VOV4.Jarai - Rơwang hrơi tơjuh rơgao, hơdôm bôh tơring čar, ƀôn prong amăng đơ đam dêh čar ta hmâo lăi pơthâo bôh tơhnal bruă ruah khua pơ ala mơnuih ƀôn sang dêh čar ta tal 15 hăng Khua pơ ala Khul pơ ala mơnuih ƀôn sang tơring čar rơwang bruă 2021-2026. Tui hăng tơlơi pơsit mơng Khua git gai wai lăng pơ ala mơnuih ƀôn sang dêh čar ta ơi Vương Đình Huệ, bôh tơhnal hrom mơng đơ đam dêh čar ta hmâo 99,57% mrô mơnuih ƀôn sang nao ruah khua, lu hloh abih bang bruă ruah khua 5 thun hlâo. Bruă ruah khua tal anai truh kih, khă amăng tơlơi klin Covid-19 ngă dlêh tơnap.

Ƀơi tơring čar Kontum, amăng 10 čô mơnuih tơbiă anăn, mơnuih ruah khua tơring čar Kontum hmâo ruah mă laih 6 čô mơnuih dưi ruah ngă khua pơ ala mơnuih ƀôn sang dêh čar ta tal 15, hăng mrô mơng 82,97% truh 93,39%. Rơđah biă ñu, anun lĕ: ơi Nguyễn Văn Hùng, Ding kơna Grŭp mă bruă Ping gah dêh čar ta, Khua ding jum bôh thâo, bơkơjap drơi jăn hăng tuai čuă ngui; Yă Trần Thị Thu Phước (djuai ania Hơdang) Kơ-iăng Khua Kông ang tơring čar Kontum; Ơi Tô Văn Tám, Kơ-iăng Khua grŭp gơgrong bruă Grŭp Khua pơ ala mơnuih ƀôn sang dêh čar tơring čar Kontum, Ding kơna Jơnum min tơlơi phiăn Khua pơ ala mơnuih ƀôn sang dêh čar ta; Ơi Phạm Đình Thanh, Khua Gơnong bruă tơlơi phiăn tơring čar Kontum; Ơi U Huấn, Ding kơna pơhlôm hlâo Ping gah dêh čar, Ding kơna Grŭp apăn bruă Ping gah tơring čar, Khua Grŭp apăn bruă Ping gah tơring čar Kontum; Yă Nàng Xô Vi (djuai ania Brâu), mă bruă ƀơi Sang hră đom lom djop djuai ania ƀiă tơring čar ƀơi tơring glông Ia H’Drai. Mơnuih ƀôn sang tơring čar Kontum ăt hmâo laih mơn 51 čô khua pơ ala Khul pơ ala mơnuih ƀôn sang tơring čar, 316 čô khua pơ ala Khul pơ ala mơnuih ƀôn sang gưl tơring glông hăng 2.164 čô khua pơ ala mơnuih ƀôn sang Khul pơ ala mơnuih ƀôn sang tơring čar, 316 čô khua pơ ala Khul pơ ala mơnuih ƀôn sang gưl tơring glông hăng 2.164 čô khua pơ ala Khul pơ ala mơnuih ƀôn sang gưl să. Ƀu hmâo anom ruah khua hơpă khom ruah glăi.

Khua git gai wai lăng pơ ala mơnuih ƀôn sang dêh čar ta ơi Vương Đình Huệ pơsit bruă ruah khua truh kih

Tui hăng tơlơi lăi pơthâo glăi mơng Jơnum min ruah khua tơring čar Gialai, ƀơi anih anom hmâo rơbêh kơ 1 klăk cô mơnuih ruah khua nao plĕ hră (hmâo 99,86%). Bôh tơhnal bruă ruah khua pơhlôm djơ̆ gah mrô, hơdră, crăn bruă, bôh thâo. Rơđah biă ñu, hmâo 8/14 čô mơnuih tơbiă anăn dưi ruah ngă khua pơ ala mơnuih ƀôn sang dêh čar ta tal 15, 71/119 mrô mơnuih tơbiă anăn dưi ruah ngă khua pơ ala Khul pơ ala mơnuih ƀôn sang tơring čar, 571/951 čô mơnuih tơbiă anăn dưi ruah ngă khua pơ ala Khul pơ ala mơnuih ƀôn sang gưl tơring glông hăng 4.997/8.455 čô mơnuih tơbiă anăn dưi ruah ngă khua pơ ala Khul pơ ala mơnuih ƀôn sang gưl să.

