VOV4.Jarai - Kiăng pơsit hơdôm tơlơi gal, tơlơi tơnap, črông sai bruă pơsir, mă yua tơhnal gal kiăng djă pioh tơlơi pơđĭ kyar hơđong gơnong bruă hơdang amăng rơnuk phrâo, mơguah lơ 16/7, ƀơi Hà Nội, Ding jum đang hmua hăng pơđĭ kyar ƀôn lan dêh čar pơphun jơnum lăng nao rai amăng tivi kơ “Jơlan gah pơđĭ kyar gơnong bruă hơdang thun 2021 hăng pok pơhai Tơlơi pơsit mơng Khua dêh čar kơ bruă pơsit Bruă pơđĭ kyar akan hơdang Việt Nam truh thun 2030, tơhnal lăng truh thun 2045”. Amăng 6 blan akô̆ thun anai, mrô hơdang rông ƀơi ia khơkhar hmâo 371 rơbâo tơn,đĭ 12% bơhmu hăng thun 2020. Hrom hăng hơdôm bôh tơhnal hmâo, pơsit hrom kơ gơnong bruă hơdang Việt Nam brơi ƀuh, dô̆ bŏng glăi hăng lu tơlơi tơnap hăng ƀu tơphă lom pơđĭ kyar, klin Covid-19 ngă tơnap hăng tơlơi bơkơtưn sĭ mơdrô jar kơmar ƀu thâo him lăng. Pok pơhai bruă pơlar akan hơdang Việt Nam truh thun 2030, tơhnal lăng truh thun 2045 dưi hmâo Khua dêh čar ta pơsit amra anăp nao truh tơhnal pơkă pơđĭ kyar akan hơdang hmâo 3% truh 4% sa thun; abih bang mrô akan hơdang hmâo 9 klăk 800 rơbâo tơn; nua prăk pơhrui glăi hơdang sĭ kơ dêh čar tač rơngiao hmâo mơng 14 truh 16 klai dolar Mi hăng pơsir bruă mă brơi rơbêh kơ 3 klăk 500 rơbâo čô mơnuih mă bruă./.

Siu H’ Prăk: Pô pơblang