tan), ba nao sĭ pơ dêh čar Khač. Hăng kơphê anŏ hiam laih anun kơphê jơman hloh jai hrơi lu mơnuih hor mơñum, tơlơi anai gêh găl hăng klă biă mă kơ mơnuih ngă hmua. Gơmơi ăt pơtă kơ mơnuih ƀôn sang ngă hmua khom ngă tui djơ̆ tơlơi pơtô lơ̆m pla hăng pơgang phun kơphê, ƀu mă yua ia jrao hlăt, ia jrao rơ̆k ôh, kiăng pơgang pioh bruă pla kơphê hơdjă rơgoh hơđong”.

Tui hăng ơi Nguyễn Hoài Dương, Khua Gơnong bruă Ngă hmua hăng pơđĭ kyar plơi pla tơring čar Dak Lak, thun 2023 lĕ thun tŭ yua hloh amăng bruă ngă hmua tơring čar lơ̆m hnong pơđĭ kyar hơmâo truh 4.88%. Anai lĕ rơnoh pơđĭ kyar hloh amăng anom bruă bơwih ƀong huă ƀơi tơring čar. Hrŏm hăng anun, rơnoh hơdôm mơta gơnam đang hmua đĭ kah hăng boh sầu riêng, kơphê, tiu, braih pơdai lêng kơ pơmă tui anun pơtrut bruă sĭ mơdrô tui jơlan phun amăng anih anom sĭ mơdrô mrô 1 anun yơh rơnoh pơhrui glăi mơ̆ng mơnuih ƀôn sang ngă hmua, hơdôm khul mơnuih mă bruă pơkra pơjing gơnam tam sĭ mơdrô ăt dưi pơblih tui klă hloh, đĭ tui truh 15.000 klai prăk pơkă hăng thun 2022. Rơnoh prăk sĭ mơdrô hăng tač rơngiao mơ̆ng tơring čar tal blung a dưi pơhrui glăi truh 1,6 klai đôlar Mi.

Thun 2024, tơring čar Dak Lak ăt pơtrut tui tơlơi gêh găl pioh pla pơjing ming pơkra gơnam sĭ mơdrô mơ̆ng boh troh đang hmua phun, tơring čar čang rơmang amra djru hrŏm rơnoh bơwih ƀong huă mơnuih mơnam ƀơi tơring čar đĭ tui. Kiăng ngă tui djơ̆ tơlơi čang rơmang anai, Ơi Nguyễn Hoài Dương, Khua Gơnong bruă Ngă hmua hăng pơđĭ kyar plơi pla tơring čar Dak Lak brơi thâo:

“Anih anom sĭ mơdrô yơh anŏ pơsit. Thun 2024, anom bruă amra kơsem min 16 pok hră pơkôl sĭ mơdrô rơngai mơ̆ Việt Nam hơmâo kĭ hăng djop kual, dêh čar kiănghneč anŏ gêh găl, tơlơi tŭ yua mơ̆ng hră pơtrun kơ bruă sĭ mơdrô rơngai anai hăng kơsem min hơdôm kual hơmâo hơdôm tơlơi sĭ mơdrô kiăng blơi gơnam mơ̆ng dêh čar Việt Nam mơ̆ Dak Lak hơmâo anŏ gêh găl, mơ̆ng anun dăp glăi bruă mă pla pơjing hăng ming pơkra gơnam sĭ mơdrô dưi djop hăng anŏ kiăng laih anun djơ̆ tơhnal pơkă anŏ hiam, tŭ yua gơnam tam sĭ mơdrô tui hăng hơdôm anih sĭ mơdrô rơkâo blơi kiăng mơ̆ng anun pơđĭ tui rơnoh gơnam sĭ mơdrô hăng sĭ blơi hơđong na nao”.