Ƀơi Cần Thơ, amăng mơguah lơ 3/11, Khul pơlir sĭ mơdrô braih pơdai Việt Nam hăng BizLIVE gum hrŏm pơphun bơkơtuai rim tal “Jơlan pơđĭ bôh tơhnal pơlir hơbit braih pơdai Việt Nam”. Bơkơtuai pơphun amăng hơdôm hrơi bruă sĭ braih, pơdai Việt Nam glăk găn rơgao lu tơlơi pơplih. Amăng lu blan rơgao braih pơdai anai hmâo jơlan gah đĭ nua na nao.

Tui hăng mrô yap him lăng mơ̆ng Ding jum sĭ mơdrô, yap him lăng amăng blan 10 rơgao, braih sĭ hmâo 700.000 tơn, dưm kơnar hăng 433 klăk đolar Mi. Him lăng 10 blan thun anai, Việt Nam sĭ năng ai ñu 7 klăk 100 rơbâo tơn braih, nua ñu giăm truh 4 klai dolar Mi, đĭ 17% gah mrô hăng đĭ 35% gah nua bơhmu hăng thun 2022. Pơkă hlâo bruă sĭ braih kơ dêh čar tač rơngiao amăng thun 2024, braih sĭ kơ dêh čar tač rơngiao mơ̆ng Việt Nam thun anai amra hmâo 8 klăk tơn. Amăng mông bơkơtuai, ƀing juăt bruă hăng khua pơ ala anom bơwih ƀong hmâo pioh lu mông črông lô jơlan gah mă yua hơdră măi mok hăng prăk pioh kơ braih pơdai kiăng dưi pơđĭ tui nua gơnam sĭ./.