Lâm Đồng ră anai hmâo 16.000 ektar đang phun mắc ca, dưm dưm hăng 34% kual lŏn pla mắc ca đơ đam dêh čar, him lăng thun 2025 hmâo 13.700 tơn bôh mắc ca, kơmlai hơnong ñu mơ̆ng 100 truh kơ 300 klăk prăk sa ektar sa thun tui hluai kơ bruă bơwih brơi kơ đang pla. Kiăng mắc ca jing sa amăng hơdôm phun pla ba glăi prăk pơhrui glăi lu kơ tơring čar, Lâm Đồng glăk ngă tui kual pơkă pla, ngă brơi kual lŏn pla mắc ca đơ đam tơring čar truh thun 2030 đĭ truh 37.000 ektar, hăng mrô ñu hmâo 48.000 tơn, mrô pơkra phang krô rơbêh kơ 90%.

Tui hăng ơi Nguyễn Hà Lộc, Kơ-iăng Khua Gơnong bruă đang hmua hăng rơhuông adai lŏn mơnai glai klô tơring čar Lâm Đồng, hrŏm hăng hơdôm phun pla pơkon, mắc ca rŭ đĭ kah hăng sa gơnong bruă hmâo anô̆ gal prong mơ̆ng tơring čar. Kiăng hmâo tui tơhnal pơkă ba tơbiă, rơngiao kơ pơđĭ kơjăp phun pla, pơtrut kơtang pơlir hơbit bruă pla pơkra mắc ca tui jơlan pơlir hơbit, tơring čar amra đing nao pơlar tui jơlan gah đang hmua mă yua măi mok phrâo hăng mă yua hơdră măi mok pơkra kơjăp pioh sĭ hmâo nua hloh, djru mơnuih pla pơkra tui jơlan gah kơjăp phik./.