VOV4.Jarai - Đing nao bruă pơtô pơblang mơng pơphun mơtăm, hăng tơlơi jak iâu “Abih bang mơnuih djru pơgang klin Covid-19 hăng pơgăn mơnuih găn nao rai ča čot” kiăng rang kơđiăng, pơssit tong bruă mă mơng rĭm čô mơnuih ƀơi anăp kơ tơlơi hŭi rơhyưt mơng klin Covid-19, tơhan wai pơgang guai lŏn ia hơmâo ngă tui tơlơi jak iâu abih bang mơnuih djru pơgang klin hăng pơgăn mơnuih găn nao rai lŏn ia ča čot; pơgôp pơgang, pơgăn hŭi klin lar hyu mơng gah rơngiao hăng lar hyu amăng mơnuih mơnam.

Tui anun, Jơlan hơdră hơmâo ngă tui amăng lu bruă sit nik, tong ten, lăp djơ̆ hăng tơlơi gal ƀơi ƀon lan, pơlir hăng hơdôm tơlơi jak iâu, pơtrut pơsur ƀơi ƀon lan, pohlôm djơ̆ hăng tơlơi rơkâo amăng pơgang klin Covid-19. Pơtô pơblang kiăng kơ abih bang mơnuih thâo hluh rơđah, djop mơta kơ tơlơi hŭi rơhyưt mơng klin Covid-19; Pok pơhai bruă djru mơnuih mơnam, hrŏm hăng mơnuih ƀon sang găn rơgao tơnap tap yua klin Covid-19 ngă.

Anai lĕ tơring čar hơmâo guai lŏn ia glông 468 km hăng dêh čar Lao, hơmâo lu jơlan mut nao rai, bruă wai pơgang, pơgăn mơnuih mut nao rai ča čot hơmâo Anom bruă git gai tơhan wai pơgang guai tơring čar Nghệ An pơphun ha amăng plĕ, djop anih hăng tŭ yua. Amăng anun, đing nao bruă pơtô pơblang brơi mơnuih ƀon sang ƀơi kual giăm guai. Đại tá Dương Hồng Hải, Kơ-iăng Khua anom bruă git gai tơhan wai pơgang guai tơring čar Nghệ An brơi thâo:

“Ƀing gơmơi ngă klă amăng bruă pơtô pơblang tơl rĭm čô mơnuih ƀon sang ƀơi kual giăm guai, pơgăn hĭ hơdôm bruă ngă soh kiăng kơ ba mơnuih mut nao rai lŏn ia ča čot pơ dêh čar Lao; dưm hơdôm kơthung čih hră ƀom kiơng ƀing mơnuih ngă soh ƀơi kual giăm guai, ƀing gơmơi jao Kơ-iăng khua apăn bruă Ping gah lĕ tơhan wai pơgang guai ƀơi să kiăng ngă phun amăng bruă hyu pơtô pơblang abih bang mơnuih djru črâo ƀô̆ mơta lơ̆m ƀuh hlơi hlơi thơ găn nao rai ča čot hăng ƀing hơmâo hră pơ-ar djơ̆ hăng tơlơi pơkă”.

Gum hrŏm hăng tơhan wai pơgang guai lŏn ia, lu mơnuih ƀon sang hơdôm să giăm guai ăt kơđiăng amăng bruă pơgang klin Covid-19 anun lĕ truă akhăn gôm ƀô̆ lơ̆m tum pơƀut lu mơnuih, pơagaih, pruih ia jrao jum dar sang. Biă mă ñu djru brơi tơhan wai pơgang guai lŏn ia kiăo tui lăng, hmao tlôn ƀuh ƀing mơnuih mut nao rai guai lŏn ia ča čot.

Ƀơi anăp kơ tơlơi tơnap tap mơng klin Covid-19, Tơhan wai pơgang guai lŏn ia tơring čar Quảng Bình hơmâo pơdong 14 anih gak ƀơi hơdôm jơlan găn nao rai, hơdôm jơlan mut nao pơ dêh čar Lao kiăng kơ pơgăn ƀing mơnuih glăi mơng hơdôm kual hơmâo klin mut rai dêh čar ta. Thiếu tá Lê Ngọc Gia, mơnuih apăn bruă ƀơi puih tơhan wai pơgang guai Plơi Ho, tơhan wai pơgang guai tơring čar Quảng Bình, amăng hrơi blan tơnap tap, ling tơhan hơmâo tơlơi gum djru mơng mơnuih ƀon sang ƀơi guai lŏn ia.

“Ƀing gơmơi hok mơ-ak biă mă, mah kơtuai jơlan guai lŏn ia yua anom bruă wai lăng, tơlơi hơdip klơ neh met wa bưp lu tơnap tap samơ̆ mơnuih ƀon sang hơmâo pơgôp prăk kak, djru brơi ƀô̆ đô̆i. Pơ anăp anao ƀing gơmơi amra pơgiong djop mơta bruă jao amăng pơgang klin Covid-19”.

