VOV4.Jarai - Thun blan rơgao, bruă pơphun ngă jơlan hơdră djru djuai ania hơmâo lu tơlơi dưi ngă yôm. Amăng anun ta khŏm yap nao bruă pơđĭ kyar abih bang gah bruă pơtô pơjuăt ƀơi kual mơnuih ƀon sang djuai ƀiă hăng čư̆ siăng. Mah aka ƀu hiam, aka ƀu hơmâo gơnam yơ yôm samơ̆ ăt djơ̆ mơn hăng tơlơi kiăng pơtô hrăm.

Sang hră čem rông ană bă djuai ƀiă čơđai hrăm gưl sa Nậm Búng, să Nậm Búng, tơring glông Văn Chấn, tơring čar Yên Bái lĕ anih hrăm phrâo akŏ pơdong amăng blan 4 thun 2021. Anai ăt jing anih hơdip hăng hrăm hră mơng ană bă djuai ania ƀiă dŏ hơdip ƀơi anai. Sang hră phrâo, hiam, kơƀang grê phrâo mơn anun lĕ tơlơi hok mơ-ak ƀu kơnong hăng nai pơtô hăng ƀing čơđai đôč ôh mơ̆ anai lĕ tơlơi mơ-ak hrŏm mơng amĭ ama ƀing čơđai dong. Ră anai gơñu hơđong pran laih lơ̆m brơi ană bă nao hrăm, huăi bơngơ̆t hŭi rơ-ot rơngoh amăng bơyan puih, huăi hŭi hơ-uh amăng bơyan phang tui hăng ƀơi sang hră hơđăp dong tah. Tui hăng nai Nguyễn Văn Du, Kơ-iăng nai sang hră lĕ ră anai ană bă djuai ƀiă hrăm pơ anai mơ-ak laih, hơdip mơ-ak hrăm hră mơ-ak mơn. Samơ̆ rơngiao kơ tơlơi klă hiam ăt hơmâo mơn tơlơi tơnap tap hăng nai pơtô hăng ƀing čơđai mơng sang hră Nậm Búng anai.

“Ia brơi ƀing čơđai yua lĕ ăt gơnang kơ sang anŏ neh met wa pơ anai mơn, hơdrôm hră lĕ abih bang ƀing čơđai khŏm blơi, samơ̆ tơlơi hơdip ană plơi ƀơi anai tơnap kơtang biă. Sang hră ăt pơsur amĭ ama sang anŏ ƀing čơđai lĕ blơi mă dua mơta hră hrăm anun anun toán hăng tiếng việt, bơ hră pơkŏn lĕ hrăm kiăo tui hră ƀing nai yua dah ƀu dưi blơi ôh. 60% čô čơđai ƀu hơmâo prăk blơi djŏp hơdrôm hră hrăm ôh”.

Ơi Nguyễn Văn Tiến, Khua Jơnum min mơnuih ƀon sang să Tiên Nguyên, sa boh să kual čư̆ siăng mơng tơring glông Quang Bình, tơring čar Hà Giang brơi thâo: Lăi kiăng pơhlôm hơmâo anih hrăm, anih đih pơdơi kơ ƀing čơđai hăng nai pơtô ƀơi hơdôm anih hrăm pơ să lĕ dưi mơn djru brơi, samơ̆ sit biă ñu ăt dŏ kơƀah mơn, biă ñu anih hrăm hăng sang pioh jơnum ngui ngor. Kiăng pơkra ming hiam ăt kah hăng pơkra phrâo lĕ ƀu hơmâo prăk ôh, jak iâu neh met wa pơčruh lĕ tơnap mơn yua dah neh met wa pơ anai djuai ania ƀiă kơƀah biă. Yua hnun, kiăng biă djŏp gưl ping gah, gong gai djru ba hiư̆m pă đah mơng pơhlôm bruă pơtô hrăm klă ƀơi kual mơnuih ƀon sang djuai ƀiă dŏ tơnap tap.

“Anih hrăm dŏ kơƀah, anih jơnum dŏ kơƀah mơn. Hơdôm thun hlâo să ăt jak iâu tơlơi gum djru mơng amĭ ama ƀing čơđai, mơng ƀing khua mua, kan ƀô̆...samơ̆ ăt pơkra mă hăng tôl mơn, aka ƀu kơjăp tui hăng jơlan hơdră mơng Kơnuk kơna ngă ôh. Ăt khŏm pơhlôm ba yơh, anih hră yơh phun, samơ̆ kiăng tui hăng anŏ klă arăng pơkă lĕ aka ƀu dưi ôh, ăt dŏ kơƀah, khŏm mưn mă dơ dăng anih mă bruă mơng ƀing nai pơtô, kơhniă biă”.

Kơƀah hơdrôm hră hrăm, kơƀah anih hrăm, hơdôm boh sang hră pioh kơsem min, jơnum ăt jing tơlơi mơ̆ hơdôm boh sang hră pơ kual ataih yaih, kual mơnuih ƀon sang djuai ƀiă glăk bưp ră anai. Samơ̆ hăng tơlơi gum djru mơng Kơnuk kơna hăng lu tơlơi djru sit nik, hơmâo tom hăng tơlơi djru ba mơng abih bang mơnuih, ƀu sui dong tah tơlơi anai amra hơmâo pơsir brơi mơn. Kiăng ngă hiư̆m pă brơi ƀing čơđai, amĭ ama ƀing čơđai hơđong pran brơi ană bă hrăm pơ sang hră klă, pơhlôm kơ bruă rông ană mơnuih ta mơ̆ Ping gah hăng Kơnuk kơna lăng ba kơtang.

VOV4: Čih - Siu H’Mai: Pơblang