VOV4.Jarai - Tlam lơ 21/10, Jơnum min mơnuih ƀon sang plơi prong Buôn Ma Thuột (Dak Lăk) ngă hră pơtrun ječ ameč git gai hơdôm boh să, phường hruă kơjăp hloh hơdră pơgang klin đah mơng dưi pơgăn glăi tơlơi truh hơmâo lu mơnuih ƀă klin Covid-19 amăng plơi pla. Tui anun, plơi prong kiăng pơdơi dong mơn anih ngui ngor ayun suang mlăm, sang adoh karaoke, ƀar, massage, internet, anih ngui điện tử, sĭ mơdrô ter jơlan, sĭ vĕ sô̆; nao jơnum tơlơi đăo, ngă yang rơbang; bruă ngui ngor boh thâo gru grua, adoh suang hăng bruă bơkơjăp drơi jăn. Hăng anih sĭ mơdrô gơnam ƀong huă mơñum ia dưi bơwih brơi tuai ƀơi anih samơ̆ khŏm pơhlôm djơ̆ tơlơi pơtrun pơgang klin Covid-19.

Ƀing ơi ia jrao test hmar kiăng ĕp ƀuh mơnuih ƀă klin amăng plơi pla

Amăng lơ 21/10, Buôn Ma Thuột čih pioh hơmâo 30 čô mơnuih ƀă kman SARS-CoV-2, amăng anun hơmâo 12 čô ƀă amăng plơi pla. Plơi prong Buôn Ma Thuột hyu kiăo kru, test hmar năng ai 4.000 čô mơnuih ƀơi ƀuôn Kô Sier, phường Tân Lập đah mơng tañ ĕp ƀuh F0 amăng plơi pla, dưi pơgăn klin. Yap abih bang amăng tơring čar Dak Lăk, lơ 21/10 hơmâo 92 čô mơnuih ƀă kman SARS-CoV-2. Anai lĕ mrô mơnuih ƀă hơmâo ƀuh lu hloh amăng ha hrơi mơng hlâo truh anai.

Siu H’Mai: Pơblang