VOV4.Jarai-Anăp kiăng ngă mơ̆ng Hơdră dêh čar pơtrun kơ bruă pơđĭ kyar bơwih ƀong huă mơnuih mơnam kual djuai ƀiă hăng kual čư̆ siăng mơ̆ng thun 2021-2030 lĕ, mơnuih ƀôn sang yơh pô tŭ mă anŏ tŭ yua mơ̆ng Hơdră, laih dơ̆ng pơđĭ tui anŏ gêh găl mơ̆ng hlâo mơ̆ng kual lŏn; pơtrut pran jua mă bruă hrưn đĭ mơ̆ng mơnuih ƀôn sang djuai ƀiă kual mơnuih ƀôn sang djuai ƀiă dŏ hăng kual čư̆ siăng pơđĭ kyar tañ, hơđong kjăp. Kiăng dưi ngă boh tơhnal anai, bruă pơhưč pran jua, jak iâu tuh pơ alin ngă tui Hơdră anai dưi hơmâo khua mua pơ ala mơnuih ƀôn sang dêh čar, kơnuk kơna gleng nao biă mă.

Hră pơtrun jơnum mơ̆ng khua mua pơ ala mơnuih ƀôn sang dêh čar pơsit hĭ Hơdră dêh čar pơtrun kơ bruă pơđĭ kyar bơwih ƀong huă mơnuih mơnam kual mơnuih djuai ƀiă hăng kual čư̆ siăng mơ̆ng thun 2021-2030 hơmâo pơtong rơđah: pơtum djop tơlơi gêh găl tuh pơ alin pơđĭ kyar bơwih ƀong huă –mơnuih mơnam kual mơnuih djuai ƀiă hăng kual čư̆ siăng, amăng anun pran djru mơ̆ng kơnuk kơna yơh phun pơsit kơ bruă mă pran djru pơkŏn.

Anai jing sa mơta tơlơi pơkă phrâo, yôm biă mă yua dah jơlan hơdră kơnuk kơna pơtrun khom hơmâo rơnoh prăk pơhlôm. Mơta tơlơi pơkŏn lĕ, djop tơring čar, plơi pla kual mơnuih djuai ƀiă hăng kual čư̆ siăng lêng kơ tơnap tap ƀudah tơnap tap hloh. Yua kơ anun, rơnoh prăk pơbuă tui mơ̆ng Gơnong dlông lĕ sa tơlơi gêh găl phun pơtrut ngă tui tŭ yua tơhnal pơtrun anai.

Khă hnun, amăng hrơi blan ĕp prăk mơ̆ng kơnuk kơna dŏ kơƀah tơnap yua klin kheng Covid 19 ngă, kiăng pơtum pran jua djru hrom mơ̆ng mơnuih mơnam kiăng kơ Hơdră dêh čar pơtrun pơđĭ kyar bơwih ƀong huă-mơnuih mơnam djuai ƀiă hăng kual čư̆ siăng mơ̆ng thun 2021-2030 dưi ba glăi boh tơhnal tŭ yua. Ƀơi mông jơnum lok sa, khua mua pơ ala tal XV phrâo anai, pô pơ ala Bố Thị Xuân Linh, grup mơ̆ng tơring čar Bình Thuận rơkâo:

“Kiăng pơhlôm kjăp dưi ngă tui hăng tŭ yua mơ̆ng hơdră anai, Kơnuk kơna hơmâo hơdră rơđah rơđong hloh, djop prăk tuh pơ alin hmao kru hăng ngă tui sa amăng plĕ, anăp lu pơblih lu hơdră djru prăk hrom. Amăng anun prăk kơnuk kơna yơh gơgrong phun hăng yôm biă mă pơsit bruă anai. Pơtrut kơtang pơhưč prăk kăk djru gah rơngiao kơnuk kơna.

Pơtrut pơsur pran jua ngă hrom pơčruh prăk mơ̆ng mơnuih ƀôn sang pioh ngă tui hơdră dêh čar pơtrun tŏ tui, tui hơdră kơnuk kơna hăng mơnuih ƀôn sang ngă hrom. Laih dơ̆ng, amăng bruă pok pơhai ngă tui ăt khom gleng nao pơtô brơi tong ten hơdră pơsir ngă tui djop hơdră dêh čar pơtrun kiăng pơđĭ kyar bơwih ƀong mơnuih mơnam kual djuai ania ƀiă ba glăi boh tơhnal tŭ yua”.

Bruă kơtưn jak iâu djru prăk kăk mơ̆ng jar kmar kơ Hơdră dêh čar pơtrun pơđĭ kyar bơwih ƀong huă mơnuih mơnam kual mơnuih djuai ƀiă hăng kual čư̆ siăng mơ̆ng thun 2021-2030 ăt khom gleng nao tong ten. Sang bruă prăk Rŏng lŏn tơnah ƀơi Việt Nam lăi pơthâo kơ Khul čih pioh Keh prăk ngă hrom Pơtô pơjuăt Rŏng lŏn tơnah GPE pioh kơ kơnuk kơna Việt Nam rơnoh prăk djru 25 klăk USD laih anun kơnang kơ sang bruă prăk Rŏng lŏn tơnah jing anom bruă djru prăk anai kơ Việt Nam.