Ƀơi tơring čar Daklak, hmâo ruah djop laih khua pơ ala mơnuih ƀôn sang dêh čar ta, 75 čô khua pơ ala Khul pơ ala mơnuih ƀôn sang tơring čar, 513/514 čô khua pơ ala Khul pơ ala mơnuih ƀôn sang gưl tơring glông hăng 4.628/4.658 čô khua pơ ala gưl să. Anom ruah khua mrô 9, 10, 11 (să Čư̆ San, tơring glông Mdrak) khom pơphun glăi bruă ruah khua pơ ala Khul pơ ala mơnuih ƀôn sang gưl să rơwang bruă 2021-2026, yua hmâo yŭ kơ ha mơkrah mrô mơnuih ruah khua nao plĕ hră. Bruă pơphun ruah khua glăi ƀơi 3 bôh anom ruah khua dưi hmâo Jơnum min ruah khua tơring čar Daklak pơsit amăng hrơi tom brơi (hrơi tơjuh, lơ 6/6). Pơsit bôh tơhnal pơphun, ngă tui bruă ruah khua pơ ala mơnuih ƀôn sang dêh čar ta tal 15 hăng Khua pơ ala Khul pơ ala mơnuih ƀôn sang tơring čar rơwang bruă 2021-2026, Ơi Y Biêr Niê, Khua Jơnum min ruah khua tơring čar Daklak brơi thâo:

“Hăng tơlơi gir run mơng abih bang glông bruă kơđi čar mơng tơring čar truh tơring glông bruă pok pơhai ruah khua truh kih klă hiam. Hăng mrô mơnuih ƀôn sang nao ruah 99,76%, amra lăi anai lĕ mrô lu hloh mơng hlâo truh kơ ră anai. Bôh tơhnal ruah khua phun ñu ruah djop gah mrô 9 čô khua pơ ala mơnuih ƀôn sang dêh čar, gah khua pơ ala khul pơ ala mơnuih ƀôn sang tơring čar ruah djop 75 čô khua pơ ala pơhlôm hơdôm hơdră mrô”.   

Tui hăng bôh tơhnal lăi pơthâo glăi mơng Jơnum min ruah khua tơring čar Daknông, bruă ruah khua pơ ala mơnuih ƀôn sang tal 15 hăng khua pơ ala Khul pơ ala mơnuih ƀôn sang hơdôm gưl rơwang bruă 2021-2026 ƀơi tơring čar truh kih klă hiam, hăng mrô 99,77% mrô mơnuih nao ruah khua. Hrom hăng bruă ruah khua djop 6 čô Khua pơ ala mơnuih ƀôn sang dêh čar tal 15, 52 čô khua pơ ala Khul pơ ala mơnuih ƀôn sang tơring čar, bruă ruah khua ăt pơhlôm djơ̆ mơn gah mrô mơnuih, hơdră, črăn bruă, bôh thâo hăng khua pơ ala Khul pơ ala mơnuih ƀôn sang gưl tơring glông hăng gưl să. Tui hăng anun, ƀơi tơring čar Lâm Đồng, mơnuih ruah khua hmâo nao ruah hăng plĕ hră laih kiăng ruah tơbiă mơnuih pơ ala hmâo pran jua klă, hmâo bôh thâo, pơdah djop tum, tơpă sit, tơlơi pơmin, tơlơi čang rơmang mơng mơnuih ƀôn sang. Rơđah biă ñu, hmâo ruah djop laih 7 čô khua pơ ala Khul pơ ala mơnuih ƀôn sang dêh čar ta tal 15, 66 čô khua pơ ala Khul pơ ala mơnuih ƀôn sang tơring čar, 396 čô khua pơ ala mơnuih ƀôn sang gưl tơring glông hăng 3.350 čô khua pơ ala Khul pơ ala mơnuih ƀôn sang gưl să.