Hăng tơlơi pơsit “ Pơgang klin kar hăng blah ayăt”, ƀing tơhan wai pơgang guai lŏn ia tơring čar Quảng Bình hơmâo pơplih nao rai dŏ gak tơhrơi kah mlăm ƀơi hơdôm anih pơdong kơtuai tui jơlan arăng juăt găn nao rai hăng dêh čar Lao. Yă Hồ Thủy, djuai ania Vân Kiều dŏ ƀơi plơi Eo Bù-Chút Mút, să Lâm Thuỷ, tơring glông Lệ Thủy, tơring čar Quảng Bình ol kơdol brơi thâo, ƀuh ling tơhan dŏ gak kơtuai jơlan guai lŏn ia tơnap tap biă mă yua anun neh met wa djru brơi, pơtrut pơsur pran jua kiăng kơ ƀing gơñu pơgiong bruă jao:

“Tơdah ƀuh hlơi thơ aka ƀu thâo krăn ƀơi guai lŏn ia ƀing gơmơi amra lăi pơthâo brơi ƀô̆ đô̆I kiăng ƀing gơñu thâo, kiăo tui lăng, pơgăn hĭ hmao tlôn. Hrŏm hăng ling tơhan pơgang klin Covid-19 ƀu brơi lar hyu amăng plơi pla”.

Grup tŭ mă mơnuih mut rai dêh čar ƀơi amăng jang jar kmar Cha Lo, tơring čar Quảng Bình brơi thâo, kiăng kơ wai lăng kjăp mơnuih mut nao rai ƀơi hơdôm kual giăm guai, Anom bruă git gai ling tơhan wai pơgang guai tơring čar Quảng Bình hơmâo akŏ pơdong 14 anih wai lăng ƀơi hơdôm jơlan mut nao rai pơ dêh čar Lao. Đại tá Trịnh Thanh Bình, Khua anom bruă git gai tơhan wai pơgang guai tơring čar Quảng Bình brơi thâo, hrŏm hăng bruă hyu tir, ling tơhan tơring čar Quảng Bình ăt hyu pơtrut pơsur neh met wa ƀơi guai lŏn ia gum tơngan hrŏm amăng bruă pơgang klin Covid-19.

“Hơdôm grup dŏ gak pơphun wai lăng kjăp hloh mơnuih găn nao rai lŏn ia, laih dong pơphun hyu tir kơtuai jơlan guai lŏn ia. Hrŏm hăng anun pơlir hăng pơtrut pơsur neh met wa kơđiăng amăng bruă pơgang klin, laih dong ƀơk akhăn gôm ƀô̆ hăng rơmet agaih jum dar plơi pla.”.

Lơ̆m lu mơnuih ƀơi kual giăm guai lŏn ia gum tơngan hrŏm hăng ling tơhan wai pơgang hơđong ƀơi guai lŏn ia, pơgôp amăng bruă pơgang klin Covid-19, ăt hơmâo lu mơnuih hluai tui tơlơi dưi hăng bruă mă mơng ƀing gơñu, kiăng kơ djru brơi ƀing mơnuih ngă soh. Ƀing ăt ƀuh mơn giăm anai, bruă arăng ba 200 čô mơnuih mut nao rai ƀơi guai lŏn ia ča čot ƀơi jơlan guai Bản Lầu (tơring glông Mường Khương, tơring čar Lào Cai) arăng ƀuh, hăng hơmâo lu tơlơi ngă soh hơgŏm hơmâo ngă rơđah. Sit biă ñu, ƀing anrŭ tơngan kiăng kơ ba mơnuih găn nao rai ƀơi guai lŏn ia lĕ ƀing khua plơi - ƀing mơnuih gum hrŏm amăng bruă hyu tir pơgang klin Covid-19 hrŏm hăng ling tơhan.

Yua anun, ƀing ta dưi pơsit tong, tơdah rĭm čô mơnuih ƀon sang ƀu rang kơđiăng, thâo hluh rơđah kơ tơlơi hŭi rơhyưt mơng klin Covid-19 amra ngă kơ ƀing gơñu pô hăng ană plơi pla, mah ling tơhan wai pơgang guai lŏn ia lu hơdôm pă tŭ mơn, pơkiăo nao hơdôm rơtuh rơbâo čô mơnuih wai lăng ƀơi jơlan guai, ăt ƀu dưi pơgăn hĭ ôh hơdôm bruă ngă soh kiăng kơ ba mơnuih mut nao rai lŏn ia ča čot.

Siu Đoan: Pơblang