Truh ră anai tơring čar Kon Tum hmâo pơlar laih giăm truh 11.300 ektar phun jrao, amăng anun kơnong kơ lŏn pla sâm Ngọc Linh rơbêh kơ 2.400 ektar. Pơhrui glăi mơ̆ng phun jrao hmâo djru laih hơdôm rơbâo bôh sang anô̆ djuai ania ƀiă ƀơi hơdôm bôh tơring glông: Tŭ Mrông, Kon Plông hăng Đăk Glei hrưn đĭ tơtlaih mơ̆ng ƀun rin, djru pơtrut bơwih ƀong - mơnuih mơnam ƀơi kual asuek, kual ataih mơ̆ng tơring čar.

Ră anai, tơring čar Kon Tum glăk kơsem min, čih pơkra sa dua hơdră bruă phara djru mơnuih ƀôn sang pơjeh pla, hơdră pla, pơkra gơnam... kiăng pok prong rah lŏn pla hăng hmâo nua rah mơ̆ng phun pla. Kiăng pơtrut bruă pơlar phun jrao khom pok prong pơjeh pla. Lơm anun, nua pơjeh sâm Ngọc Linh pơmă biă; sa asar hmâo nua 100.000 prăk, 1 anah phun 1 thun 300.000 prăk. Yua anun, Kon Tum kiăng biă ngă pơhưč pô tuh pơplai kơ bruă anai, dưi pơjing kual pla phun jrao prong./.