Pơhiăp amăng mông jơnum tal 56 mơng Jơnum min apăn bruă Khua pơ ala mơnuih ƀôn sang dêh čar ta phrâo rơgao, Khua git gai wai lăng pơ ala mơnuih ƀôn sang dêh čar ta ơi Vương Đình Huệ brơi thâo: bruă ruah khua pơ ala mơnuih ƀôn sang dêh čar ta tal 15 hăng khual pơ ala Khul pơ ala mơnuih ƀôn sang hơdôm gưl rơwang bruă 2021-2026, đơ đam dêh čar ta hmâo 99,57% mrô mơnuih ruah khua, lu hloh wot bruă ruah khua 5 thun hlâo adih. Bruă ruah khua tal anai truh kih biă, khă amăng tơlơi klin Covid-19 ngă dlêh tơnap. Đơ đam dêh čar hmâo ruah khua 500 čô khua pơ ala mơnuih ƀôn sang dêh čar ta. Phun ñu ruah djop laih khua pơ ala mơnuih ƀôn sang gưl să, tơring glông, tơring čar.

Pơsit bruă ruah khua truh kih klă hiam, pơhlôm, Khua git gai wai lăng pơ ala mơnuih ƀôn sang dêh čar, Khua Khul ruah khua dêh čar ơi Vương Đình Huệ rơkâo Anom bruă Khul ruah khua lŏn ia ta tañ ngă giong tơlơi lăi pơthâo glăi kơ bôh tơhnal mơ-ĭt kơ khua git gai Ping gah, Kơnuk kơna hăng Jơnum min apăn bruă khua pơ ala mơnuih ƀôn sang dêh čar ta. Bơ̆ ơi Bùi Văn Cường, Khua čih pioh Khua pơ ala mơnuih ƀôn sang dêh čar Khua anom bruă Khua pơ ala mơnuih ƀôn sang, Khua Anom bruă Khul ruah khua pơ ala mơnuih ƀôn sang dêh čar lĕ brơi thâo bruă ruah khua truh kih hăng hmâo bôh tŭ yua yôm phăn. Mơnuih ruah khua lăng tui dong bruă mă mơng ƀing khua pơ ala mơnuih ƀôn sang amăng sa rơwang bruă.

“Bruă ruah khua hmâo bôh tŭ yua yôm phăn biă. Ruah tơbiă hơdôm mơnuih mơbruă, khua pơ ala kơ tơlơi pơmin čang rơmang mơng mơnuih ƀôn sang. Rơgao kơ bruă ruah tơbiă ƀing khua pơ ala kơ pô, amăng bruă gơgrong mơng pô khua pơ ala mơnuih ƀôn sang jing jê̆ giăm hloh hăng mơnuih ƀôn sang, hmư̆ hiăp, tŭ mă tơlơi gum pơhiăp mơng mơnuih ƀôn sang lom ngă bruă pô. Mơnuih ƀôn sang dô̆ lăng tui khua pơ ala ngă tui tơlơi ƀuan mơng pô. Tơdah khua pơ ala ƀu ngă tui klă, ƀu ngă tui tơpă thơ mơnuih ƀôn sang rơkâo hơdôm ƀirô hmâo tơlơi dưi pel ĕp”.

Tui hăng tơlơi pơkă mơng Tơlơi phiăn ruah khua pơ ala mơnuih ƀôn sang dêh čar hăng khua pơ ala Khul pơ ala mơnuih ƀôn sang, Khul ruah khua dêh čar ta hluai tui hră pơ-ar klah čun bruă ruah khua amăng đơ đam dêh čar ta lăi pơthâo bôh tơhnal ruah khua hăng hră čih anăn hơdôm mơnuih dưi ruah ngă khua pơ ala mơnuih ƀôn sang dêh čar ta kaih hloh lĕ 20 hrơi tơdơi kơ hrơi ruah khua, kaih hloh lĕ lơ 12/6/2021./.

Siu H’ Prăk: Pô pơblang