Tong krah đang pla trong mơsăm hơmâo rok čă hlip, samơ̆ trong ăt mơboh mơn, amai Nguyễn Thị Loan, dŏ ƀơi să Dak Ha, tơring glông Dak Glong, glăk pĕ hmar, ruah mă boh tơsă ngur. Ñu hok mơ-ak, mơ̆ng hrơi ngă hrŏm pla añăm hơbơi hơdjă hăng anom ngă ƀong hrŏm, sang anŏ ñu hơmâo prăk pơhrui hơđong:

“Hlâo adih sĭ mơdrô tơnap biă yua juăt ba nao sĭ pơ sang čơ, añăm rơgêh biă. Bơ ră anai lĕ hơmâo anom ngă ƀong hrŏm sĭ brơi kơ ta, ta kơnong ngă hmua, pla klă đôč, ta amra hơmâo ƀong lơi, kơnong ngă tui anun lĕ pơđĭ kyar laih”.

Ơi Đặng Ngọc Hưng, Khua anom ngă ƀong hrŏm ngă hmua Dak Ha, tơring glông Dak Glong, brơi thâo, anom bruă glăk pơtruh ngă hăng giăm 100 čô ngă hmua pla gơnam ƀơi rơbêh 300 ha. Añăm pơtăm boh troh hơdjă hơmâo pơkra hơdôm pă lêng kơ hơmâo mơnuih mơ̆ng ƀôn prong Hồ Chí Minh blơi abih. Truh kih hơmâo mơ̆ng bruă ngă hrŏm kơjăp hăng mơnuih ngă hmua pơkra rai gơnam klă:

“Tơlơi yôm hloh lĕ khŏm ngă hrŏm, mơ̆ng bruă iâu pơthưr akŏ pơdong anih pơtruh hrŏm, akŏ pơdong grup ngă hrŏm thâo djru nao rai kah mơ̆ng dưi pơđĭ kyar kơtang”.

Ăt tui jơlan ngă hrŏm kơjăp pơkra gơnam mơ̆ng hmua ba sĭ, Anom ngă ƀong hrŏm Hợp tác xã Thịnh Phát, să Quảng Sơn, tơring glông Dak Glong, hơmâo hơdôm hră rơkâo blơi djŏp añăm pơtăm hơbơi, biă ñu lĕ añăm bơi pok. Yă Nguyễn Thị Toản, Khua anom ngă ƀong hrŏm brơi thâo:

“Ră anai gơmơi glăk ngă hrŏm hăng kông ti pơkra gơnam ƀong huă mơ̆ng Việt Nam, pơkra añăm bơi pok ngă kim chi Hàn Quốc ƀơi sang măi ƀơi Long An hăng Đức Trọng (Lâm Đồng). Phrâo anai ƀing gơmơi kĭ hră hăng sa boh kông ti ƀơi Nam Nung dong. Rim hrơi neh met wa ba nao añăm bơi pok pơ Long An hăng Đức Trọng, laih anun sĭ kơ ƀing nao blơi ƀơi anih”.

Ră anai tơring čar Dak Nông hơmâo 65 anih pơtruh ngă hrŏm pơkra gơnam, ba sĭ gơnam hăng năng ai 10.000 boh sang anŏ gum ngă. Anai jing mrô aset biă pơhmu hăng tơlơi dưi ngă mơ̆ng tơring čar anai. Ơi Phạm Tuấn Anh, Khua gơnong bruă hmua hăng pơđĭ kyar ƀôn lan tơring čar Dak Nông lăi pơthâo, tơring čar hơmâo 4 anom bruă prong pla phun sui thun, amăng anun hơmâo kơphê, tiu, hăng kual lŏn, gơnam pơhrui lu hloh kual Dap Kơdư. Rơngiao kơ anun, hơmâo hơdôm mơta djuai boh troh juăt pla hơmâo (năng ai ñu 15000 ha, hơmâo sầu riêng, ƀơr, boh kruăi hrĕ, boh pơ-ô̆, mak ka...), djŏp djuai añăm hla rok, hơbơi (rơbêh 15000ha)

Hyu ĕp anih blơi sĭ gơnam mơ̆ng hmua, hơdôm anom bruă ƀơi Dak Nông hơmâo lu wơ̆t laih sem lăng bruă blơi sĭ ƀơi sang čơ juăt mă gơnam sĭ glăi, hơdôm boh sang siêu thị pơprong ƀơi ƀôn prong Hồ Chí Minh; pơphun jơnum kiăng hơdôm anom bơwih ƀong prong hăng mơnuih ngă hmua, anom ngă ƀong hrŏm lăi pơthâo nao rai, hơmâo tơlơi pơhiăp hrŏm; iâu pơthưr anom bơwih ƀong tuh pơ alin anih pơkra gơnam. Ơi Phạm Tuấn Anh brơi thâo, tơring čar glăk pơtrut đĭ kyar bơwih ƀong ngă hrŏm či pơtruh mơnuih ngă hmua akŏ pơdong kual ngă hmua pơkra gơnam, pơđĭ anŏ klă mơ̆ng gơnam tam, ƀơ ƀrư̆ akŏ pơdong anih pơkra gơnam mơ̆ng hmua kơjăp.

“Anom bruă ngă hmua ƀing gơmơi amra akŏ pơdong kual ngă hmua kiăo tui gơnam phara, amăng thun anai jing pơƀut ngă kơphê, yua anai lĕ bruă phun, tơdơi kơ anun amra ngă bruă pơkŏn dong. Laih anun, rim kual ngă hmua amra akŏ pơdong anom ngă ƀong hrŏm ngă anih pơtruh brơi hơdôm anom bơwih ƀong gah rơngiao. Laih anun sit ƀing gơñu yơh pô djru mơnuih ngă hmua amăng bruă pơkra, ĕp anih sĭ mơdrô, wơ̆t hăng prăk kăk”.

Tơring čar Dak Nông ră anai hơmâo 3 anom bơwih ƀong hrŏm, 193 anom ngă ƀong hrŏm ngă hmua laih anun hơdôm rơtuh grup ngă hrŏm, kual ngă hmua prong. Hrŏm hăng gir kiăo tui tơlơi pơkă či ngă hrŏm pơkra gơnam, Dak Nông ăt glăk pơđĭ kyar ngă hmua hơmâo nua đĭ phara, hăng hơbô̆ bruă ngă kơphê, boh troh pơlir hăng tuai čuă ngui, hyu ngui rah ngă hmua rah...Anai jing jơlan bơwih ƀong djơ̆ lăp či pơđĭ kyar ngă hmua sit nik jing sa amăng 3 gong tơmeh phun bơwih ƀong mơ̆ng Dak Nông tui Tơlơi pơsit mơ̆ng Jơnum ping gah tơring čar ba tơbiă kơ rơwang bruă phrâo.