Jơnum min Djuai ania čih pơkra hơdră ngă hrom Ding jum Akŏ bruă hăng Tuh pơ alin, Ding jum prăk kăk lăi pơthâo hăng kơnuk kơna mă yua 25 klăk dolar djru anai mơ̆ng Keh prăk GPE, pioh pơbuă tui rơnoh prăk djru brơi čan lĕ 150 klăk dolar mơ̆ng sang bruă prăk rŏng lŏn tơnah pơbuă tui ngă tui Hơdră dêh čar pơtrun pơđĭ kyar bơwih ƀong huă mơnuih mơnam kual djuai ania ƀiă hăng kual čư̆ siăng mơ̆ng thun 2021-2030.

Hrom hăng anun, Khua dêh čar phrâo kĭ Kơčăo bruă brơi ngă tui sui thun Hră pơtrun mrô 2214 kơ bruă pơsit hĭ kơčăo bruă “Kơtưn ngă hrom jar kmar djru pơđĭ kyar bơwih ƀong huă-mơnuih mơnam kual mơnuih djuai ƀiă truh thun 2025, hăng tơhnal pơkă abih bang kiăng pơtrut dơ̆ng ngă hrom pơhưč prăk kăk, tuh pơ alin, djru boh thâo ia rơgơi, tơlơi thâo thăi găn rơgao mơ̆ng dêh čar pơkŏn, djop anom bruă jar kmar, khul grup, mơnuih mơnam dêh čar tač rơngiao djru tuh pơ alin pơđĭ kyar bơwih ƀong huă-mơnuih mơnam kual djuai ania ƀiă hăng kual čư̆ siăng. Hơdôm bruă gleng nao mơ̆ng kơčăo bruă lir hơbit hăng boh yôm phun Hơdră dêh čar pơtrun kơ bruă pơđĭ kyar bơwih ƀong huă mơnuih mơnam kual mơnuih djuai ania ƀiă hăng kual čư̆ siăng mơ̆ng thun 2021-2030.

Rơđah biă mă ñu, pơsir tơlơi kơƀah lŏn dŏ, ngă hmua, anih pơkra ming, pơsir yua hơdjă brơi kơ mơnuih djuai ƀiă; pơđĭ kyar ngă hmua pla pơjing, pla kyâo, boh troh, mă yua klă anŏ gêh găl, tơlơi kơtang amăng lŏn tơnah hơmâo baih hlâo, pla pơjing, ming pơkra gơnam sĭ mơdrô hơmâo nua. Tuh pơ alin čuk pơkra jơlan, bơwih brơi bruă ngă hmua, hơđong tơlơi hơdip mơda kual mơnuih djuai ƀiă hăng hơdôm anom bruă kơnuk kơna djru amăng bruă mă mơnuih djuai ƀiă; tuh pơ alin kơ bruă pơđĭ kyar pơtô hrăm kual mơnuih djuai ania ƀiă hăng kual čư̆ siăng ba glăi boh tŭ yua ĕp mơnuih mă bruă jing mơnuih djuai ƀiă; tuh pơ alin kơsem min boh thâo ia rơgơi hăng pơtô glăi ia rơgơi amăng bruă ngă hrom pơlir pơkra ming sĭ mơdrô gơnam hơmâo nua.

Djă pioh, pơđĭ tui, mă yua rơnoh yôm gru grua hiam đưm mơ̆ng djuai ania ƀiă, lir hơbit hăng bruă čơkă tuai hyu ngui; wai pơgang tơlơi suaih pral kơ mơnuih ƀôn sang, pơđĭ tui tơlơi kơtang rơjang drơi jăn, kơnuih hiam drơi jăn mơnuih djuai ƀiă; pơhlôm, pơgang tơlơi khen pơai buai čơđai muai; ngă tui tơlơi bơkơnar đah rơkơi hăng đah kơmơi laih anun pơsir hơdôm tơlơi ječ ameč pơdjơ̆ nao kơ ƀing đah kơmơi hăng čơđai muai....

Kơčăo bruă kơtưn truh thun 2025, pơhưč lu tơlơi gêh găl djru mơ̆ng jar kmar, biă mă ñu prăk djru huăi mă kơmlai, čan tuh pơ alin pơđĭ kyar sit nik hăng čan prăk djru soh sel. Jak iâu, pơhưč tuh pơ alin mơ̆ng jar kmar pioh pơtrut pơđĭ kyar bơwih ƀong huă mơnuih mơnam kual mơnuih djuai ania ƀiă hăng kual čư̆ siăng kơnang kơ anŏ kiăng hăng tŭ yua sit nik, tơlơi gêh găl hăng anŏ thâo hơmâo mơ̆ng rĭm plơi pla, rĭm djuai ania, tui hơdră djă pioh rah hăng pơđĭ kyar tui rơnoh yôm, gru grua hiam đưm djop djuai ania, pơgang anih dŏ jum dar rơgoh. Jak iâu djru ba tơlơi thâo ia rơgơi mơ̆ng lu anom bruă, mơnuih mơ̆ng tač rơngiao djru pơtô hrăm thâo lu kơ mơnuih mă bruă amăng kual djuai ania ƀiă hăng kual čư̆ siăng; mơnuih mă bruă čar, mơnuih apăn bruă kơnuk kơna dŏ mă bruă djru pơ kual mơnuih djuai ƀiă mơ̆ng gơnong dlông truh pơ plơi pla.

Nay Jek: Pơblang